NSOLO WA PFUNDZIRO 51
NYIMBO 132 Cincino Ndife Manungo Mabodzi
Tinapasa Tani Mbiri Yahova pa Ntsiku Yakumanga Banja?
“Pinthu pyonsene mbapicitwe munjira yadidi na yakulinganira.”—1 AKOR. 14:40
PINAFUNA IFE KUPFUNDZA
Tinaona kuti ale anafuna kumanga banja anapasa tani mbiri Yahova pa ntsiku yakumanga banja.
1-2. Yahova asafunanji pa ntsiku yanu yakumanga banja?
KODI imwe muli kucita masasanyiro toera kumanga banja? Khala muli kucita, pyenepi ndi pyadidi kakamwe. Panango imwe muli kucita mabasa mazinji toera kukhunganyika ntsiku ineyi. Yahova asafunambo kuti pinthu pifambe mwadidi ntsiku ineyi. Iye asafuna kuti mukhale akutsandzaya pa ntsiku yanu yakumangaa banja mbamukhala akutsandzaya pabodzi ntsogolo.—Mis. 5:18; Nyim. 3:11.
2 Ndi pyakufunika kupasa mbiri Yahova pa ntsiku yakumanga banja. Iye athema kucitirwa pyenepi. Thangwi yanji, pontho munacita tani pyenepi? Nsolo uno wakhunganywa makamaka toera kuphedza ale anakhunganyika toera kumanga banja. Mbwenye pinthu pinafuna ife kupfundza pinaphedza ife tonsene toera kupasa mbiri Yahova tingakhala pa phwando yakumanga banja peno tingaphembwa maonero na anthu anakhunganyika toera kumanga banja.
THANGWI YANJI TISAFUNIKA KUPASA MBIRI YAHOVA?
3. Ale anakhunganyika toera kumanga banja asafunika kucitanji?
3 Ale anakhunganyika toera kumanga banja, asafunika kucita pyenepi mwakubverana na pitsogolero pya Yahova pinagumanika m’Bhibhlya. Thangwi yanji? Thangwi ndi Yahova adatomesa banja. Ndiye adapasa Adhamu nkazace. (Gen. 1:28; 2:24) Natenepa, ale anakhunganyika toera kumanga banja, asafunika kuikha maonero a Yahova pa mbuto yakutoma toera kumpasa mbiri.
4. Ndi thangwi ipi inango iri na anthu toera kupasa mbiri Yahova pa ntsiku yawo yakumanga banja?
4 Pali na thangwi inango yakuti inakukulumizani toera kucita pinthu mwakubverana na pitsogolero pya Yahova pakukhunganyika toera kumanga banja. Yahova ndi Babanu wakudzulu, pontho ndi Xamwali wanu. (Aheb. 12:9) Pontho musafuna kupitiriza kukhala na uxamwali wakuwanga na iye. Pa ntsiku yanu yakumanga banja peno pa ntsiku inango, imwe nee munafuna kucita cinthu cakuti cinatsukwalisa Yahova (Mas. 25:14) Munganyerezera pinthu pyonsene pidacita Yahova na pinthu pinafuna kucita iye kuna imwe, nee musanyerezera kuti ntsiku yanu yakumanga banja isafunika kupasa mbiri Yahova?—Mas. 116:12.
TINAPASA TANI MBIRI YAHOVA?
5. Bhibhlya inaphedza tani ale anafuna kumanga banja toera kupasa mbiri Yahova?
5 Bhibhlya nee iri na mitemo inalonga kuti tinacita tani phwando yakumanga banja, khala ale anafuna kumanga banja asankhula kucita phwando. Natenepa, ale anafuna kumanga banja anakhunganyika mwakubverana na makhaliro awo, misambo na pinafuna iwo. Mbwenye Akristu andimomwene asafunika kubvera mitemo ya mautongi inalonga thangwi yakumanga banja. (Mat. 22:21) Ale anafuna kumanga banja angakhunganyika mwakubverana na pinalonga Bhibhlya, asapasa mbiri Yahova na kuntsandzayisa. Ndi pinthu pipi pinalonga Bhibhlya pyakuti iwo asafunika kupikumbuka?
