Pitirizani Kumwaza Mphangwa Thangwi ya Ufuni!

1. Tapfundzanji pa nsonkhano wa caka ca 2023?

PA NSONKHANO wa caka ca 2023,a ife tatambira macinjo a kubvesesa kwathu, pontho pacitwa pidziwiso pyakutsandzayisa kakamwe thangwi ya basa yathu yakumwaza mphangwa. Mwacitsandzo, ife tapangwa kuti panango anthu anango anatoma kutumikira Yahova pakumala kufudzwa kwa Bhabhilonya Wankulu. Pontho tadziwiswa kuti kutomera mwezi wa Novembro wa 2023, mbapadaoneka macinjo akuti amwazi mphangwa anapereka tani lipoti ya basa yakumwaza mphangwa. Kodi macinjo anewa asapangiza kuti utumiki wathu cincino nee usafunikabve kucitwa mwakucimbiza peno nee ndi wakufunika kakamwe? Nkhabe.

2. Thangwi yanji pangapita ntsiku ibodzi na ibodzi, basa yakumwaza mphangwa isafunika kucitwa mwakucimbiza kakamwe? (Marko 13:10)

² Pangapita ntsiku ibodzi na ibodzi, basa yathu yakumwaza mphangwa isafunika kucitwa mwakucimbiza kakamwe. Thangwi yanji? Thangwi ndzidzi uli kumala. Onani pidalonga Yezu thangwi ya basa yakumwaza mphangwa mu ntsiku zakumalisa. (Lerini Marko 13:10.) M’bukhu ya Mateu, Yezu alonga kuti mphangwa zadidi mbazidamwazwa pa dziko yonsene yapantsi “kumala” mbakudzati kufika. (Mat. 24:14) Fala yakuti “kumala” isabveka kufudzwa kwa dziko ino yakuipa inatongwa na Sathani. Yahova asankhula kale ‘ntsiku na ndzidzi’ toera kucita pyenepi. (Mat. 24:36; 25:13; Mabasa 1:7) Ntsiku ibodzi na ibodzi inapita, ife tisafendedzera ndzidzi unoyu. (Aroma 13:11) Natenepa, ife tisafunika kupitiriza kumwaza mphangwa mpaka kufika ntsiku ineyi.

3. Ninji cinatikulumiza toera kumwaza mphangwa?

³ Tinganyerezera basa yakumwaza mphangwa, tisafunika kucitika mbvundzo uyu wakufunika kakamwe. Thangwi yanji tisamwaza mphangwa zadidi? Ndi thangwi ya ufuni. Ife tisacita pyenepi thangwi tisakomerwa na mphangwa zadidi, tisafuna anthu, pontho tisafuna Yahova na dzina yace. Cincino tendeni tione ibodzi na ibodzi mwa mathangwi anewa.

TISAMWAZA MPHANGWA THANGWI TISAKOMERWA NA MPHANGWA ZADIDI

4. Tisapibva tani tingatambira mphangwa zadidi?

⁴ Musakumbuka ulendo wakumalisa udatambira imwe mphangwa zadidi? Panango mphangwa zakubalwa kwa mwana, peno mwagumana basa ikhasaka imwe kakamwe. Panango mwatsandzaya kakamwe mbamufuna kupanga acibale anu na axamwali anu mphangwa zenezi zadidi. Kodi pyenepi pyacitikambo mu ndzidzi udabva imwe mphangwa zadidi kakamwe kupiringana zonsene zakuti ndi mphangwa zadidi za Umambo wa Mulungu?

5. Mwapibva tani pidapfundza imwe undimomwene wa Mafala a Mulungu paulendo wakutoma? (Onanimbo mafoto.)

⁵ Nyerezeranimbo mabvero adakhala na imwe mu ndzidzi udabva imwe paulendo wakutoma undimomwene wa Mafala a Mulungu. Imwe mwapfundza kuti Babanu wakudzulu asakufunani kakamwe, pontho asafuna kuti mukhale m’bodzi wa alambiri ace. Imwe mwapfundzambo kuti iye apikira kumalisa nyatwa zonsene, pontho kuti imwe munaona pontho anthu anafuna imwe angalamuswa muli akufa mu dziko ipswa. Pyenepi basi ene ndi pingasi mwa pinthu pidapfundza imwe. (Marko 10:29, 30; Juw. 5:28, 29; Aroma 8:38, 39; Apok. 21:3, 4) Imwe mwatsandzaya kakamwe pidapfundza imwe undimomwene unoyu. (Luka 24:32) Imwe mwakomerwa na pinthu pyenepi pyonsene pidapfundza imwe, pontho mwafuna kakamwe kupangambo anthu anango undimomwene unoyu!—Onani Yeremiya 20:9.

