Yahova Anakubalangazani

1. Umaso wa Ayuda ukhali tani ku Bhabhilonya?

NYEREZERANI mabvero adakhala na Ayuda akakhala ku Bhabhilonya. Iwo aona dziko yawo mbifudzwa. Nakuti iwo nee akhabvera Yahova mu pyaka pizinji, Yahova atawirisa kuti Abhabhilonya aaendese mu ubitcu. Umaso wawo ukhali tani ku Bhabhilonya? (2 Kro. 36:15, 16, 20, 21) Ndimomwene kuti ku Bhabhilonya, Ayuda akhali na ufulu pang’ono toera kucita pinthu. (Yer. 29:4-7) Ngakhale tenepo, umaso ukhali wakunentsa, pontho iwo nee akhafuna kukhala kweneko. Mphapo iwo akhapibva tani thangwi ya umaso wawo kweneko? Onani pidalonga m’bodzi wa iwo: “Ife tikhali nawa dhuzi na mikulo ya ku Bhabhilonya. Talira pidakumbuka ife Sioni.” (Mas. 37:1) Ayuda anewa akhali akutsukwala, pontho akhafuna cibalangazo. Mphapo mbadagumana kupi cibalangazo ceneci?

2-3. (a) Yahova acitanji kuna Ayuda akhali ku Bhabhilonya? (b) Tinapfundzanji mu nsolo uno?

² Yahova ndi “Mulungu wacibalangazo consene.” (2 Akor. 1:3) Yahova asafuna kakamwe atumiki ace. Na thangwi ineyi, iye asakomerwa na kuabalangaza. Yahova akhadziwa kuti Ayuda anango akakhala ku Bhabhilonya mbadatawira kusandikwa mbasankhula kuntumikira munjira yadidi. (Iza. 59:20) Na thangwi ineyi, iye aphemba Izaiya toera apereke mphangwa kuna Ayuda pyaka 100 iwo mbadzati kuendeswa mu ubitcu ku Bhabhilonya. Mphangwa zenezi zisagumanika m’bukhu ya Izaiya. Mphapo thangwi yanji Yahova acita pyenepi? Izaiya alonga: “Mulungu wanu alonga: ‘Balangazani, balangazani mbumba yanga.’” (Iza. 40:1) Yahova aphatisira maprofesiya adalemba Izaiya toera kubalangaza Ayuda akhafuna cibalangazo.

³ Ninga Ayuda anewa, ife tisafunikambo kubalangazwa midzidzi inango. Mu nsolo uno, tinapfundza pinthu pitatu pidacita Yahova toera kubalangaza Ayuda: (1) Iye apikira kuti mbadalekerera ale anatcunyuka, (2) iye apasa cidikhiro atumiki ace na (3) aaphedza toera akhonde kugopa. Mu ndzidzi unapfundza ife pyenepi, onani kuti tinaphedzekambo tani na mphangwa zidalemba Izaiya.

YAHOVA NDI WANTSISI, PONTHO ASATILEKERERA

4. Yahova apangiza tani kuti ndi Mulungu wantsisi? (Izaiya 55:7)

⁴ Yahova ndi “Baba wantsisi zikulu.” (2 Akor. 1:3) Iye apangiza ntsisi zenezi mu ndzidzi udapikira iye kulekerera Ayuda akutcunyuka. (Lerini Izaiya 55:7.) Iye alonga: “Thangwi ya ufuni wanga wakukhonda mala, ine ndinadzakubvera ntsisi.” (Iza. 54:8) Mphapo Yahova apangiza tani kuti akhali wantsisi? Maseze Ayuda akhathabuka thangwi ya pinthu pyakuipa pikhacita iwo, Yahova apikira kuti iwo nee mbadakhala mu ubitcu ku Bhabhilonya kwenda na kwenda. Mukupita kwa ndzidzi, iwo mbadabuluka ku Bhabhilonya. (Iza. 40:2) Mafala anewa adalonga Izaiya panango abalangaza kakamwe Ayuda akutcunyuka.

5. Thangwi yanji tiri na mathangwi mazinji toera kupereka takhuta na kulekerera kwa Yahova kupiringana Ayuda?

⁵ Tisapfundzanji? Yahova ali dzololo toera kulekerera atumiki ace na ntima onsene, pontho lero tiri na mathangwi mazinji toera kupereka takhuta thangwi ya kulekerera kwa Yahova. Thangwi yanji? Thangwi ife tisabvesesa mwadidi kakamwe pidacita Yahova toera kutilekerera madawo athu. Pidapita pyaka pizinji Izaiya mbadamala kale kulonga profesiya yace, Yahova atuma Mwanace pa dziko yapantsi toera kupereka umaso wace ninga ciomboli thangwi ya anyakudawa onsene anatcunyuka. Thangwi ya pinthu pidacita Yezu, Yahova ‘asafudza madawo athu’ peno kutilekerera na ntima onsene. (Mabasa 3:19; Iza. 1:18; Aef. 1:7) Mwakukhonda penula, ife tisatumikira Mulungu wantsisi kakamwe.

