Ninji Cinaphedza Banja Toera Ikhale Yakutsandzaya?

BHIBHLYA ISALONGANJI?

“Anyakutsandzaya ndi ale anabva mafala a Mulungu mbaaphatisira!” —Luka 11:28, Bhibhlya ya Dziko Ipswa.

THANGWI YANJI MPHYADIDI KUDZIWA PYENEPI?

Kubvera pinalonga Bhibhlya, kunaphedza banja toera ikhale na . . .

Ufuni wandimomwene.—Aefesi 5:28, 29.

Kulemedzana mwadidi.—Aefesi 5:33.

Kunyindirana kakamwe.—Marko 10:6-9.

TINAKWANISADI KUKHULUPIRA PINALONGA BHIBHLYA?

Inde, pana mathangwi mawiri:

• Mulungu ndiye Adatomesa banja. Bhibhlya isalonga kuti Yahova Mulungu “ndiye adapasa dzina mabanja onsene.” (Aefesi 3:14, 15) Pyenepi pisabveka kuti ndi Yahova adacitisa kuti paoneke mabanja. Thangwi yanji mphyadidi kudziwa pyenepi?

  Nyerezerani kuti imwe mwadya cakudya cakukoma kakamwe, khala musafuna kudziwa kuti caphikwa tani, munabvundzisa ani? Mwakukhonda penula, munabvundzisa munthu adaciphika.

  Munjira ibodzi ene, toera tidziwe pinthu pinacitisa banja kukhala yakutsandzaya, tisafunika kusaka ciphedzo ca Yahova, thangwi ndiye Adatomesa banja.​—Genesi 2:18-24.

• Mulungu asatifuna. Uphungu wadidi kakamwe toera kuphedza mabanja usagumanika m’Bhibhlya. Thangwi yanji? Thangwi uphungu unoyu usabuluka kuna Yahova, pontho ‘iye asatitsalakana.’ (1 Pedhru 5:6, 7) Yahova asafuna kuti tikhale akutsandzaya, pontho uphungu wace usaphedza ndzidzi onsene!​—Misangani 3:5, 6; Izaiya 48:17, 18.