6. Thangwi yanji ale anafuna kumanga banja asafunika kubvera mitemo ya mautongi?
6 Bverani mitemo ya mautongi. (Aroma 13:1, 2) M’madziko mazinji muli na mitemo yakuti ale anafuna kumanga banja asafunika kuibvera. Iwo asafunika kudziwa mitemo inafunika iwo kubvera mucisa cawo. Khala nee musadziwa kuti munagumana kupi mphangwa zenezi, phembani ciphedzo ca akulu a mpingo.b
7. Ninji pinafuna kukuphedzani toera ntsiku yanu yakumanga banja ikhale yakuthema?
7 Citani pinthu pyakuthema. (1 Akor. 10:31, 32) Phwando yanu yakumanga banja isafunika kupangiza makhaliro a misapo ya nzimu wakucena wa Mulungu, m’mbuto mwakupangiza makhaliro a dziko. (Agal. 5:19-26) Mwakubverana na pinalonga Bhibhlya thangwi ya nsolo wa banja, mamuna ndiye ali na basa yakucitisa kuti phwando ineyi ikhale yakutsandzayisa na yakuthema. Ninji pinafuna kukuphedzani? Pangacitwa nkhani yakumanga banja yakubuluswa m’Bhibhlya, pontho ingacitwa mwaufuni na mwacilemedzo, inaphedza onsene toera kubvesesa kuti banja ndi muoni wa Yahova. Nkhani ineyi inaphedzambo ale anaibvesera toera kulemedza ndzidzi unoyu. Na thangwi ineyi, azinji asasankhula kuti nkhani ineyi icitwe n’Nyumba ya Umambo pingakwanisika. Khala musafuna kuphatisira Nyumba ya Umambo, musafunika kulemba tsamba toera kuphemba akulu a mpingo mwakucimbiza kakamwe.
8. Ninji pinafuna kukuphedzani toera phwando yanu yakumanga banja ikhale yakuthema? (Romans 13:13)
8 Lerini Aroma 13:13. Khala musafuna kucita phwando pa ntsiku yanu yakumanga banja, ninji pinafunika imwe kucita toera mukhonde kupangiza makhaliro a dziko? Fala Yacigerego idathumburuzwa kuti “maphwando akukhonda thema” ikhalonga pinthu pyakuti pikhaphataniza kumwa kakamwe na nyimbo zakuti zikhalizwa mpaka namasiku kakamwe. (Onani nota de estudo yakuti “festas descontroladas” pa Aroma 13:13.) Khala musafuna kuphatisira pyakumwa pyakuledzeresa, nyerezerani pinafunika imwe kucita toera anthu akhonde kumwa kakamwe.c Khala munaliza nyimbo, ikhani volume yakuthema toera anthu adacemera imwe akwanise kucedza. Onesesani mwadidi ntundu wa nyimbo na pinalongwa n’nyimbo zenezi toera zikhonde kugwegwedusa anango.
9. Ale anafuna kumanga banja asafunika kunyerezeranji khala iwo asafuna kucita ubalangazi pa phwando yawo?
9 Kodi imwe musafuna kuona mavidhyu, mafoto peno kucita ubalangazi unango? Panango m’bodzi wa anthu adacemera imwe, anafuna kulonga pinthu thangwi ya ale anamanga banja. Pinthu ninga pyenepi pinakwanisa kucitisa ntsiku yakumanga banja kukhala yakupambulika. Mbwenye mwakukhonda tsalakana pinafuna imwe kucita, wangisirani toera pyonsene pikhale pyakuthema. (Afil. 4:8) Bvundzikani: ‘Kodi pyenepi pinapangiza cilemedzo kuna anthu? Pinacitisa ntsiku yakumanga banja ikhale yakuthema?’ Pontho mbvundzo wakufunika kakamwe: ‘Pinapasa mbiri Yahova?’ Ndimomwene kuti ndi pyadidi kucita pinthu pinango pyakutsandzayisa, mbwenye citani mphole-mphole toera pinthu pyenepi pikhonde kukhala pyakukhonda thema peno kucitisa anthu kunyerezera pyakupita m’mabonde. (Aef. 5:3) Khala acibale anu peno axamwali anu asafuna kulonga cinthu pa ndzidzi wa phwando, khalani na cinyindiro cakuti iwo asadziwa pinafunika iwo kulonga na pinthu pyakuti nee asafunika kupilonga.
