KUKHALA MASO NINGA AKRISTU
Kuthimizira Maluso Athu mu Utumiki—Mwazani Mphangwa Kwa Anthu Onsene a n’Cisa Canu
THANGWI YANJI MPHYAKUFUNIKA: Zakariya akhadalonga mwanyapantsi kuti anthu a pilongero pya madzindza onsene mbadatawira mphangwa zadidi. (Zak. 8:23) Mphapo mbani anafuna kuapfundzisa? (Arom. 10:13-15) Ife tiri na mwai na basa yakumwaza mphangwa zadidi kwa anthu onsene n’cisa cathu.—od-T 84 ¶10-11.
TINACITA TANI PYENEPI:
Khunganyikani mwadidi. Kodi n’cisa canu musagumana anthu analonga cilongero cinango? Munakwanisa kuphatisira aplicativo JW Language toera kupfundza mafala akukhonda nentsa. Peno munakwanisa kuphatisira ntokodzi peno thabhuleti yanu toera kupangiza anthu kuti anagumana tani mphangwa zakuthimizirika mu cilongero cawo mu site jw.org
Khalani wakuona mwadidi. Pakumwaza mphangwa nyumba na nyumba, lekani kuluza miyai yakupereka umboni kwa ale anagumanikana na imwe n’njira peno ale ali m’miotokala. Khala mukumwaza mphangwa m’mbuto zinagumanika anthu azinji, lekani kusiya kuti pinthu pinango pikupingizeni kukwanirisa cifuno canu cakupereka umboni
Khalani waphinga. Citani pyonsene pinakwanisa imwe toera kumwaza mphangwa kwa anthu adakhonda imwe kugumana panyumba paulendo wakutoma. Wangisirani toera kufika m’mamidzi mwawo mu ndzidzi na ntsiku zakusiyana. Toera kuphedza anthu anakhonda imwe kugumana panyumba, mukuona tani kuamwazira mphangwa n’njira peno kuphatisira tsamba peno ntokodzi?
Kulisani cifuno cawo. Bwererani mwakucimbiza toera kukulisa cifuno cinapangiza mwanaciro nyumba. Khala mwanaciro nyumba asalonga cilongero cinango, sakani m’mwazi mphangwa wakuti anakwanisa kumpfundzisa mu cilongero cace. Imwe musafunika kupitiriza kuncedzera mpaka mungagumana m’mwazi mphangwa wakuti asalonga cilongero cace.—od-T 94 ¶39-40
ONANI VIDHYU YAKUTI PREGAR “ATÉ A PARTE MAIS DISTANTE DA TERRA,” BULUKA PENEPO TAWIRANI MIBVUNDZO IYI:
Kodi abale na alongo akhunganyika tani toera kuenda kamwaza mphangwa ku cisa cakutali? (1 Akor. 9:22, 23)
Ndi pinentso pipi pidathimbana na iwo?
Ndi nkhombo zipi zidatambira iwo?
Musafunika kucitanji toera mumwaze mphangwa kwa anthu azinji n’cisa canu?