Kampanya Yakuti Isabweresa Maphindu

Masumana matatu mbudzati kufika nsonkhano wa gawo, mipingo inadzacita pontho kampanya toera kucemera anthu anapangiza cifuno mu cisa toera kugumanika pa nsonkhano. Pana mathangwi adidi toera kucita kampanya ya caka cino. Ale anatawira ncemerero mbagumanika pa nsonkhano kazinji kene asakomerwa na nkhani zakubuluswa m’Bhibhlya, asatunduswa angaona anthu akuperekeka mbakaphata basa m’madepartamentu, pontho angaona makhaliro adidi na kuphatana kunapangiza ife. (Sal. 110:3; 133:1; Iza. 65:13, 14) Kodi kampanya yathu isabweresa maphindu, makamaka m’mbuto zakuti anthu anapangiza cifuno asafunika kucita ulendo wakulapha toera kugumanika pa nsonkhano?

Pakumala kwa nsonkhano wa gawo wa 2011, ofesi ya filiali ibodzi yatambira tsamba ya nkazi unango adagumana ncemerero pansuwo wace. Ndzidzi onsene nkazi unoyu akhabisala Mboni za Yahova zingafika panyumba pace. Iye alemba: “Ndikhali na nyumba yakubalika, mamuna wadidi, natenepa, ndikhanyerezera kuti ndikhali na pinthu pyonsene pyakuti mbapidanditsandzayisa. Mwakutsukwalisa, nee ndikhali wakutsandzaya, mwandimomwene, umaso wanga nee ukhali na cifuniro. Natenepa, ndatonga kucita ulendo wa makilometru 320 na motokala toera kugumanika pa programu ya n’Sabudu.” Iye akomerwa kakamwe na nsonkhano wa gawo mbamenyera ntokodzi mamunace toera kumpanga kuti iye nee anabwerera thangwi asafuna agumanike pontho pa programu ya n’Dimingu. “Ndabvesera nkhani zonsene, ndadziwana na Mboni zizinji za Yahova, pontho nee ndikhafuna kuti nsonkhano umale.” Pidabwerera iye kunyumba, atoma kupfundza Bhibhlya, pakupita nthanda zinai adzakhala m’mwazi mphangwa wakukhonda batizwa. “Ndiri wakutsandzaya kakamwe thangwi yakugumana ncemerero pansuwo wanga, mwandimomwene, cincino umaso wanga uli na cifuniro!”

Anango anafuna kutambira ncemerero anadzagumanika pa nsonkhano. Natenepa, khalani aphinga mu kampanya ineyi yakufunika kakamwe. Micemerero ingasala ibwereseni yonsene pa mbuto ya nsonkhano wa gawo, na iphatisireni toera kupereka umboni wantsusukano.

[Bokosi pa tsamba 5]

Tinagawira Tani Ncemerero?

Toera kuphata basa mu cisa cathu consene, mphyadidi kulonga mwacigwagwa. Tinakwanisa kulonga mafala ninga awa: “Muli tani. Tikucita basa yakuti ikucitwa pa dziko yonsene yapantsi toera kugawira ncemerero uyu. Uyu ndi ncemerero wanu. Munadzagumana mphangwa zakuthimizirika mu ncemerero.” Khalani wakugalamuka. Pakugawira ncemerero pakumala kwa sumana, pingakwanisika, tisafunikambo kugawira marevista.