10. Thangwi yanji ale anafuna kumanga banja asafunika kudzindikira pinacimwana iwo kucita? (1 Juwau 2:15-17)
10 Dzindikirani pinthu pinacimwana imwe kucita. (Lerini 1 Juwau 2:15-17.) Yahova asatsandzaya kakamwe alambiri ace angacita pyonsene pinakwanisa iwo toera kumpasa mbiri, m’mbuto mwakupasika mbiri. Natenepa, Nkristu anadzindikira pinacimwana iye kucita, nee anabvunga kobiri izinji kakamwe peno kucita pinthu toera kupangizika. Kucita phwando yakumanga banja na pinthu pyakucepa kusaphedza tani? Onani pidacitikira m’bale Mike wa ku Noruega. Iye alonga: “Ife nee tafiyari kobiri, pontho pyenepi pyatiphedza toera tipitirize ninga apainiya. Pa phwando yathu tikhali na pinthu pyakucepa kakamwe, mbwenye ikhali yadidi, pontho nee tinaiduwala.” Mulongo Tabitha wa ku Indiya, alonga: “Ife tacalira kudzudzumika kakamwe. Thangwi yakukhala na pinthu pyakucepa pa phwando yathu, ife nee tikhali na basa ikulu toera kukhunganya pinthu, pontho tikhabverana.”
Pa dziko yonsene yapantsi, Akristu anakwanisa kucita phwando yakumanga banja yadidi, yakukhonda duwalika na pinthu pyakucepa (Onani ndima 10-11)
11. Ale anafuna kumanga banja anapangiza tani kuti ndi akucepeseka thangwi ya njira inafuna iwo kubvala? (Onanimbo mafoto.)
11 Kodi imwe mwasankhula kale nguwo zinafuna imwe kubvala pa ntsiku yanu yakumanga banja? Mwakukhonda penula, musafuna kukhala wakubalika kakamwe. Ngakhale mu ndzidzi wakale, nkazi na mamuna akhafuna kumanga banja akhasankhula mwadidi nguwo zikhafuna iwo kubvala. (Iza. 61:10) Ndimomwene kuti pa ntsiku yanu yakumanga banja, munabvala nguwo zakusiyana na zinabvala imwe ntsiku zinango. Ngakhale tenepo, nguwo zanu zisafunika kukhala zakuthema. (1 Tim. 2:9) Lekani kutawirisa kuti nguwo zanu peno pinthu pinango pyakumanungo pikhale pyakufunika kakamwe pa ntsiku yanu yakumanga banja.—1 Ped. 3:3, 4.
12. Thangwi yanji ale anafuna kumanga banja asafunika kucalira pinthu pyakuti nee pisabverana na pinalonga Bhibhlya?
12 Calirani pinthu pyakuti nee pisabverana na pinalonga Bhibhlya. (Apok. 18:4) N’dziko ino yakuti iri kutongwa na Sathani, m’maphwando akumanga banja pasacitwa pinthu pizinji pinacita khundu ya uphemberi wauthambi na kukhulupira mizimu. Yahova asapangiza kuti tisafunika kukhala kutali na pinthu pyenepi. (2 Akor. 6:14-17) Khala nee musadziwa pinthu pinacitwa mucisa canu ndi pyakutawirika peno nkhabe, fufudzani toera mudziwe kuti pinthu pyenepi pyatoma tani, pontho fufudzani pinthu pinalonga Bhibhlya thangwi ya pyenepi toera musankhule khala munapicita pa phwando yanu yakumanga banja peno nkhabe.
13. Ale anafuna kumanga banja anatowezera tani Yahova mbakhala na maonero mabodzi ene thangwi ya miyoni?
13 Kodi kazinji kene ale anacemerwa pa phwando yakumanga banja mucisa canu asapereka miyoni kuna ale anamanga banja? Khala munthu ali na kobiri izinji peno yakucepa, pyenepi pinacinja ntundu wa muoni unapereka iye. Ndimomwene kuti Akristu asapangwa toera apase anango, pontho iwo asatsandzaya na kucita pyenepi. (Mis. 11:25; Mabasa 20:35) Mbwenye ife nee tisafuna kuti ale anacemera ife akakamizike toera kutipasa miyoni peno kunyerezera kuti nee tinatsandzaya angatipasa muoni wakucepa. Ife tisatowezera Yahova mbatikhala na maonero mabodzi ene ali na iye thangwi ya miyoni. Natenepa, tisasiya kuti anango atipase miyoni na ntima onsene, pontho mwakubverana na makhaliro awo.—2 Akor. 9:7.
