Munakhunganyika Tani Cikumbuso?

Paskwa yakumalisa idadya Yezu ikhali yakufunika kakamwe. Thangwi iye akhadziwa kuti akhali cifupi na kufa, pontho iye acita masasanyiro toera kudya Paskwa ineyi pabodzi na apostolo ace na kutomesa Cakudya Cancidodo ca Mbuya. Natenepa iye aphemba Pedhru na Juwau toera kukhunganya Paskwa ineyi. (Luka 22:7-13; onani foto iri patsamba yakutoma.) Pyenepi pisatikumbusa kuti tisafunikambo kukhunganyika Cikumbuso cinafuna kucitwa pa ntsiku 27 ya mwezi wa Março. Mwakukhonda penula, mipingo yamala kusankhula m’bale anafuna kucita nkhani, abale anafuna kufambisa nkate na vinyu na pinango. Kodi imwe munakhunganyika tani Cikumbuso ceneci?

Khunganyani ntima wanu. Lerini na nyerezerani mwacidikhodikho malemba a Bhibhlya analonga pya Cikumbuso. Ndandanda ya malemba anewa isagumanika mu kabukhu Kudinga Malemba Ntsiku na Ntsiku. Kusiyapo pyenepi, khala musafuna kudziwa pinthu pyakuthimizirika thangwi ya ndandanda ineyi onani kabukhu ka nsolo wakuti Citsogolero Toera Kupfundza Mafala a Mulungu. (Onanimbo Programu ya Misonkhano ya Umaso Wathu Wacikristu na Utumiki wa Abril wa 2020.) Mabanja anakwanisa kusaka mphangwa zinalonga pyakufunika kwa ciomboli mu Índice das Publicações da Torre de Vigia peno Bukhu Inaphatisira Mboni za Yahova Pakufufudza toera kuziphatisira pa kulambira kwawo kwa banja.

Cemerani anango toera agumanikembo pa Cikumbuso. Citani pyonsene pinakwanisa imwe toera kucemera anthu azinji. Mwacitsandzo, imwe munakwanisa kucemera anthu anacedza na imwe kazinji kene thangwi ya Bhibhlya, anthu akhapfundzisa imwe Bhibhlya, mavizinyu na acibale anu. Akulu a mpingo asafunika kucemera ale adasiya kumwaza mphangwa na kusonkhana. Mphapo ndiye tani khala munthu anafuna kucemera imwe nee asakhala mucisa canu? Imwe munakwanisa kusaka mu jw.org pa khundu yakuti PYA IFE, “Cikumbuso” toera kudziwa ndzidzi na mbuto inafuna kucitwa Cikumbuso cifupi na kunakhala iye.

Ndi pinthu pipi pinango pisafunika ife kucita toera kukhunganyika Cikumbuso?