Kuwangisira Kwa Pa Dziko Yonsene Yapantsi Towera Kudziwisa Nsonkhano Wa Gawo Wakuti “Towererani Kristu!”
Amwazi Mphangwa Anadzagawira Pontho Ncemerero Wakupambulika
1 Basa idacitwa caka cidamala ya kudziwisa Nsonkhano wa Gawo wakuti “Kupulumuswa Kuli Cifupi!” yakhala na maphindu adidi kwa anthu akufuna. Ale adatawira kucemerwa kweneku kwakupambulika mbaenda ku nsonkhano aona okhene kuti Mboni za Yahova zisacita tani phwando yawo yauzimu. (Iza. 65:13, 14 [65:13, NM]) Iwo akomerwa na uxamwali na ubodzi wa ubale wathu Wacikristu. (Sal. 133:1) Towera kuphedza anthu azinji kakamwe pingakwanisika kuti agumanike pa Nsonkhano wa Gawo wakuti “Towererani Kristu!” tinadzacita pontho basa yakugawira ncemerero wakupambulika pa dziko yonsene yapantsi.
2 Maphindu A Caka Cidamala: Mwakubverana na mphangwa zidatambirwa kubulukira ku makhundu onsene a dziko, pakhala na maphindu adidi kakamwe thangwi ya kudziwisa Nsonkhano wa Gawo wakuti “Kupulumuswa Kuli Cifupi!” Ku makhundu mazinji tatambira mphangwa zakukomeresa. Mwacitsanzo, m’nzinda unango, tsamba ya mphangwa inango ikhali na misolo mitanthatu yakulonga pya basa ineyi, mbilonga: “Towera kufikira anthu onsene m’nzidzi wakuthema Mboni zathimizira kuwangisira kwazo kwa kudziwisa anyakuendekana—mbizifamba m’midzidzi mizinji, nsinzo ukulu na kulonga mwakucimbiza.” Kugawira ncemerero mwakubverana kwacitisa kuti pyakupereka mphangwa pikhale pyakufuna kupereka mphangwa ku nzinda unango, mbipidziwisa tenepa mphangwa ku mbuto zizinji. Matsamba akupereka mphangwa akukwana matatu alonga m’njira yakukomeresa pya basa yathu nsonkhano mbusati citika. Nyakulonga mphangwa unango alemba misolo mizinji yakulapha yakuti yadzadza matsamba akupiringana mawiri m’tsamba ya mphangwa ya Ndimingu. Iyo yafokotoza pikhulupiro pyathu, ubale wathu, kugawizwa kwa ncemerero na nsonkhano wa gawo. Mukhalonga m’mwazi mphangwa m’bodzi pa nsuwo pya ncemerero, mwanaciro nyumba angwanda mafala, mbalonga, “Inde. Ndikhaleri pyenepi cincino pano m’tsamba ya mphangwa!” Mwanaciro nyumba unango alonga: “Ndamala kwene kuleri pya imwe, na mokhonda dembuka imwe mwafika! Unoyu ndi ncemerero wanga?” Buluka penepo nkazi unoyu athimizira, “Pinacita Mboni za Yahova ndi pinthu pyadidi kakamwe.”
3 Anthu azinji akufuna aoniwa mbakafika pa mbuto za nsonkhano na micemerero yawo m’manja. Anthu anango akufuna akhabuluka na miotokala yawo ku mizinda yakutali towera kugumanika pa misonkhano. Kuwangisira kwathu kwacidikhodikho towera kucemera anango kwaphedza kuthimizirika kwa cilengeso ca anyakugumanika, mwacitsanzo ku dziko inango kwakhala na kuthimizirika kwakukwana mapurusento 27 pa nsonkhano unoyu kupiringana anyakugumanika a piaka pidamala.
4 Kumalisa Cisa: Imwe mungakwanise kutoma kugawira ncemerero masumana matatu ntsiku ya nsonkhano wanu mbisati fika. Kuwangisira kusafunika kucitwa towera kumalisa cisa consene ca mpingo. M’mipingo yakuti iri na cisa cikulu, amwazi mphangwa angakwanise kusiya ncemerero mwacibisobiso pa nyumba zokhonda khala na anthu nkati mwa sumana yakumalisa nsonkhano wa gawo mbusati citika. Mipingo isafunika kuwangisira towera kugawira micemerero yonsene idapaswa iwo na kumalisa khundu ikulu kakamwe ya cisa pingakwanisika. Micemerero yakusala ingakwanise kuphatisirwa na apainiya a pa mpingo.
5 Pyakulonga Pa Kugawira Ncemerero: Mungakwanise kulonga pinthu ninga ipi: “Tikucita khundu m’kuwangisira kwa pa dziko yonsene yapantsi towera kugawira ncemerero uyu wa cakucitika cakufunika kakamwe cinafuna kudzaoneka. Iyi ndi tsamba yanu. Unyomonyomo unango munadzaugumana nkati mwa ncemerero unoyu.” Kucita uperekero umboni wacigwagwa, kunadzacitisa kugawira micemerero mizinji. Mbwenye, khala mwanaciro nyumba ana mabvunzo, gulani nzidzi towera kuatawira. Pangaoneka kufuna, lembani na bwererani kwa munthu unoyu mokhonda dembuka.
6 Ndi pyakufunika tani kuti tiwangisire kutowerera Kristu! (Jwau 3:36) Nsonkhano wathu wa gawo unafuna kudza unadzaphedza anyakugumanika onsene kucita pyenepi. Mwandimomwene tingakwanise kudikhira kuti umboni ukulu unadzaperekwa pontho ninga phindu ya kuwangisira kweneku kwa pa dziko yonsene yapantsi towera kudziwisa Nsonkhano wa Gawo wakuti “Towererani Kristu!” Natenepa, khalani aphinga m’kucemerera anthu azinji kakamwe pingakwanisika towera agumanike pa nsonkhano. Nkhombo zizinji za Yahova zikhale na kuwangisira kwanu munacita imwe khundu m’ubodzi unoyu wa basa pa dziko yonsene yapantsi.