Kuthimizira Maluso Athu Mu Utumiki—Kupereka Umboni Kuna Anthu Analonga Cilongero Cinango
Thangwi Yanji Mphyakufunika: Yahova asafuna makhaliro adidi auzimu a anthu a “mitundu yonsene.” (Mach. 10:34, 35) Na thangwi ineyi, Yezu apangiza kuti mphangwa zadidi mbazidamwazwa “pantsi ponsene” na kuna “anthu a mitundu yonsene.” (Mat. 24:14) Mprofeta Zakariya alonga kuti anthu ‘a pilongero pyonsene pya madzindza’ mbadatawira. (Zak. 8:23, NM) Mwakubverana na masomphenya a mpostolo Jwau, ale anafuna kupulumuka pa nyatwa ikulu anadzaphataniza anthu a ‘madzindza onsene, mbumba zonsene na pilongero pyonsene.’ (Apok. 7:9, 13, 14) Ninga pidalongwa padzulu apa, tingagumana munthu n’cisa cathu wakuti asalonga cilongero cinango, tisafunika kuyesera kum’mwazira mphangwa.
Tinacita Tani Pyenepi:
• Khalani akukhunganyika. Mungaenda mu utumiki, kwatani kabukhu Boas Novas para Pessoas de Todas as Nações. Dziwani mwadidi pitsogolero piri mu nsolo “Como ajudar quem fala outra língua,” unagumanika pa tsamba 2. Dziwani mwanyapantsi pilongero pya anthu anafuna kacedza na imwe, pontho citani download vidyu peno bukhu mu pilongero pyenepi mu jw.org toera kuikha mu ntokodzi wanu wa m’manja peno ntcini wandzeru. Pfundzani mafraze mangasi a cilongero ceneci mukuphatisira JW Language. Khala mipingo ya pilongero pyakusiyanasiyana isamwaza mphangwa cisa cibodzi cene, kwatani mabukhu a cilongero ca mpingo wanu basi mungaenda mu utumiki wa nyumba na nyumba. Mbwenye, mungacita utumiki wapakweca n’cisa ca pilongero pizinji, kwatani mabukhu a pilongero pya ale anafuna kacedza na imwe.
• Mungagumana munthu wakuti nee asalonga cilongero canu, citani pinakwanisa imwe toera kumpanga ‘pinthu pyakudzumisa pya Mulungu’ mu cilongero cace. (Mach. 2:11) Mpangizeni jw.org toera agumane mphangwa zakuthimizirika mu cilongero cace. Angapangiza cifuno, lembani formularyu Queira Visitar (S-43) na iperekeni kuna mulembi wa mpingo. Pitirizani kucedzera munthu adapangiza cifuno mpaka kugumana amwazi mphangwa analonga cilongero cace.
Yeserani Kucita Ipi Nkati Mwa Nthanda:
• Nkati mwa Kulambira kwanu Kwa Banja namaulo, yeserani kuti munapereka tani umboni kuna munthu wakuti nee asalonga cilongero canu.