Basa Ya Dziko Yonsene Yapantsi Ya Kudziwisa Nsonkhano Wa Gawo Wakuti “Kupulumuswa Kuli Cifupi!”

Amwazi Mphangwa A Mpingo Ubodzi Na Ubodzi Asafunika Kugawira Ncemerero Wakupambulika

¹ Kutomera pa nthanda zino zakutoma za caka ca 2006 mpaka ku mala kwa misonkhano ya gawo m’dziko yonsene yapantsi, panadzacitwa basa ya kugawira ncemerero wakupambulika towera kudziwisa misonkhano ya gawo inafuna kudzacitwa m’madziko akukwana 155. Basa ineyi inadzaphataniza misonkhano ya gawo yakupambulika inafuna kudzacitwa ku Alemanha, República Checa na Polônia kutomera pa nthanda ya Maluwa mpaka sumana ya kutoma ya nthanda ya Malimwe ya 2006.

² Nakuti tiri kunkhomo kwa ntsiku zakumalisa, misonkhano ineyi ya gawo, yakuti inadzagomezera pikiro ya Mulungu yakutisudzula ku makhaliro ano akuipa, inadzatsanzayisa kakamwe anthu a mitima yadidi. Mphangwa za nsonkhano wa gawo zisafunika kuawangisa kunyerezera pinafuna kudzacitika kutsogolo. Towera kupasa mamiliyau a anthu mwai wa kubvesera mphangwa zakuthondolesa na zakupasa cidikhiro, mipingo ya Mboni za Yahova yakupiringana 98.000 m’dziko yonsene yapantsi ikudembeterwa kucita khundu mwakukomerwa m’kudziwisa nsonkhano wa gawo unacemererwa anthu anewa.

³ Mipingo inadzatambira micemerero yakukwana towera mmwazi mphangwa mbodzi na mbodzi akwanise kutambira micemerero yakukwana 50. Micemerero yakusala ingakwanise kuphatisirwa na apainiya a pa mpingo. Mpingo ubodzi na ubodzi unadzatoma kugawira kweneku angasala masumana matatu nsonkhano wa gawo unafuna kuenda mpingo unoyu mbusati citika. Pyenepi pinadzapasa nzidzi wakukwana towera kugawira ncemerero khundu ikulu ya cisa peno cisa consene ca mpingo.

⁴ Tikudembeterwa kuti ife ene tipase ncemerero unoyu mwanaciro nyumba mbodzi na mbodzi pingakwanisika. Mbwenye anango angakhonda gumanika pa nyumba, tingakwanise kuikha ncemerero pa nsuwo mwacibisobiso. Tisafunika kuwangisira kakamwe towera tigawire micemerero yonsene nkati mwa masumana matatu.

⁵ Tina cinyindiro cakuti panadzaperekwa umboni ukulu ninga cakubwereswa ca basa ineyi ya dziko yonsene yapantsi ya kudziwisa Nsonkhano wa Gawo wakuti “Kupulumuswa Kuli Cifupi!” ninga pidalembwa pano. Tikuphembera kuti Yahova apase nkhombo zizinji kuwangisira kwanu munacita imwe khundu m’basa ineyi ya dziko yonsene yapantsi.