Longani Na Anango Thangwi Ya ‘Cheza Cha Pantsi Pano’

¹ Kubulukira ku mprofeta Izaiya, Yahova alongeratu: “Anthu akhafamba n’chidima, aona cheza chikulu. Iwo akhakhala ku dziko yakupswipa, mbwenye chinchino ali kumwinikwa na cheza.” (Iza. 9:2) “Cheza chikulu” ceneci caoneka m’mabasa a Mwana ene wa Mulungu, Yezu Kristu. Basa idacita iye mbali pa dziko yapantsi na nkhombo zidabwereswa na kuperekeka kwace ninga ntsembe pyabulusa ale akhakhala m’cidima cauzimu. Ceza ceneci ndi cinafuna anthu m’nzidzi uno wacidima. Cakudya Cancidodo ca Mbuya cisatipasa mwai wakupambulika wa kulonga na anango thangwi ya ‘cheza cha pantsi pano.’ (Jwau 8:12) M’caka cidamala, pikwi pya anthu pyapangiza cikhulupiro m’kugumanyikana na ife m’kubvera ntemo wa Yezu wakuti: “Ipi pichiteni towera mundikumbukire.” (Luka 22:19) Nakuti Cikumbuso ca caka cino ciri kufendedzera duzi, kodi tinadzacita tani khundu m’kulonga na anango thangwi ya ceza cikulu cinacitisa Yahova kuyetima?—Afil. 2:15.

² Kulisani Ntima Wakupereka Takhuta: Nzidzi wa Cikumbuso ndi wakuthema towera kunyerezera kufuna kukulu kudapangiza Yahova na Yezu m’kupereka ntsembe yaciomboli kwa anthu onsene. (Jwau 3:16; 2 Akor. 5:14, 15) Mokhonda penula, kunyerezera kweneku kunadzacitisa ntima wathu kupereka takhuta wankulu kakamwe thangwi ya cakucitika ceneci cakucena. Anthu onsene a Mulungu anadzafunika kukoya nzidzi towera kuleri na kunyerezera malemba a Biblya analonga pya Cikumbuso, anagumanika m’Examine as Escrituras Diariamente. Kunyerezera makhaliro okhonda landanisika a Yahova, akuti asapangizwa mwakulemedzeka m’masasanyiro ace a ciomboli, kusaticitisa kukhala akurunkuma thangwi iye ndi Mulungu wathu. Kunyerezera kuti ciomboli ceneci cisabvekanji kwa mbodzi na mbodzi wa ife kusathimizira kufuna kwathu kukulu Mulungu na Mwanace na kusatikulumiza kuwangisira kucita cifuno ca Mulungu.—Agal. 2:20.

³ Tingakulisa ntima wathu wakupereka takhuta ku masasanyiro a kupulumusa a Yahova, kukomerwa kwathu na Cikumbuso kunadzakhuya anyakupfunza a Biblya, maulendo athu akubwerezera, acibale athu, anyakuendekana athu, anzathu a kuxikola, anzathu a kubasa na anango anacemerera ife ku cakucitika ceneci cakupambulika. (Luka 6:45) Natenepa, wangisirani kakamwe kucemerera anthu anewa onsene, m’kuapasa ncemerero wakudindwa wa Cikumbuso towera akwanise kukumbuka ntsiku ineyi. Towera akhonde duwala nee munthu mbodzi, azinji asalemba madzina a ale anacemerera iwo ku Cikumbuso m’nzidzi onsene, mbathimizira anthu apswa caka na caka. Kukhunganyika m’njira ineyi pabodzi na kucita pyonsene pinakwanisa ife towera kucemerera ale anafuna ndi njira yadidi ya kupangiza kupereka kwathu takhuta kwa Yahova Mulungu “thangwi ya pyonsene pidatipasa [iye] pinachimwanika kulongwa.”—2 Akor. 9:15.

⁴ Thimizirani Nzidzi Unabvunga Imwe M’utumiki: Kodi mungakwanise kuthimizira nzidzi unabvunga imwe m’utumiki nkati mwa nthanda ya Murope na Bwinja? Mulungu anadzapasadi nkhombo kuwangisira kwanu kugawana na anango ‘mphangwa zadidi za mbiri ya Kristu.’ Yahova, ninga Ncera wa ceza consene cauzimu, apereka ntemo: ‘Cheza mbicioneke mu chidima.’ (2 Akor. 4:4-6) Pingakhala pyakufunika, akulu ampingo anadzacita masasanyiro kuti paoneke misonkhano ya utumiki wa m’munda m’midzidzi inango na m’mbuto zinango, mbaitsogolera towera kuphedza amwazi mphangwa anafuna kubvunga nzidzi uzinji m’utumiki. Pyenepi pingaphatanize kupereka umboni m’miseu nakweru peno masasanyiro akupereka umboni m’cisa camalonda na kupereka umboni m’kuphatisira ntokodzi namaulo peno m’cidodo. Ninga ciphedzo towera muthimizire nzidzi unafuna bvunga imwe m’utumiki, sankhulani midzidzi yakukwanisika inafuna imwe kubvunga, na wangisirani kuikwanirisa. Kwa azinji, kupasa Yahova pinakwanisa iwo kucita kusaphataniza kuphatisira mwai wa kutumikira ninga mpainiya wakuphedza.—Akol. 3:23, 24.