6. Mwapfundzanji na citsandzo ca Ernest na Rose?

⁶ Onani pidacitikira m’bale unango anacemerwa Ernest.b Pikhali iye na pyaka khumi pyakubalwa, pai wace afa. Ernest alonga: “Ine ndikhabvundzika: ‘Kodi pai wanga aenda kudzulu? Kodi na ntsiku yace ndinaona pontho pai wanga?’ Ine ndikhacitira bibvu ana anango akuti akhali na apai awo.” Ernest ndzidzi onsene akhaenda kumasiye, akhagodama patsogolo pa nthumbi ya pai wace mbacita phembero: “Ndaphata miyendo, ndisafuna kudziwa kuti pai wanga ali kupi.” Pidapita pyaka 17, Ernest atawira pidaphembwa iye toera kupfundza Bhibhlya. Iye atsandzaya kakamwe pidapfundza iye kuti anyakufa nee asadziwa pinthu, pontho Bhibhlya isalonga kuti iwo anadzalamuswa muli akufa. (Ekle. 9:5, 10; Mabasa 24:15) Mukupita kwa ndzidzi, iye adzagumana mitawiro ya mibvundzo ikhali na iye. Ernest akomerwa kakamwe na undimomwene wa Bhibhlya ukhapfundza iye. Nkazace, Rose atomambo kupfundza Bhibhlya mbakomerwambo kakamwe na pikhapfundza iye. Mu caka ca 1978 iwo abatizwa. Buluka penepo, iwo atoma kulonga na acibale awo, axamwali awo na anthu anango thangwi ya undimomwene wa Bhibhlya udapfundza iwo. Ernest na Rose aphedza anthu akupiringana 70 toera kupfundzambo undimomwene wa Bhibhlya mbabatizwa.

7. Ninji pinacitika tingakomerwa na undimomwene wa Bhibhlya? (Luka 6:45)

⁷ Tingakomerwa na undimomwene wa Bhibhlya, nee tisakwanisa kukhala nawo mbatikhonda kupangambo anango pidapfundza ife. (Lerini Luka 6:45.) Ife tisakhala na mabvero mabodzi ene adakhala na anyakupfundza a Yezu adalonga: “Ife nee tinasiya kulonga pinthu pidaona ife na pidabva ife.” (Mabasa 4:20) Ife tisakomerwa kakamwe na undimomwene wa Bhibhlya, pontho tisafunambo kupanga anthu azinji undimomwene unoyu.

TISAMWAZA MPHANGWA THANGWI TISAFUNA ANTHU

8. Ninji pinatikulumiza toera kumwazira anango mphangwa zadidi? (Onani bokosi ya nsolo wakuti “Funani Anthu—Citani Anyakupfundza.”) (Onanimbo foto.)

⁸ Ife tisafuna anthu ninga pinacita Yahova na Mwanace. (Mis. 8:31; Juw. 3:16) Ife tisabvera ntsisi kakamwe anthu ‘adasowa Mulungu, pontho akuti nkhabe cidikhiro. (Aef. 2:12) Anthu anewa ali kuthimbana na nyatwa zizinji kakamwe, pontho ife tiri na cinthu cakuti cinaaphedza. Cinthu ceneci ndi mphangwa zadidi za Umambo wa Mulungu. Ufuni wathu na kuabvera kwathu ntsisi pisatikulumiza kucita pinakwanisa ife toera kuamwazira mphangwa zadidi. Anthu angabva mphangwa zadidi pisaaphedza toera akhale na cidikhiro ca ntsogolo, akhale akutsandzaya cincino, pontho toera akhale na “umaso wandimomwene” peno umaso wakukhonda mala mu dziko ipswa.—1 Tim. 6:19.