6. Kunyerezera ntsisi zikulu za Yahova kunatibalangaza tani? (Onanimbo foto.)

⁶ Khala midzidzi inango musapasika mulando thangwi ya madawo adacita imwe nduli, mafala a Yahova anagumanika pa Izaiya 55:7 anakubalangazani. Anango a ife tisapitiriza kupasika mulando thangwi ya madawo adacita ife nduli, ngakhale kuti tatcunyuka. Pyenepi pisacitika makamaka khala tiri kuthimbana na nyatwa thangwi ya madawo anewa. Mbwenye khala imwe mwabweka madawo anu, pontho mwasiya pyakuipa pikhacita imwe, munakwanisa kukhala na cinyindiro cakuti Yahova akulekererani. Kusiyapo pyenepi, Yahova angalekerera munthu, iye asasankhula kukhonda kumbuka pontho madawo a munthu unoyu. (Onani Yeremiya 31:34.) Natenepa khala Yahova nee asakumbukabve madawo adacita ife nduli, ife nee tisafunikambo kuakumbuka. Pinthu pyakufunika kakamwe kuna Yahova ndi pinacita ife cincino, tayu madawo adacita ife nduli. (Ezek. 33:14-16) Thimize pano, Babathu wantsisi zikulu anadzamalisa nyatwa zinathimbana na ife thangwi ya madawo adacita ife.

7. Ninji cinafuna kutiphedza toera kusaka ciphedzo ca akulu a mpingo tingacita madawo?

⁷ Tisafunika kucitanji khala tiri akutsukwala, pontho tiri na cikumbuntima cakulemera thangwi ya kubisa madawo? Bhibhlya isalonga kuti tisafunika kusaka ciphedzo ca akulu a mpingo. (Tiya. 5:14, 15) Ndimomwene kuti panango pinakhala pyakunentsa kuapanga pidacita ife. Mbwenye cinthu cinafuna kutiphedza ndi kukumbuka kuti Yahova asaphatisira amuna anewa toera kutiphedza, pontho iwo anatitsalakana mwaufuni na mwantsisi ninga pinacita Yahova. Tingakumbuka pyenepi, pontho khala tatcunyuka, pinakhala pyakukhonda nentsa toera kulonga na akulu a mpingo. Onani citsandzo ca m’bale anacemerwa Arthur.a Iye akhapasika mulando kakamwe thangwi ya madawo adacita iye. Mbwenye iye abalangazwa na Yahova. Iye alonga: “Ine ndaona ucipezipezi miyezi mizinji. Mbwenye pidamala ine kubvesera nkhani ikhalonga pya cikumbuntima, ndapanga nkazanga na akulu a mpingo pikhacita ine. Buluka penepo ndakhala wakukhurudzika. Mbwenye ndikhapitiriza kupasika mulando thangwi ya pinthu pidacita ine. Akulu a mpingo andikumbusa kuti Yahova asapitiriza kufuna kuti ndikhale xamwali wace. Iye andisandika thangwi asandifuna. Mafala a akulu a mpingo anewa akhuya ntima wanga, pontho andiphedza toera kubvesesa kuti mwandimomwene Yahova andilekerera.” Lero, Arthur asatumikira ninga mpainiya na ntumiki wakutumikira. Ndi pyakubalangaza kakamwe kudziwa kuti Yahova ndzidzi onsene ali dzololo toera kutilekerera tingatcunyuka!

YAHOVA ASATIPASA CIDIKHIRO

8. (a) Ndi cidikhiro cipi cidapaswa Ayuda na Yahova? (b) Mwakubverana na Izaiya 40:29-31, cidikhiro ceneci caphedza tani Ayuda?

