Khalani Wakupirira

Yezu Acitanji?

VIDHYU: Mwakupirira Yezu Aphedza M’bale Wace

1. Onani VIDHYU, peno lerini Juwau 7:3-5 na 1 Akorinto 15:3, 4, 7. Buluka penepo onani mibvundzo iyi:

1. Kodi pakutoma abale ace Yezu akhaona tani mphangwa zace?

2. Ninji pinapangiza kuti Yezu apitiriza kuphedza m’bale wace, Tiyago?

Tisapfundzanji na Pidacita Yezu?

2. Tisafunika kupirira thangwi anthu anango asakwata ndzidzi toera kutawira mphangwa zadidi.

Towezerani Yezu

3. Yeserani njira zinango. Khala munthu nee atawira mwakucimbiza kupfundza Bhibhlya, lekani kunkakamiza. Pingafunika, phatisirani mavidhyu peno mphangwa zinagumanika m’mabukhu athu toera kuphedza munthu kubvesesa kuti pfundziro ya Bhibhlya isacitwa tani, pontho inam’phedza tani.

4. Lekani kulandanisa. Munthu m’bodzi na m’bodzi ndi wakusiyana na unango. Khala m’bodzi pa banja peno munthu adacitira imwe ulendo wakubwereza akunyinyirika toera kupfundza Bhibhlya peno kutawira pipfundziso pya m’Bhibhlya, onani kuti thangwi yanji. Kodi pana pipfundziso pya uphemberi pinaona iye kuti ndi pyakufunika kakamwe? Kodi iye akutcingwa na acibale ace peno anthu apacisa? Mpaseni ndzidzi toera anyerezere pidalonga imwe, pontho toera aone kufunika kwa mphangwa za m’Bhibhlya.

5. Citani phembero thangwi ya munthu adapangiza cifuno. Phembani Yahova toera akuphedzeni kukhala na cidikhiro, pontho toera mulonge mafala adidi. M’phembeni toera akupaseni luso yakudzindikira ndzidzi wakuthema toera kusiya kucedzera munthu wakuti nee akupangiza maka cifuno.—1 Akor. 9:26.