KUCALIRA PINENTSO NA KUPIKUNDA
14. Ndi pinentso pipi pinathimbana na ale anafuna kumanga banja?
14 Panango munathimbana na pinentso pakucita masasanyiro a phwando yanu yakumanga banja toera mupase mbiri Yahova. Mwacitsandzo, panango pinanentsa kucita masasanyiro a phwando na pinthu pyakucepa. Charlie wa ku Ilhas Salomão, alonga: “Pyanentsa kakamwe kusankhula anthu akhafuna ife kucemera. Ife tiri na axamwali azinji, pontho mucisa cathu, anthu onsene asadikhira kucemerwa.” Tabitha adalongwa pa ndima 9, alonga: “Kunakhala ine, kazinji kene anthu asacita maphwando makulu akumanga banja. Pyakwata ndzidzi toera anyakubalathu atawire cisankhulo cidacita ife cakucemera basi ene anthu 100.” Sarah wa ku Indiya alonga: “Anthu anango asalemedza kakamwe ale ali na kobiri izinji. Acibale anga abvunga kobiri izinji kakamwe mbacita maphwando makulu akumanga banja. Natenepa, ine ndakakamizika toera kucitambo phwando ikulu kupiringana ale adacita iwo.” Ninji pinafuna kuphedza ale anafuna kumanga banja toera akunde pinentso pyenepi na pinango?
15. Thangwi yanji ndi pyakufunika kucita phembero thangwi ya masasanyiro a ntsiku yakumanga banja?
15 Citani phembero thangwi ya masasanyiro anu akumanga banja. Imwe munakwanisa kucita phembero kuna Yahova thangwi ya pinentso piri na imwe na kumpanga pyonsene pinanyerezera imwe. (Afil. 4:6, 7 na nota de estudo yakuti “em tudo”) Imwe munakwanisa kuphemba Yahova toera akuphedzeni kucita pisankhulo pyadidi, kukhala wakukhurudzika mungadzudzumika na kupangiza cipapo pingafunika. (1 Ped. 5:7) Mungaona kuti Yahova ali kutawira maphembero anu, cinyindiro canu kuna iye cinathimizirika. Tabitha, alonga: “Ine na mamunanga tikhagopa kukhonda kubverana, pontho tikhagopambo kukhonda kubverana na acibale athu. Natenepa, ndzidzi onsene ukhakhunganyika ife ntsiku yathu yakumanga banja, tikhatoma na phembero. Ife takwanisa kuona kuti Yahova atiphedza, pontho tikhali na ntendere.”
16-17. Thangwi yanji ndi pyakufunika kucedza mwadidi pakucita masasanyiro a ntsiku yakumanga banja?
16 Cedzani mwadidi na mwacilemedzo. (Mis. 15:22) Imwe munafunika kucita pisankhulo pizinji thangwi ya ntsiku yanu yakumanga banja. Pyenepi pisaphataniza kusankhula ntsiku, kobiri inafuna imwe kuphatisira, anthu anafuna imwe kucemera na pinthu pinango pizinji. Mbamudzati kucita cisankhulo, cedzani thangwi ya pinthu pinanyerezera imwe, pontho thangwi ya pinthu pinalonga Bhibhlya thangwi ya pyenepi. Kusiyapo pyenepi, nyerezerani uphungu wa abale na alongo akukola mwauzimu na a maluso. Pakulonga thangwi ya pinthu pinanyerezera imwe, khalani waufuni, wakulinganira, pontho khalani dzololo toera kucinja pingafunika. Mwacitsandzo, anyakubalanu angaphemba cinthu, pontho khala pinakwanisika kucita pinaphemba iwo, piciteni. Ntsiku ineyi ndi yakupambulikambo kuna iwo. Khala nee pinakwanisika kucita pinaphemba iwo, fokotozani pyenepi mwaufuni na mwacilemedzo. (Akol. 4:6) Pangani acibale anu kuti cifuniro canu cikulu ndi cakuti ntsiku yanu yakumanga banja ikhale yakutsandzayisa, pontho ipase mbiri Yahova.
17 Khala anyakubalanu nee ali mu undimomwene, panango pinakhala pyakunentsa kakamwe kulonga nawo thangwi ya pinthu pinafuna imwe kucita. Mbwenye imwe munakwanisa kuapanga maonero anu mwaufuni. M’bale Santhosh wa ku Indiya, alonga: “Acibale athu akhafuna kucita misambo mizinji ya uphemberi wa Hindu pa phwando yathu. Ine na nkazanga takwata ndzidzi uzinji mbatikaafokotozera pisankhulo pyathu. Tacita macinjo mu pinthu pidaona ife kuti mbapidakwanisika, mbwenye mbatikhonda kutsukwalisa Yahova. Mwacitsandzo, tacinja pikhafuna ife kudya toera tidye pinthu pyakuti iwo asakomerwa napyo. Pontho tasankhula kukhonda kuimba na kubvina, thangwi iwo nee adzolowera pinthu pyenepi.”