⁸ M’maonero a anthu, pikhaoneka ninga Ayuda nee mbadabuluka mu ubitcu ku Bhabhilonya. Thangwi Abhabhilonya kazinji kene nee akhabulusa anthu akhali ninga mabitcu mu dziko yawo. (Iza. 14:17) Mbwenye Yahova apasa cidikhiro mbumba yace. Iye apikira kuti mbadaabulusa mu ubitcu, pontho nkhabepo cikhafuna kupingiza pikiro ineyi. (Iza. 44:26; 55:12) Kuna Yahova, Abhabhilonya akhali ninga pfumbi. (Iza. 40:15) Munthu angapepesa pfumbi, iyo isamburuka. Munjira ibodzi ene, mbapidakhala pyakukhonda nentsa kuna Yahova toera kubulusa mbumba yace ku Bhabhilonya. Kodi cidikhiro ceneci caphedza tani Ayuda? Iwo abalangazwa kakamwe. Kusiyapo pyenepi, cidikhiro ceneci caaphedzambo munjira inango. Izaiya alemba: “Ale anadikhira Yahova anadzakhala pontho na mphambvu.” (Lerini Izaiya 40:29-31.) Cidikhiro ceneci cacitisa Ayuda kukhala na mphambvu. Iwo akhapibva ninga ‘ali kumburuka kudzulu kakamwe ninga acapungu.’

9. Ndi mathangwi api akhali na Ayuda toera kunyindira mapikiro a Yahova?

⁹ Yahova apasambo cinyindiro Ayuda kuti mapikiro ace mbadakwanirisika. Munjira ipi? Nyerezerani maprofesiya akhadaona Ayuda mbakwanirisika. Iwo aona kukundwa kwa madzindza khumi a Izraeli mbakwatwa na Asirya toera akhale mabitcu awo. (Iza. 8:4) Iwo aonambo kufudzwa kwa Yerusalemu na Abhabhilonya mbakwata anthu toera kuenda nawo ku ubitcu. (Iza. 39:5-7) Kusiyapo pyenepi, iwo aonambo ndzidzi udaswiwa maso Zedhekiya na Mambo wa ku Bhabhilonya mbankwata. (Yer. 39:7; Ezek. 12:12, 13) Pinthu pyenepi pyonsene pyacitika ninga mudapilonga Yahova. (Iza. 42:9; 46:10) Kunyerezera pyenepi kwawangisa cikhulupiro ca Ayuda mbakhala na cinyindiro cakuti pikiro idacita Yahova kuna iwo mbidakwanirisika ntsogolo.

10. Ninji pinafuna kutiphedza toera tipitirize kukhala na cidikhiro cakuwanga mu ntsiku zino zakumalisa?

¹⁰ Tisapfundzanji? Tingakhala akutsukwala, cidikhiro cinakwanisa kutibalangaza na kutiphedza toera tikwanise kukhala pontho na mphambvu. Ife tiri kukhala mu ndzidzi wakunentsa, pontho tisathimbana na anyamalwa amphambvu. Mbwenye nee tisafunika kuluza cidikhiro. Yahova atipasa cidikhiro cakutsandzayisa kakamwe ca umaso wakwenda na kwenda muntendere na citsidzikizo. Tisafunika kupitiriza kuwangisa cidikhiro ceneci m’manyerezero mwathu. Thangwi tingakhonda kucita pyenepi, pinakhala ninga tiri kuona mbuto yakubalika kakamwe na pajanela ya vidhru yakupswipa. Mphapo “tinacenesa tani janela ineyi” mbatikhala na cidikhiro cakuwanga? Tinacita pyenepi tinganyerezera umaso wakutsandzayisa unafuna kukhala na ife n’dziko ipswa. Ife tinakwanisa kuona mavidhyu, kubvesera nyimbo na kuleri misolo inalonga pya cidikhiro ceneci. Kusiyapo pyenepi, tinakwanisambo kupanga Yahova pinthu pinafuna ife kakamwe kuona m’paraizu.

11. Ninji pinaphedza Joy toera kukhala na mphambvu?

¹¹ Onani kuti cidikhiro cabalangaza tani mulongo Joy wakuti ali kuduwala. Iye alonga: “Ndingakhala wakudzudzumika thangwi ya nyatwa zanga, ndisapanga Yahova pyonsene pinabva ine, pontho ndisadziwa kuti iye asandibvesera. M’midzidzi ineyi, ndisapibva kuti Yahova asandipasa ‘mphambvu yakupiringana yacibaliro.’” (2 Akor. 4:7) Joy asanyerezerambo umaso wakutsandzayisa unafuna kudzakhala na iye n’dziko ipswa, mu ndzidzi wakuti “nee munthu m’bodzi anakhala pa dziko anadzalonga kuti: ‘Ndiri kubva kupha.’” (Iza. 33:24) Ife tinakwanisambo kukhala na mphambvu tingapanga Yahova pinthu pinatidzudzumisa na kunyerezera pinthu pinadikhira ife ntsogolo.

