Tumikirani Yahova, Tayu Sathani

Tonsene tiri na ufulu wakusankhula kutumikira Yahova peno kutumikira Sathani na madimonyo ace. Ife nee tinakwanisa kutumikira awiri ene. Natenepa mphyadidi kakamwe kutumikira Yahova!

Yahova Ndi Wadidi

Ninga mudaona ife, madimonyo asakomerwa kuthabusa anthu na kuanyengeza. Mbwenye Yahova nkhabe kucita pyenepi. Iye asafuna anthu ninga munafunira baba anace. Ndiye anapasa “muoni onsene wadidi na wakulungama.” (Tiyago 1:17) Mulungu asatipasa pinthu pyonsene pyadidi, maseze pioneke ninga ndi pyakunentsa.—Aefesi 2:4-7.

Nyerezerani pinthu pidacita Yezu, mwana wa Mulungu pa dziko yapantsi. Iye aphedza mabewewe toera alonge, pontho afungula maso a maboliboli. Iye awangisa anyamatanya na anthu akulamala. Iye abulusa madimonyo, pontho awangisa ntundu onsene wa mautenda. Na mphambvu za Mulungu, Yezu alamusambo anyakufa.—Mateu 9:32-35; 15:30, 31; Luka 7:11-15.

M’mbuto mwa kulonga uthambi toera kutipeusa, ndzidzi onsene Mulungu asalonga undimomwene. Iye nkhabe kunyengeza munthu.—Numero 23:19.

Calirani Misambo Yakuipa

Anthu azinji nkhabe nentsa kukhulupira pyauthambi peno malodza. Iwo asagopa anthu akufa, pontho asagopa madimonyo. Iwo asakhulupira pya kulongerera cinthu, ufiti na pithumwa. Iwo asacita pyenepi thangwi asagopa uthambi wa Sathani Dyabo. Mbwenye atumiki a Mulungu nkhabe kugopa pinthu pyenepi.

Yahova ndi wa mphambvu kakamwe kupiringana Sathani. Mungatumikira Yahova, iye anakutsidzikizani toera mukhonde kucitwa pyakuipa na madimonyo. (Tiyago 4:7) Ufiti nkhabe kudzaphata basa kuna imwe. Mwacitsandzo, ku Nigeria, mang’anga atatu alodza Mboni ya Yahova toera kumupha thangwi iye akhonda kubuluka mu nzinda. Ufiti wawo pidakhonda iwo kuphata basa, m’bodzi mwa mang’anga anewa agopa kakamwe, iye aenda kuna Mboni ya Yahova mbaphemba kulekererwa.

Madimonyo angakuthabusani, cemerani Yahova mukuphatisira dzina yace, natenepa iye anakutsidzikizani. (Misangani 18:10) Toera Mulungu akutsidzikizeni, imwe musafunika kutaya pinthu pyonsene pinakucitisani kukhulupira mizimu na kulambira madimonyo. Atumiki a Mulungu a ku Efeso acita pyenepi. Iwo agumanya mabukhu awo onsene a masalapita mbaapisa. (Mabasa 19:19, 20) Lero, atumiki a Mulungu asafunika kucita pibodzi pyene. Iwo asafunika kutaya madzango, pithumwa, mikuzi, mabukhu a masalapita na pinthu pyonsene pyakuti pisacita khundu ya kukhulupira mizimu.

Lambirani Mulungu Wandimomwene

Khala musafuna kukomeresa Mulungu, nee pyakwana kusiya ulambiri wauthambi na kusiya kucita pinthu pyakuipa. Mbwenye musafunika kulambira Mulungu wandimomwene. Bhibhlya isalonga kuti tinacita tani pyenepi:

Musafunika Kusonkhana na Mboni Za Yahova

Sathani na madimonyo ace ali na anthu pa dziko yapantsi akuti asapfundzisa na kucita pinthu pyakuipa. Mbwenye Yahova ali nawombo anthu ace. Anthu anewa ndi Mboni za Yahova. (Izaiya 43:10) Pa dziko yonsene yapantsi pali na Mboni za Yahova cifupi na mamiliyau masere. Onsene asawangisira toera kucita pinthu pyadidi na kupfundzisa anthu undimomwene. M’madziko mazinji, munakwanisa kuagumana pa Nyumba ya Umambo, mbuto yakuti iwo anakutambirani mwadidi.

Iwo asaphedza anthu toera kutumikira Mulungu. Iwo anadzapfundza Bhibhlya na imwe panyumba panu, mbakuphedzani kudziwa kuti munatumikira tani Yahova munjira yakutawirika. Imwe nee munadzalipa cinthu toera kupfundziswa. Mboni za Yahova zisakomerwa kupfundzisa undimomwene thangwi izo zisafuna anthu na Yahova Mulungu.