9. Ndi pinthu pipi pinadziwisa ife anthu thangwi ya ntsogolo? (Ezekiyeli 33:7, 8)

⁹ Kufuna kwathu anthu kusatikulumiza toera kuadziwisa kuti kumala kwa dziko ino yakuipa kuli dhuzi. (Lerini Ezekiyeli 33:7, 8.) Ife tisabvera ntsisi anthu onsene, kuphatanizambo anthu a pabanja pathu akuti nee asatumikira Yahova. Anthu azinji ali na pinthu pizinji kakamwe toera kucita ntsiku zonsene, pontho nee asadziwa kuti tiri dhuzi na ndzidzi unafuna kucitika “nyatwa ikulu yakuti cipo yaoneka kale kubulukira pakucitwa kwa dziko mpaka cincino, buluka penepo cipo inadzacitika pontho.” (Mat. 24:21) Ife tisafuna kuti anthu adziwe pinafuna kudzacitika mu ndzidzi unoyu wakutongwa: Uphemberi wauthambi unafudzwa, buluka penepo dziko ino yakuipa inadzafudzwa pa Armajedhoni. (Apok. 16:14, 16; 17:16, 17; 19:11, 19, 20) Ife tisacita phembero toera anthu azinji abvesere mphangwa zathu mbasankhula kutumikira Yahova pabodzi na ife. Ndiye tanimbo acibale athu na anthu anango akuti nee asatibvesera?

10. Thangwi yanji ndi pyakufunika kakamwe kumwaza mphangwa zadidi cincino?

¹⁰ Ninga pidaona ife mu nsolo udamala, panango anthu anafuna kuona kufudzwa kwa Bhabhilonya Wankulu, anatoma kukhulupira Yahova mbapulumuswa. Khala ndi tenepo, ndi pyakufunika kakamwe kudziwisa anthu cincino pinafuna kucitika ntsogolo. Nyerezerani basi: Anthu basi ene anakwanisa kukumbuka pire pidaapanga ife kale. (Onani Ezekiyeli 33:33.) Panango iwo anakumbuka pinthu pidaapanga ife, pontho anakhala na cifuno cakutumikira Yahova pabodzi na ife ndzidzi mbuciripo. Ninga pidacitika na nyakuonera kaidi wa ku Filipi adatoma kukhulupira mphangwa zadidi basi ene pakumala kuona “citeketeke cikulu,” panango anthu anango anakhonda kubvesera mphangwa zadidi cincino, anacinja angaona kufudzwa kwa Bhabhilonya Wankulu kwakuti kunadzacitika mwakukhonda dikhira.—Mabasa 16:25-34.

TISAMWAZA MPHANGWA THANGWI TISAFUNA YAHOVA NA DZINA YACE

11. Tisapasa tani mbiri Yahova, cilemedzo na mphambvu? (Apokalipse 4:11) (Onanimbo mafoto.)

¹¹ Thangwi yakufunika kakamwe inaticitisa kumwaza mphangwa zadidi ndi yakuti tisafuna Yahova Mulungu na dzina yace yakucena. Kumwaza mphangwa ndi njira yakusimba Mulungu anafuna ife. (Lerini Apokalipse 4:11.) Ife tisatawira na ntima onsene kuti Yahova Mulungu wathu ndi wakuthema toera kutambira mbiri, cilemedzo na mphambvu za onsene akukhulupirika kuna iye. Ife tisapasa mbiri Yahova na cilemedzo tingapanga anango pinthu pinatipasa cinyindiro cakuti iye ‘acita pinthu pyonsene,’ pontho atipasa umaso. Ife tisapasa Yahova mphambvu zathu tingaphatisira ndzidzi wathu, mphambvu zathu na pinthu piri na ife toera kumwaza mphangwa mwakubverana na pinakwanisa ife. (Mat. 6:33; Luka 13:24; Akol. 3:23) Mwacigwagwa, ife tisakomerwa kulonga thangwi ya Mulungu anafuna ife. Tisafunambo kupanga anango thangwi ya dzina ya Yahova na mabvekero a dzina ineyi.

