Kodi Musafuna Kurusari Xikola ya Amwazi Mphangwa a Umambo?

Kodi imwe muli nkati mwa pyaka 23 mpaka 65 pyakubalwa, pontho muli m’basa ya ndzidzi onsene? Kodi imwe muli na ungumi wadidi, pontho munakwanisa kuenda kamwaza mphangwa ku cisa cakuti nee ciri na amwazi mphangwa azinji? Mungatawira mibvundzo ineyi kuti inde, imwe munakwanisa kurusari Xikola ya Amwazi Mphangwa a Umambo. Kutomera mu ndzidzi udatoma xikola ineyi, pikwi na pikwi pya abale na alongo akumanga banja na akukhonda manga banja asakurusari xikola ineyi. Mbwenye ife tisafuna kakamwe abale na alongo azinji akukhonda manga banja toera akurusari xikola ineyi. Phembani ciphedzo ca Yahova toera mukwanise kucita pinafuna iye, pontho toera mukwanise kutowezera Mwanace. (Masal. 40:8; Mat. 20:28; Aheb. 10:7) Buluka penepo, musafunika kululupisa umaso wanu toera mukwanise kuenda kuxikola ineyi.

Ndi miyai ipi inakhala na abale na alongo anakurusari xikola ineyi? Anango asatumizwa toera kamwaza mphangwa m’mbuto zinalongwa pilongero pinango, pontho anango asatumizwa toera kamwaza mphangwa m’mizinda mikulu. Kusiyapo pyenepi, anango asatumikira ninga anyakuphedzera ayang’aniri a cisa, anyang’aniri a cisa peno amisionaryo. Mu ndzidzi unanyerezera imwe kucita pizinji m’basa ya Yahova musafunika kukhala ninga mprofeta Izaiya adalonga kuti: ‘Ndiri pano! Nditumeni!’—Iza. 6:8.

ONANI VIDHYU YA NSOLO WAKUTI AMISIONARYO ASAPHATA BASA YAKUMWAZA MPHANGWA, BULUKA PENEPO TAWIRANI MIBVUNDZO IYI:

• 

  Kodi abale na alongo asasankhulwa tani toera kutumikira ninga amisionaryo?

• 

  Ndi basa ipi isacita amisionaryo?

• 

  Ndi nkhombo zipi zinakhala na amisionaryo?