Pfunziro 3

Kodi Yezu Kristu Mbani?

Thangwi yanji Yezu asacemerwa Mwana “wautombo” wa Mulungu? (1)

Thangwi yanji iye asacemerwa “Fala”? (1)

Thangwi yanji Yezu abwera pa dziko yapantsi ninga munthu? (2-4)

Thangwi yanji iye acita pirengo? (5)

Kodi Yezu anadzacitanji patsogolo apa? (6)

1. Yezu akhala kudzulu ninga munthu wauzimu mbasati bwera pa dziko yapantsi. Iye akhali cakucitwa cakutoma ca Mulungu, natenepa iye asacemerwa Mwana “wautombo” wa Mulungu. (Akolose 1:15, Mphangwa Zadidi; Apokalipse 3:14) Yezu ndi Mwana m’bodzi basi adacita Mulungu ekhene. Yahova aphatisira Yezu ninga ‘mphedzi’ peno mesiri wace wa basa mbasati kubalwa ninga munthu towera kucita pinthu pinango pyonsene kudzulu na pa dziko yapantsi. (Misangani 8:22-31; Akolose 1:16, 17) Pontho Mulungu amphatisira ninga nyakulonga Wace wankulu. Ndi thangwi yace Yezu asacemerwa “Fala.”—Jwau 1:1-3; Apokalipse 19:13.

2. Mulungu atuma Mwanace kubwera pa dziko yapantsi mu kuikha umaso wace m’mimba mwa Mariya. Natenepa Yezu nee akhali na baba waumunthu tayu. Ndi thangwi yace iye hadatambira tayu madawo peno kusowa ungwiro. Mulungu atuma Yezu kubwera pa dziko yapantsi thangwi ya mathangwi matatu: (1) Towera kutipfunzisa undimomwene wakulonga pya Mulungu (Jwau 18:37), (2) towera kukoya umumphu waungwiro, mbasiya matowezero towera tiatowezere (1 Pedro 2:21), na (3) towera kupereka umaso wace kuti atiombole ku madawo na kufa. Thangwi yanji pyenepi pikhali pyakufunika?—Mateo 20:28.

3. Mu kukhonda kubvera ntemo wa Mulungu, munthu wakutoma, Adamu, acita pinacemera Biblya “madawo.” Natenepa Mulungu antonga kuti afe. (Genesi 3:17-19) Iye asiya kukwanirisa mitemo ya Mulungu, natenepa iye aleka kukhala waungwiro. Pang’ono na pang’ono iye akalamba mbafa. Adamu athapulisa madawo anace onsene. Ndi thangwi yace ifembo tisakalamba, tisaduwala, na tisafa. Kodi anthu mbadakwanisa tani kupulumuswa?—Aroma 3:23; 5:12.

4. Yezu akhali munthu waungwiro tenepa ninga Adamu. Mbwenye, mwakusiyana na Adamu, mu njira yaungwiro Yezu abvera Mulungu ngakhale pantsi pa nyatwa ikulu kakamwe. Iye mbadakwanisa tenepa kupereka umaso wace waungwiro waumunthu towera kulipa madawo a Adamu. Pyenepi ndi pinacemera Biblya ‘ciomboli.’ Natenepa ana a Adamu mbadakwanisa kusudzulwa ku kutongwa kufa. Onsene anakhulupira Yezu angakwanise kulekererwa madawo awo na kutambira umaso okhonda mala.—1 Timoti 2:5, 6; Jwau 3:16; Aroma 5:18, 19.

5. Pikhakhala Yezu pa dziko yapantsi awangisa anyakuduwala, adyesa anjala na alimirisa pyonzi. Ngakhale iye alamusa anyakufa. Thangwi yanji iye acita pirengo? (1) Iye akhabvera ntsisi anthu akhathabuka na akhafuna kuaphedza. (2) Pirengo pyace pyapangiza kuti iye akhali Mwana wa Mulungu. (3) Pyapangiza pinafuna kudzacita iye kwa anthu akubvera mu nzidzi wakutonga kwace dziko yapantsi ninga Mambo.—Mateo 14:14; Marko 2:10-12; Jwau 5:28, 29.

6. Yezu afa na alamuswa muli akufa na Mulungu ninga cakucitwa cauzimu, na iye abwerera kudzulu. (1 Pedro 3:18) Kutomera mu nzidzi uneule, Mulungu amuikha ninga Mambo. Mwakukhonda dembuka Yezu anadzabulusa kuipa konsene na nyatwa zonsene pa dziko ino yapantsi.—Masalmo 37:9-11; Misangani 2:21, 22.

[Mafoto pa tsamba 7]

Utumiki wa Yezu ukhaphataniza kupfunzisa, kucita pirengo, ngakhale kupereka umaso wace thangwi ya ife