Ife Tisakomerwa Kubvunga Mphambvu Zathu Mu Basa Ya Yahova!
1 Mpostolo Paulu akhakomerwa ‘kubvunga mphambvu zace zene’ thangwi yakufuna kukwanirisa utumiki wace Wacikristu. (2 Akor. 12:15, Chiverano Chachinchino) Mu njira ibodzibodzi lero, Akristu azinji asaphata basa mwaphinga ninga apainiya. Anango akuti ali na kupitawirira kukulu m’banja asagula nzidzi pakati pa mabasa awo akuinjipa towera kucita khundu mu utumiki sumana na sumana. Anango akuti ali na ungumi wa nyatwa-nyatwa asaphatisira mphambvu zawo zakucepa towera kuendesa kutsogolo pifuno pya Umambo. Ndi pyakuwangisa tani kuona mbumba ya Yahova, mokhonda tsalakana thunga peno makhaliro, mbibvunga mphambvu zawo mu basa ya Yahova!
2 Kufuna Anyakuendekana: Kucita pyonsene pinakwanisa ife towera kutumikira Yahova, kufuna Mulungu na anyakuendekana, kusatipasa cikumbuntima cadidi. Nakuti Paulu apereka umaso wace mu kumwaza mphangwa zadidi, mu njira yadidi iye mbadakwanisa kulonga: “Lero ndinakupangani mphapo: ine nkhabe pinthu na chiropa cha anthu onsene.” (Mach. 20:24, 26; 1 Ates. 2:8) Kuwangisira kucita khundu mu utumiki ninga munakwanisira makhaliro athu kunadzatiphedza kukhala akusowa mulando wa ciropa.—Ezek. 3:18-21.
3 Kubvunga mphambvu zathu towera kuphedza anango kusatipasa citsanzayo. (Mach. 20:35) M’bale unango alonga: “Dziwa ingadoka, mbindibwerera kunyumba pakumala ntsiku yamumphu mu basa ya Yahova, mokhonda penula ndisakhala wakuneta. Mbwenye ndiri wakutsanzaya na ndisapereka takhuta kwa Yahova thangwi ya kundipasa citsanzayo cakuti nkhabe munthu anafuna kundipokosera.”
4 Kufuna Mulungu: Thangwi yakufunika kakamwe inaticitisa kubvunga mphambvu zathu mu basa ya Yahova ndi yakuti pyenepi pisakomeresa Babathu wakudzulu. Kufuna Mulungu kusatikulumiza kubvera matongero ace, akuti asaphataniza kumwaza mphangwa na kucita anyakupfunza. (1 Jwau 5:3) Maseze anthu akhonde funa kubva pinalonga ife peno atipingize, mwakukomerwa tisapitiriza kuphatira Yahova basa mwakuwanga.
5 Uno si nzidzi wakubwerera nduli tayu. Ife tikukhala mu nzidzi wakututa peno wakubvuna. (Mat. 9:37) Kazinji kene nyakulima asaphata basa m’midzidzi izinji nkati mwa nzidzi wakubvuna thangwi iye ali na nzidzi wakucepa towera kugumanyisa pidalima iye mbipisati kutoma kubvunda. Nzidzi udapaswa ife towera kucita basa ya kubvuna mwauzimu ndi wakucepambo. Mu kukumbuka nzidzi unakhala ife, tendeni tonsene tipitirize kubvunga kakamwe mphambvu zathu mu utumiki.—Luka 13:24; 1 Akor. 7:29-31.