Kumwaza Mphangwa Pabodzi mu Cisa Cinalongwa Pilongero Pizinji

Kazinji kene anthu asatawira mwakucimbiza mphangwa za Umambo angazibva mu cilongero cawo. Panango ndi pyenepi pidacitisa Yahova kucita cirengo pa Pentekoste ya caka 33 pakumala kubalwa kwa Kristu, toera ‘Ayuda akhagopa Mulungu adabuluka m’mbuto zonsene pa dziko yapantsi’ abve mphangwa zadidi ‘mu cilongero cawo,’ ngakhale kuti azinji a iwo akhalonga Cihebheri peno Cigerego. (Mabasa 2:5, 8) Lero, mipingo yakuti iri ncisa cinalongwa pilongero pyakusiyana, isacita misonkhano mu cilongero cawo, mbwenye isamwaza mphangwa ncisa cibodzi cene. Mphapo amwazi mphangwa a mipingo ineyi anacitanji toera amwaze mphangwa kwa anthu onsene a cisa cawo, mu ndzidzi ubodzi ene mbakhonda kutsukwalisa anaciro nyumba thangwi yakuti amwazi mphangwa azinji asafika kazinji kene panyumba pawo?

• 

  Kubverana (Mis. 15:22): Ayang’aniri a basa ya m’munda a mipingo ineyi asafunika kubverana toera aone kuti anamwaza tani mphangwa ncisa cibodzi cene. Khala cisa cawo ndi cing’ono, panango mipingo inamwaza mphangwa mu pilongero pinango nee inakutawirisani kuti mumwaze mphangwa n’nyumba za anthu analonga cilongero ca mpingo wawo. Mbwenye, khala cisa ndi cikulu, pontho iwo nkhabe kwanisa kumwaza mphangwa ncisa consene, panango iwo anakutawirisani kuti mumwaze mphangwa mu cisa cawo mbwenye mungagumana munthu anapangiza cifuno muadziwise. (od-T 93 ¶37) Peno anakuphembani toera mungagumana munthu analonga cilongero ca mpingo wawo muapange kuti asakhala khundu ipi. (km 7/12 5, bokosi) Kumbukani kuti midzidzi inango anthu a panyumba ibodzi ene asalonga pilongero pyakusiyana. Masasanyiro anafuna citwa toera kumwaza mphangwa ncisa consene nee asafunika kuphonyana na pinalonga mitemo.

• 

  Kutowezera pitsogolero (Aef. 4:16): Tisafunika kutowezera pitsogolero pyonsene pinatipasa muyang’aniri wa basa ya m’munda. Kodi alipo anapfundzisa imwe Bhibhlya wakuti cilongero cace casiyana na cinalongwa mu mpingo mwanu? Nyakupfundza anathambaruka mwakucimbiza mungampereka kuna munthu wampingo peno nsoka unalonga cilongero cace.

• 

  Kukhunganyika (Mis. 15:28; 16:1): Tingagumana mwanaciro nyumba analonga cilongero cinango, tisafunika kucita pyonsene pinakwanisa ife toera kum’mwazira mphangwa. Pakukhunganyika tisafunika kunyerezera pilongero pinalongwa ncisa cathu, buluka penepo tisafunika kubhaxari mabhibhlya na mavidhyu a pilongero pyenepi. Ife tinakwanisambo kuphatisira JW Language toera kupfundza kumwanyika anthu mu pilongero pinango.