12. Tisacenesa tani dzina ya Yahova pakumwaza mphangwa zadidi?

¹² Kufuna kwathu Yahova kusatikulumiza toera kucenesa dzina yace. (Mat. 6:9) Pyenepi pisabveka kuti ife tisafuna kupanga anthu kuti pyonsene pidalonga Sathani thangwi ya Yahova ndi pyauthambi. (Gen. 3:1-5; Yobe 2:4; Juw. 8:44) Tingamwaza mphangwa zadidi, ife tisafuna kuphedza onsene anafuna kudziwa Yahova. Ife tisafuna onsene adziwe kuti n’khaliro wakufunika kakamwe wa Yahova ndi ufuni, ndzidzi onsene iye asatonga mwaulungami, pontho mwakukhonda dembuka Umambo wace unamalisa nyatwa zonsene mbucitisa anthu kukhala akutsandzaya. (Mas. 37:10, 11, 29; 1 Juw. 4:8) Tingalonga undimomwene thangwi ya Yahova, ife tiri kucenesa dzina yace. Ife tisatsandzayambo thangwi ya kudziwa kuti tiri kucita pinthu pinadikhirwa kuti Mboni za Yahova zipicite. Munjira ipi?

13. Thangwi yanji ndi mwai ukulu kakamwe kuna ife kucemerwa Mboni za Yahova? (Izaiya 43:10-12)

¹³ Yahova atisankhula toera tikhale “mboni” zace. (Lerini Izaiya 43:10-12.) Pyaka pingasi nduli, tsamba ya Mathubo Akutonga yalonga: “Ndi mwai ukulu kakamwe kuna ife kucemerwa Mboni za Yahova.”c Thangwi yanji tisalonga tenepo? Nyerezerani citsandzo ici: Khala musafuna kusankhula munthu toera akhale mboni wanu ku thando yakutongera miseru, mwakukhonda penula imwe mbamudasankhula munthu wakuti musandziwa, musan’nyindira, pontho ali na makhaliro adidi. Ndi pyenepi pidacita Yahova. Pidatisankhula iye ninga Mboni zace, iye apangiza kuti asatidziwa mwadidi, pontho asatinyindira kuti tinadziwisambo anango kuti iye ndi Mulungu m’bodzi basi wandimomwene. Kuna ife ndi mwai ukulu kakamwe kukhala Mboni za Mulungu wathu, na thangwi ineyi, tisafuna kubandza miyai yonsene toera kupanga anango dzina ya Yahova na kupangiza kuti pinthu pyonsene pinalonga anthu thangwi ya iye ndi pyauthambi. Tingacita pyenepi, tinapangiza kuna onsene kuti mwandimomwene ndife Mboni za Yahova!—Mas. 83:18; Aroma 10:13-15.

MBATIPITIRIZENI KUMWAZA MPHANGWA MPAKA KUNKHOMO

14. Ndi pinthu pipi pyakutsandzayisa pinadikhira ife ntsogolo?

¹⁴ Kunyerezera pinthu pinafuna kucitika ntsogolo kusatitsandzayisa kakamwe. Na nkhombo za Yahova, ife tisadikhira kuti anthu azinji kakamwe anatawira undimomwene nyatwa ikulu mbidzati kutoma. Pontho tiri akutsandzaya kudziwa kuti ngakhale pa nyatwa ikulu, wakuti ndi ndzidzi wakunentsa kakamwe kuna anthu, panango anthu azinji anadzasiya kucita khundu ya dziko ya Sathani mbaphatana na ife toera kusimba Yahova!—Mabasa 13:48.

15-16. Tisafunika kupitiriza kucitanji, pontho mpaka lini?

¹⁵ Mbwenye ndzidzi unoyu mbudzati kufika, ife tiri na basa izinji toera kucita. Ife tiri na mwai wakucita basa yakuti cipo inadzacitwa pontho, basa yakumwaza mphangwa zadidi za Umambo wa Mulungu pa dziko yonsene yapantsi. Mu ndzidzi ubodzi ene, tisafunika kupitiriza kudziwisa anthu pinthu pinafuna kucitika. Iwo asafunika kudziwa kuti dziko ino yakuipa inamala mwakukhonda dembuka. Ndzidzi unoyu wakutongwa ungafika, iwo anadzadziwa kuti mphangwa zenezi zinamwaza ife zikhabuluka kuna Yahova Mulungu.—Ezek. 38:23.

¹⁶ Mphapo ife tonsene tisafunika kucitanji? Tingamwaza mphangwa zadidi mukukulumizwa na ufuni, kufuna mphangwa zadidi, kufuna anthu, makamaka kufuna Yahova Mulungu na dzina yace, tinapitiriza kumwaza mphangwa mwaphinga mpaka Yahova kulonga kuti: “Basa yakumwaza mphangwa yakwana!”