⁵ Kodi Mungakwanise Kutumikira Ninga Mpainiya Wakuphedza? Papita piaka pinomwe kutomera padapungulwa midzidzi inaphembwa kwa apainiya akuphedza mpaka lero. Kucinja kweneku kusacitisa kuti azinji akwanise kutsanzaya na nkhombo za kutumikira ninga apainiya akuphedza. Kodi imwe mwatoma yesera pyenepi? Anango ali na nsambo wakucita pyenepi caka na caka. M’mipingo izinji amwazi mphangwa azinji asapita pabodzi m’njira ineyi ya kutumikira, na pyenepi pisaphindulisa basa ya mpingo nkati mwa caka ceneci. Kodi mungakwanise kusankhula nthanda inaona imwe kuti ndi yadidi towera kutumikira ninga mpainiya wakuphedza nkati mwa nzidzi wa Cikumbuso? Kwa anango nthanda ya Bwinja ndi yadidi kakamwe thangwi ina masabudu na madimingu maxanu.

⁶ Kodi mpingo wanu unadzacezeswa na muyang’aniri wa cisa nkati mwa nthanda ya Murope na Bwinja? Unoyu ndi mwai unango kwa imwe. Ninga pyadziwiswa kale, m’caka ca basa ca 2006, onsene anatumikira ninga apainiya akuphedza nkati mwa nthanda inafuna muyang’aniri wa cisa kudzacezesa mpingo anadzacemererwa kuti agumanike pa khundu yakutoma ya nsonkhano unacitirwa apainiya nkati mwa sumana yakucezeswa. Mokhonda penula, mphangwa zakuwangisa mwauzimu zinapaswa pa nsonkhano unoyu zinadzaphedza apainiya azinji akuphedza kufuna khala apainiya anzidzi onsene. Mwakuthimizira, nkati mwa nthanda ya Murope tinadzatsanzaya na kuphedza anthu kupita m’ceza cauzimu m’kuphatisira bukhu ipswa ya pfunziro yakuti Kodi Mwandimomwene Biblya Isapfunzisanji? Thangwi yanji imwe nkhabe saka kutomesa pfunziro ya Biblya m’bukhu ineyi ipswa?

⁷ Munanyerezera imwe midzidzi 50 inaphembwa kwa apainiya akuphedza, sankhulani ndandanda unafuna kukuphedzani kucita cifupi na midzidzi 12 pa sumana m’kulonga pya undimomwene. Longani pyenepi na ale adapembera m’kutumikira m’njira ineyi, pabodzi na anangombo. Pyenepi pingakwanise kuawangisa kupita m’upainiya wakuphedza. M’kucita masasanyiro adidi, amwazi mphangwa akubatizwa, aphale na atsikana pabodzi na akulu, aona kukhala kwakukhonda nensa kupita m’utumiki unoyu wakusimbika. Phemberani thangwi ya pyenepi. Buluka penepo, pingakwanisika, citani masasanyiro anu, na tsanzayani na upainiya wakuphedza!—Mal. 3:10.

⁸ Mabanja azinji aona kuti kuphedzana mwadidi kungacitise kuti ciwalo cibodzi ca banja cikwanise kukhala mpainiya wakuphedza. Banja ibodzi yatonga kuti piwalo pyonsene pixanu pyakubatizwa pipite m’upainiya wakuphedza. Ana anango awiri akukhonda batizwa awangisira kuthimizira utumiki wawo. Kodi banja ineyi yaphindula tani na kuwangisira kweneku kwakuthimizirika? Iwo alemba: “Ineyi ikhali nthanda yakukomeresa, na tabva kuti kuphatana kwa banja kwawangiswa. Tikupereka takhuta kwa Yahova thangwi ya nkhombo ineyi yakudzumatirisa!”

⁹ Kodi basa yathu yakupambulika nkati mwa nthanda ya Murope na Bwinja inadzakhala yakuwangisa, mbiticitisa kufendedzera duzi kakamwe kwa Baba wathu wakudzulu? Kupembera kwathu kunadzanyindira kuwangisira kwa mbodzi na mbodzi wa ife towera kuthimizira kufuna kwathu Mulungu na Mwanace na kuthimizira nzidzi unabvunga ife m’utumiki. Kutonga kwathu kukhale sawasawa na kwa nyamasalmo, adaimba: “Ndinachita Mbuya takhuta wankuludi, mbandinsimba mu nsonkhano wa anthu.” (Sal. 109:30) Yahova anadzapasa nkhombo basa yathu yaphinga m’nzidzi uno wa Cikumbuso. Natenepa, tendeni ticitise ceza cikulu kuyetima towera anthu azinji akwanise kubuluka m’cidima ‘mbakhala na chedza chakukhalirathu [‘ca umaso,’ Tradução do Novo Mundo].’—Jwau 8:12.

[Study Questions]

1. Kodi ndi ceza cipi cikulu cidalongerwatu m’Mafala a Mulungu, na ndi cakucitika cipi cinacitisa anthu kunyerezera makamaka ceza ceneci?

2. Kodi tinakwanisa tani kucitisa ntima wathu kupereka takhuta wankulu kakamwe thangwi ya ntsembe yaciomboli, na pyenepi pinadzabweresanji?

3. Kodi tinakwanisa tani kupangiza kupereka kwathu takhuta ku Cikumbuso?

4. Kodi ndi ninji cinafuna kutiphedza kuthimizira nzidzi unabvunga ife m’utumiki nkati mwa nthanda ya Murope na Bwinja?

5. Kodi azinji asaphindula tani na kupungulwa kwa midzidzi inaphembwa kwa apainiya akuphedza?

6. Kodi ndi masasanyiro api akukomeresa adacitwa?

7, 8. (a) Kodi ndi ninji cakuti cingakwanise kutiphedza kucita ndandanda towera kutumikira ninga mpainiya wakuphedza? (b) Kodi kuphedzana kwa piwalo pya banja kusafungula njira zipi, na banja yonsene isaphindula tani na pyenepi?

9. Kodi tinacitisa tani kuti ceza cathu ciyetime nkati mwa nzidzi uno wa Cikumbuso?