18. Munacitanji toera pinthu pifambe mwadidi pa ntsiku yanu yakumanga banja? (1 Akorinto 14:40) (Onanimbo foto.)
18 Citani mwadidi masasanyiro a ntsiku yakumanga banja. Mungacita mwadidi masasanyiro, panango nee munadzudzumika kakamwe pa ntsiku yanu yakumanga banja. (Lerini 1 Akorinto 14:40.) Wayne wa ku Taiwan, alonga: “Pikhali ife dhuzi na ntsiku yathu yakumanga banja, tacedza na anthu akhadaperekeka toera kutiphedza. Ife tacedza thangwi ya masasanyiro adacita ife, pontho tayesera makhundu anango a ntsiku yakumanga banja toera tikhale na cinyindiro cakuti pyonsene pinafamba mwadidi.” Kusiyapo pyenepi, toera kupangiza cilemedzo kuna ale anacemera imwe, citani pyonsene pinakwanisa imwe toera pyonsene picitike pa ndzidzi udakhazikisa imwe.
Kukhunganyika mwadidi ntsiku yakumanga banja mbidzati kufika kunaphedza toera pinthu pifambe mwadidi ntsiku ineyi (Onani ndima 18)
19. Ninji pinafuna kukuphedzani toera pinthu pifambe mwadidi pa ntsiku yanu yakumanga banja?
19 Nyatwa zizinji zinakwanisa kucalirwa, mungakhunganyika nakweru. (Mis. 22:3) Mwacitsandzo, khala imwe musakhala mucisa cakuti kazinji kene anthu akuti nee acemerwa asabwera pa phwando yakumanga banja, nyerezerani pinafunika imwe kucita toera kucalira pyenepi. Khalani na cinyindiro cakuti acibale anu onsene akuti nee ali mu undimomwene asadziwa pinthu pinafuna kucitika pa phwando, pontho apangeni maonero anu thangwi ya misambo inango inacitwa pa phwando yakumanga banja. Imwe munakwanisa kuapangiza nsolo wakuti “Como é que são os casamentos das Testemunhas de Jeová?” unagumanika mu jw.org. Toera kuti pinthu pifambe mwadidi pa ntsiku yanu yakumanga banja, imwe munakwanisa kuphemba m’bale wakukola mwauzimu toera akhale “muimiriri wa phwando.” (Juw. 2:8) Mungampanga mwadidi pinafuna imwe kuti picitike pa phwando yanu, iye anakwanisa kukuphedzani toera pinthu picitike mwakubverana na pinafuna imwe, pontho toera phwando yanu ikhale yakulemedzeka.
20. Ale anafuna kumanga banja asafunika kukumbukanji thangwi ya ntsiku yawo yakumanga banja?
20 Pakumala kuona masasanyiro onsene a ntsiku yakumanga banja anafunika kucitwa, panango munagopa. Mbwenye kumbukani kuti ntsiku yakumanga banja basi ene ndi ibodzi. Iyo ndi ntsiku yakutoma ya umaso wadidi unafuna kukhala na imwe mbamukatumikira Yahova pabodzi. Citani pyonsene pinakwanisa imwe toera mukhale na pinthu pyakucepa pa ntsiku yanu yakumanga banja, pontho ikhale yakuthema. Nyindirani Yahova. Na citsogolero cace, imwe munakwanisa kucita masasanyiro a ntsiku yanu yakumanga banja. Pontho mukupita kwa ndzidzi mungakumbuka pidacitika, pinakhala pyadidi kakamwe, pyakutsandzayisa mbamukhonda kutsumbikika.—Mas. 37:3, 4.
NYIMBO 107 Mulungu Atipasa Citsandzo Toera Kupangiza Ufuni
a MABVEKERO A MAFALA ANANGO: M’mbuto zinango, kumanga banja kusaphataniza nsonkhano wakuti ale anafuna kumanga banja asacita dumbiro pamaso pa Mulungu yakuti anakhala pabodzi kwenda na kwenda. Anango asasankhula kucita phwando pabodzi na axamwali awo na acibale awo. Ale akuti ali m’mbuto zakuti kazinji kene nee kusacitwa nsonkhano peno phwando yakumanga banja asafunikambo kubvera pinalonga Bhibhlya pa ntsiku yawo yakumanga banja.
b Toera kudziwa pinango thangwi ya pinacita Akristu toera kubvera mitemo yakumanga banja, onani nsolo wakuti “Casamentos honrosos à vista de Deus e do homem” mu Sentinela 15 de Outubro de 2006.
c Onani mu jw.org vidhyu ya nsolo wakuti Kodi Panadzakhala na Pyakumwa Pyakuledzeresa?