Mulungu Acita Mamuna na Nkazi Wakutoma

Yahova acita munda wa Edheni. Munda unoyu ukhadadzala na maluwa, miti na pinyama. Buluka penepo, Mulungu akwata pfumbi ya mataka mbacita mamuna wakutoma, Adhamu, mbapepesa mphuno mwace muya wa umaso. Usadziwa ninji pidacitika? Mamuna unoyu adzakhala na umaso! Yahova apasa Adhamu basa yakutsalakana munda na kupasa madzina pinyama pyonsene.

Pontho Yahova apasa Adhamu ntemo uyu wakufunika kakamwe: ‘Unakwanisa kudya misapo ya miti yonsene kusiyapo nsapo wa muti ubodzi wakupambulika. Ungadya nsapo wa muti unoyu, iwe unadzafa.’

Buluka penepo, Yahova alonga: ‘Ndinacitira Adhamu nyakum’phedza.’ Natenepa, Yahova acitisa Adhamu kugona citulo cikulu kakamwe, pontho am’bulusa mbabvu ibodzi mbancitira nkazi. Nkazi unoyu akhacemerwa Eva. Adhamu na Eva adzakhala banja yakutoma. Kodi Adhamu akomerwa na nkazi adapaswa iye? Inde! Iye akomerwa kakamwe mbalonga: ‘Ndatsandzaya kakamwe thangwi Yahova aphatisira mbabvu yanga toera kundicitira nkazi! Cincino ndiri na munthu wakulandana na ine.’

Yahova apanga Adhamu na Eva toera abale ana na kudzadza dziko yapantsi. Iye akhafuna kuti iwo aphate basa pabodzi mwakutsandzaya toera kucitisa dziko yonsene yapantsi kukhala paraizu, peno kukhala mbuto yakubalika kakamwe ninga munda wa Edheni. Mbwenye dziko yapantsi nee yadzakhala paraizu. Thangwi yanji? Tinadzaona pyenepi mu nsolo unatowera.