Yezu Akhali Waphinga Mu Ulambiri Wandimomwene

Pidamala phwando yakumanga banja ku Kana, Yezu aenda ku Kafarnau. Mai wace, na abale ace—Tiyago, Zuze, Simau na Yuda aenda naye pabodzi.

Mphapo thangwi yanji Yezu aenda ku Kafarnau? Nzinda unoyu ndi ukulu kupiringana wa Nazareti na Kana, pontho ukhadziwika kakamwe kupiringana mizinda ineyi. Kusiyapo pyenepi, anyakupfundzace apswa azinji ndi a mu nzinda wa Kafarnau peno cifupi na iwo. Natenepa Yezu mbadakwanisa kuapfundzisa mu nzinda udabalwa iwo.

Mu ndzidzi ukhali iye ku Kafarnau, Yezu acitambo mabasa akudzumatirisa. Pyenepi pyacitisa anthu azinji a mu nzinda na ali n’khundu mwa nzinda adziwe pikhacita iye. Mbwenye Yezu na anyakupfundzace, akuti akhali Ayuda akuperekeka, akhafunika kuenda mwakucimbiza ku Yerusalemu toera akagumanike pa Paskwa ya caka 30 N.W.

Pidafika iwo pa templo ku Yerusalemu, anyakupfundzace aona Yezu mbakacita pinthu pyakudzumatirisa pyakuti cipo akhadapicita kale.

Mwambo wa Mulungu ukhaphemba kuti Aizraeli apereke ntsembe za cinyama mu templo, pontho anthu akhabuluka kutali akhafuna cakudya mu ndzidzi unoyu. Natenepa Mwambo ukhatawirisa kuti ale adabuluka kutali abwerese kobiri toera kugula ‘ng’ombe, mabira na mbuzi,’ na pinthu pinango pyakuti mbadapiphatisira mu ndzidzi onsene ukhafuna iwo kukhala mu nzinda. (Deuteronomyo 14:24-26) Na thangwi ineyi anyamalonda a mu Yerusalemu akhagulisa pinyama na mbalame pa templo. Pontho anango akhabera mbumba mukugulisa pinthu na ntengo wakudhula kakamwe.

Yezu aipirwa kakamwe na pyenepi mbamwaza kobiri za anyakucinjisa kobiri, mbagwisa meza zawo na kuthamangisa anyamalonda. Buluka penepo, iye alonga: ‘Bulusani pyenepi muno! Lekani kucita nyumba ya Babanga kukhala nyumba yamalonda!’—Juwau 2:16.

Anyakupfundza a Yezu pidaona iwo pyenepi, akumbuka profesiya ikhalonga pya Mwana wa Mulungu: ‘Phinga iri na ine thangwi ya nyumba yanu ndi ninga moto wakugaka muntima mwanga.’ Mbwenye Ayuda abvundza: ‘Ndi cipi cidzindikiro cinapangiza kuti wathema kucita pyenepi?’ Yezu atawira: ‘Fudzani templo iyi, ine ndinaimanga pontho mu ntsiku zitatu.’—Juwau 2:17-19; Masalmo 69:9.

Ayuda akhanyerezera kuti Yezu akhalonga pya templo yandimomwene ya Yerusalemu, natenepa iwo abvundza: ‘Templo iyi yamala pyaka 46 mbikamangwa, mphapo iwe unaimanga mu ntsiku zitatu?’ (Juwau 2:20) Mbwenye Yezu akhalandanisa manungo ace na templo. Pakupita pyaka pitatu, anyakupfundzace akumbuka mafala anewa pidalamuswa iye muli akufa.