Mwanaciro Nyumba Angalonga Cilongero Cinango
1 M’maulendo akubwereza-bwereza, amwazi mphangwa a Umambo kuzungulira dziko yonsene yapantsi asagumana anthu akupangiza cifuno akuti asalonga cilongero cinango cakusiyana na cinalongwa pa mpingo. Towera kuphedza anthu anewa mwauzimu, mafiliali mazinji asaona kukhala pyakufunika kukhazikisa misoka na mipingo ya pilongero pyenepi. Nakuti ndi pyakukwanisika kuti pa cisa pakhale na pilongero pizinji, mipingo mizinji ya pilongero pyakusiyana inakwanisa kumwaza mphangwa mu cisa cibodzi cene. Kodi mipingo inakwanisa tani kubverana towera ikhale na cinyindiro cakuti basa ya kumwaza mphangwa ikucitwa mu njira yakulinganira?—1 Akor. 14:33.
2 Kubverana Kwadidi: Pakuphata basa mu nseu peno pakupereka umboni mwantsusukano, m’mwazi mphangwa asafunika kukhala waufulu towera kulonga na anthu onsene, kuphataniza ale akuti panango asalonga cilongero cinango, na kugawira mabukhu mu cilongero cinafuna munthu unoyu kuti aleri. Mbwenye, pakuenda ku nyumba na nyumba ku pisa pyakuti pisaphatwambo basa na nsoka peno mpingo wa cilongero cinango, m’mwazi mphangwa asafunika kugomezera nyumba zakuti anaciro asalonga cilongero ca mpingo unasonkhana iye. Mipingo yakusiyana-siyana ingamwaza mphangwa mu cisa cibodzi cene, ndi pyakufunika kakamwe kulemba mafambiro a basa. Ayang’aniri a m’munda asafunika kubverana mwadidi unango na nzace na kucita masasanyiro akuti anadzakhala akuphindulisa kwa onsene. (Mis. 11:14) Mbwenye, tingagumana munthu analonga cilongero cinango munacita ife utumiki wa nyumba na nyumba na nkhabepo mpingo unalonga cilongero ceneci paduzi, m’mwazi mphangwa asafunika kuwangisira kupereka umboni na kupitiriza kutsalakana munthu unoyu adapangiza kufuna.
3 Basa Ibodzi Ene: Kodi pinthu pisafunika kutsalakanwa tani amwazi mphangwa akubuluka ku mipingo yakusiyana angagumanizana mbakaphata basa mu cisa cibodzi cene? Inde, ufuni Wacikristu unadzakunda madire onsene a cilongero na citsalakano ca onsene cinadzakhala ca anthu ali mu cisa. (Jwau 13:34, 35) Natenepa, ale anatsogolera anadzapangiza ulinganiri na ufuni mu kutonga khala nsoka ubodzi usafunika kubuluka mu ndzidzi wakucepa kuenda ku cisa cinango peno nkhabe.—Tgo. 3:17, 18.
4 Biblya yalongeratu kuti anthu a pilongero pyakusiyana anadzabva mphangwa zadidi. (Apok. 14:6, 7) Onsene anacita khundu angakhala akubverana mwadidi, mphyakukwanisika kuti amwazi mphangwa a misoka peno mipingo ya pilongero pinango anaphata basa mu cisa cibodzi cene mbakhonda kugumanizana, na anthu azinji apswa anadzafikirwa na mphangwa zadidi, kuphataniza ale analonga cilongero cinango.—Aef. 4:16.
[Study Questions]
1. Thangwi yanji pali kufunika kwakuthimizirika kwa kucita pinthu mwakubverana pa kuphata basa mu cisa?
2. Munamwaza ife mphangwa ku nyumba na nyumba, kodi tinakwanisa tani kubverana na nsoka peno mpingo wa cilongero cinango mu cisa cathu?
3. Kodi tisafunika kucita tani tingagumana amwazi mphangwa a nsoka peno mpingo wa cilongero cinango mbakaphata basa mu cisa cathu?
4. Kodi ndi profesiya ipi inakwaniriswa lero?