‘Fambani Mu Cikhulupiro Tayu M’pinthu Pyakuoneka’
Mu ndzidzi wakucepa anyankhondo mbadzati kuzungulira nzinda wa Yerusalemu na kuufudza, mpostolo Paulu alemba kuti ninga anyankhondo, Akristu asadikhira kuthimbana na pinentso, tayu kuikha pa mbuto yakutoma kusaka mpfuma na pifuno pyawo. (2 Tim. 2:3, 4) Thangwi ya kufudzwa kunafuna citika n’dziko ino yakukhonda dziwa Mulungu, tisafunika cikhulupiro cakuwanga toera kupitiriza kuikha manyerezero m’pinthu pyauzimu. (2 Akor. 4:18; 5:7) Onani vidyu ‘Ande Pela Fé, Não Pela Vista.’ (Pitani mu jw.org, pa PUBLICAÇÕES > VÍDEOS.) Dingani kuti kufuna kakamwe pinthu pyakumanungo kwakhala tani nsampha wakugopswa kuna Nahamu na Abitale. Buluka penepo, tawirani mibvundzo inatowera.
(1) M’pyaka dzana yakutoma, ‘cinthu cakunyanyasa cakufudza cidalimira pa mbuto yakucena’ cikhalinji, pontho Akristu mu Yerusalemu akhafunika kucita cisankhulo cipi? (Mat. 24:15, 16) (2) Thangwi yanji kubuluka mu nzinda kukhaphemba cikhulupiro? (3) Kubuluka mu Yerusalemu kukhaphatanizanji? (4) Thangwi yanji Nahamu na Abitale adembuka? (Mat. 24:17, 18) (5) Ndi api mayesero akuthimizirika a cikhulupiro adathimbana na Rakele mu ndzidzi ukhabuluka iye mu Yerusalemu? (Mat. 10:34-37; Mko. 10:29, 30) (6) Kodi Etani apangiza tani citsandzo cadidi ca cikhulupiro na kunyindira Yahova? (7) Ndi pinentso pipi pidathimbana na Akristu ku Pela? (8) Cikhulupiro ca Nahamu na Abitale cafewa tani mwapang’ono-pang’ono? (9) Kodi Yahova atsalakana tani Akristu akhakhala ku Pela? (Mat. 6:33; 1 Tim. 6:6-8) (10) Tinatowezera tani citsandzo ca Abrahamu na Sara munathimbana ife na kumala kwa makhaliro ano a pinthu? (Aheb. 11:8-10) (11) Ninji cidakulumiza Nahamu na Abitale toera kubwerera ku Yerusalemu, pontho thangwi yanji manyerezero awo akhali akuphonyeka? (Luka 21:21) (12) Kodi mwandimomwene umaso ukhali tani mu Yerusalemu mudabwerera Nahamu na Abitale? (13) Thangwi yanji tisafunika kuwangisa cikhulupiro cathu cincino mbukusati fika kumala kwa makhaliro ano a pinthu?—Luka 17:31, 32; 21:34-36.
Kufamba mu cikhulupiro pisabveka (1) kunyindira citsogolero ca Yahova, (2) kutawirisa kuti iye atitsogolere, na (3) kupangiza kuti tisapasa ntengo kakamwe pinthu pyauzimu kupita pinthu pyakumanungo. Tendeni tikhale akutonga kufamba mu cikhulupiro, mukunyindira kuti ‘dziko iri kumala na pinasirira iyo, mbwenye anacita cifuno ca Mulungu anakhala kwenda na kwenda.’—1 Jwau 2:17.