Khundu 8
Cifuniro Ca Mulungu Ciri Cifupi Na Kukwanirisika
1, 2. Kodi Mulungu asacita tani masasanyiro towera kumalisa nyatwa?
UTONGI wa anthu akupanduka na mademonyo ukusikimiza banja ya anthu m’madzana a piaka. Mbwenye Mulungu nee asaduwala nyatwa zathu tayu. Mbuto mwa pyenepi, nkati mwa madzana onsene anewa a piaka, iye asacita masasanyiro towera kupulumusa anthu m’uipi na m’nyatwa.
2 M’nzidzi wa upanduki m’Edeni, Mulungu atoma kupangiza cifuniro cace ca kuikha utongi wakuti mbudadzacita dziko ino yapantsi kukhala mudzi wa anthu wa paradizu. (Genesi 3:15) Patsogolo pace, ninga nyakulonga wankulu wa Mulungu, Yezu acita utongi unoyu wa Mulungu ukhafuna kudza kukhala nsolo wa cipfunziso cace. Iye alonga kuti unoyu mbudakhala cidikhiro cibodzi basi ca anthu.—Danyele 2:44; Mateo 6:9, 10; 12:21.
3. Kodi Yezu athula tani utongi ukhafuna kudza towera kutonga dziko yapantsi, na thangwi yanji?
3 Yezu athula utongi unoyu wa Mulungu ukhafuna kudza kuti ndi “dziko [peno umambo] ya kudzulu,” thangwi iwo mbudatonga kubulukira kudzulu. (Mateo 4:17) Iye authulambo kuti ndi “dziko [peno umambo] ya Mulungu,” thangwi Mulungu ndi Ntomesi wawo. (Luka 17:20) Nkati mwa madzana a piaka Mulungu apepesera alembi ace kuti alembe maprofesiya a pya ale akuti mbadacita khundu ya utongi unoyu na pire pinafuna kudzacitwa na utongi unoyu.
Mambo Mupswa Wa Dziko Yapantsi
4, 5. Kodi Mulungu apangiza tani kuti Yezu akhali Mambo adasankhulwa na iye?
4 Cifupi na piaka pikwi piwiri pidamala, Yezu akwanirisa maprofesiya mazinji analonga pya ule akhafuna kudzakhala Mambo wa Umambo wa Mulungu. Iye apangizika kukhala ule adasankhulwa na Mulungu towera kukhala Ntongi wa utongi wakudzulu unafuna kudzatonga anthu. Mudamala iye kufa, Mulungu alamusa Yezu muli akufa towera akakhale maso kudzulu ninga cakucitwa cauzimu camphambvu na cokhonda kufa. Pakhali anthu azinji adaona kulamuswa kwace muli akufa.—Machitiro 4:10; 9:1-9; Aroma 1:1-4; 1 Akorinto 15:3-8.
5 Buluka penepo Yezu ‘akhala pa nkononkono wa Mulungu.’ (Ahebere 10:12) Penepo iye adikhira nzidzi ukhafuna Mulungu kumpasa mphambvu towera kuphata basa ninga Mambo wa Umambo wakudzulu wa Mulungu. Pyenepi pyakwanirisa profesiya idalembwa pa Masalmo 110:1, panalonga Mulungu kuna Yezu tenepa: “Khala pa nsonkhano [‘nkononkono,’ Tradução do Novo Mundo] wanga! Ndinayikha anyamalwa ako pantsi pa manyalo pako.”
6. Kodi Yezu apangiza tani kuti athema kukhala Mambo wa Umambo wa Mulungu?
6 Mukhakhala iye pa dziko yapantsi, Yezu apangiza kuti athema kukhala na ciimiriro ceneci. Maseze atcingwa, iye asankhula kukoya umumphu wace kwa Mulungu. M’kucita pyenepi, apangiza kuti Sathani alonga uthambi mudalonga iye kuti nkhabepo munthu wakuti mbadakhala wakukhulupirika kwa Mulungu angayesiwa. Yezu, munthu waungwiro, ‘Adamu waciwiri,’ apangiza kuti Mulungu hadadodomeka tayu m’kucita anthu aungwiro.—1 Akorinto 15:22, 45; Mateo 4:1-11.
7, 8. Kodi ndi pinthu pipi pyadidi pidacita Yezu mukhakhala iye pa dziko yapantsi, na iye apangizanji?
7 Kodi ndi ntongi upi adacita pinthu pizinji pyadidi ninga pidacita Yezu m’piaka pang’ono basi pya utumiki wace? Nakuti apaswa mphambvu na nzimu wakucena wa Mulungu, Yezu awangisa atenda, anyakulamala, maboliboli, madrodro na mabewewe. Iye alamusambo anyakufa! Iye apangiza pang’ono basi pinafuna kudzacitira iye anthu mwakuthimizirika angabwera m’mphambvu ya Umambo.—Mateo 15:30, 31; Luka 7:11-16.
8 Yezu acita pinthu pizinji pyadidi mukhakhala iye pa dziko yapantsi kwakuti nyakupfunzace Jwau alonga: “Piripo pinthu pinango pizinji pidachita Yezu. Ine ndinanyerezera kuti anthu mbadafuna kupilemba pyonsene, pantsi ponsene mbapadachepa towera kukoya [mabukhu] ache onsene.”—Jwau 21:25.a
9. Thangwi yanji anthu akuona ntima aenda kwa Yezu?
9 Yezu akhali wadidi na wakubvera ntsisi, na akhafuna kakamwe anthu. Iye aphedza acerengi na anyakupfinyirirwa, mbwenye iye hadapwaza anyakupfuma peno anthu aciimiriro capadzulu. Anthu akuona ntima atawira ncemerero wakufuna wa Yezu mudalonga iye: “Bwerani kuna ine, imwe mwonsene akuneta na anyakulemerwa, inembo ndinadzakupumisani. Kwatani ntolo wanga, mbamupfundza kwa ine thangwi ndinawo ntima wadidi na wakukhurudzika, mbamudzagumana ntendere mu mitima mwanu, thangwi ntolo wanga ngwakusemiwa, nsekete wanga ngwakululupa.” (Mateo 11:28-30) Anthu akugopa Mulungu aenda kwa iye mbadikhira utongi wace.—Jwau 12:19.
Anyakutonga Anzace
10, 11. Kodi mbani anafuna cita khundu na Yezu m’kutonga dziko yapantsi?
10 Tenepa ninga mautongi a anthu ali na anyakutonga anzawo, Umambo wakudzulu wa Mulungu uli nawombo. Kusiyapo Yezu alipo anango akuti anadzacita nkhundu m’kutonga dziko yapantsi, thangwi Yezu apikira axamwali ace apantima kuti iwo anadzatonga anthu pabodzi na iye ninga amambo.—Jwau 14:2, 3; Apokalipse 5:10; 20:6.
11 Natenepa, pabodzi na Yezu, cilengesero cakucepa ca anthu cisalamuswambo muli akufa towera kakhala maso kudzulu. Iwo asacita khundu ya Umambo wa Mulungu wakuti unadzabweresa nkhombo zokhonda mala kwa anthu. (2 Akorinto 4:14; Apokalipse 14:1-3) M’njira ineyi, nkati mwa piaka pizinji, Yahova asaikha phata ya utongi wakuti unadzabweresa nkhombo zokhonda mala kwa banja ya anthu.
Kutongereka Kunamala
12, 13. Kodi Umambo wa Mulungu uli dzololo towera kucitanji?
12 M’ntsiku zathu zino Mulungu ali kutonga pinthu pya pantsi pano. Ninga munafuna kudzalonga Khundu 9 ya bruxura ino, profesiya ya Biblya isapangiza kuti Umambo wa Mulungu pantsi pa Kristu waikhwa m’caka 1914 na cincino uli dzololo towera kufudza makhaliro onsene a Sathani. Umambo unoyu uli dzololo towera ‘kutonga anyamalwa [a Kristu].’—Masalmo 110:2.
13 Thangwi ya pyenepi profesiya ya Danyele 2:44 isalonga: “M’ntsiku za atongi ale [anagumanika cincino] Mulungu wakudzulu anadzaikha umambo [kudzulu] wakuti cipo unadzafudzwa, na utongi wawo ukulu nee unadzapaswa anthu anango tayu [utongi wa anthu cipo unadzatawiriswa pontho]. Iwo [Umambo wa Mulungu] unadzanyedza maumambo anewa onsene na mbuamalisa, na unoyu unadzakhala kwenda na kwenda.”—Imprensa Bíblica Brasileira.
14. Kodi ndi api mangasi a maphindu anafuna bwera utongi wa anthu ungamala?
14 Mautongi onsene anakhonda utongi wa Mulungu angamala kufudzwa, Umambo wa Mulungu unadzatonga mwakukwana dziko yapantsi. Nakuti Umambo usatonga kubulukira kudzulu, iwo cipo unadzaipiswa na anthu. Mphambvu ya kutonga inadzakhala pakhakhala iyo pakutoma, kudzulu, na Mulungu. Nakuti utongi wa Mulungu unadzatonga dziko yonsene yapantsi, nee munthu mbodzi anadzanyengetwa pontho na mauphemberi aunthawatawa peno mafilozofiya a anthu na manyerezero andale okhonda komeresa. Nee cibodzi mwa pinthu pyenepi cinadzalekererwa pontho.—Mateo 7:15-23; Apokalipse, kapitulu 17 mpaka 19.
[Pidzindikiro pyapantsi]
a Towera kudziwa pizinji pya umaso wa Yezu, onani bukhu yakuti O Maior Homem Que Já Viveu, idabuluswa m’caka 1991 na Sociedade Torre de Vigia.
[Foto pa tsamba 18]
Mukhakhala Yezu pa dziko yapantsi awangisa atenda na alamusa anyakufa towera kupangiza pinafuna kudzacita iye m’dziko ipswa
[Foto pa tsamba 19]
Umambo wakudzulu wa Mulungu unadzamalisa mitundu yonsene ya utongi unankhonda