12. Thangwi yanji tisanyindira mapikiro a Yahova? (Onanimbo foto.)

¹² Ninga pidacita Yahova kuna Ayuda, iye asatipasambo mathangwi mazinji toera kunyindira mapikiro ace. Nyerezerani maprofesiya anaona ife mbakwanirisika lero. Mwacitsandzo, ife tiri kuona utongi wa dziko yonsene yapantsi wa Anglo-Amerikana wakuti ‘khundu inango ndi wakuwanga, khundu inango ndi wakufewa.’ (Dhan. 2:42, 43) Kusiyapo pyenepi, tisabva mphangwa za “piteketeke m’mbuto zakusiyana-siyana,” pontho tisamwaza mphangwa “kuna anthu a madzindza onsene.” (Mat. 24:7, 14) Maprofesiya anewa na anango mazinji asawangisa cikhulupiro cathu cakuti mapikiro a Yahova anadzakwanirisika.

YAHOVA ASATIPHEDZA TOERA TIKHONDE KUGOPA

13. (a) Ndi pinentso pipi pikhafuna kuthimbana na Ayuda mbadzati kubuluka mu ubitcu? (b) Mwakubverana na Izaiya 41:10-13, Yahova abalangaza tani Ayuda?

¹³ Maseze Yahova abalangaza Ayuda na cidikhiro cakutsandzayisa, iye akhadziwa kuti iwo mbadathimbana na pinentso angabuluka ku Bhabhilonya. Iye akhadalonga kuti mambo wamphambvu mbadakunda madziko akhali dhuzi na Bhabhilonya, buluka penepo mbakundambo Bhabhilonya. (Iza. 41:2-5) Kodi Ayuda akhafunika kudzudzumika? Pyaka pizinji nduli pyenepi mbapidzati kucitika, Yahova abalangaza mbumba yace. Iye alonga: “Leka kugopa, thangwi ine ndiri na iwe. Leka kupswipa ntima, thangwi ine ndine Mulungu wako.” (Lerini Izaiya 41:10-13.) Kodi Yahova akhafuna kulonganji na mafala akuti “ine ndine Mulungu wako”? Iye nee akhakumbusa Ayuda kuti akhafunika kumulambira, thangwi iwo akhadziwa kale pyenepi. Mbwenye Yahova akhaakumbusa kuti iye akhali na iwo.—Mas. 118:6.

14. Yahova acitanji pontho toera kubalangaza Ayuda?

¹⁴ Yahova abalangazambo Ayuda akhagopa mukuakumbusa mphambvu zace na udziwisi wace wakusowa madire. Iye aphemba Ayuda kuti ayang’ane kudzulu toera aone nyenyezi. Iye aapanga kuti kusiyapo kucita nyenyezi, iye asadziwa dzina ya nyenyezi ibodzi na ibodzi. (Iza. 40:25-28) Khala Yahova asadziwa dzina ya nyenyezi ibodzi na ibodzi, iye asadziwambo madzina a atumiki ace onsene. Pontho khala Yahova akwanisa kucita nyenyezi, mwakukhonda penula, iye ali na mphambvu toera kuphedza atumiki ace. Mwakukhonda penula, Ayuda nee akhali na mathangwi toera kudzudzumika peno kugopa.

15. Yahova apanga Ayuda toera acitenji angasudzulwa mu ubitcu?

¹⁵ Yahova apangambo atumiki ace pinthu pikhafunika iwo kucita angabuluswa mu ubitcu. Bukhu ya Izaiya isalonga kuti Ayuda mbadzati kusudzulwa, Mulungu aapanga kuti: “Pitani m’makwartu mwanu, pontho fungani misuwo. Bisalani mu ndzidzi wakucepa, mpaka kuipirwa kwa Mulungu kumale.” (Iza. 26:20) Mafala anewa panango atoma kukwanirisika mu ndzidzi udakundwa Bhabhilonya na Mambo Siro. Nyakufufudza Wacigerego alonga kuti mu ndzidzi udapita Siro mu nzinda wa Bhabhilonya, iye “apanga anyankhondo ace toera aphe anthu onsene akhagumanika kunja kwa nyumba zawo.” Anthu akakhala ku Bhabhilonya panango akhagopa kakamwe! Pisaoneka kuti Ayuda akwanisa kupulumuka thangwi yakubvera pitsogolero pya Yahova.

16. Thangwi yanji nee tisafunika kudzudzumika kakamwe na pinthu pinafuna kucitika ntsogolo? (Onanimbo foto.)

¹⁶ Tisapfundzanji? Mwakukhonda dembuka, ife tinathimbana na nyatwa ikulu yakuti cipo taiona kale. Nyatwa ineyi ingatoma, anthu a dziko anakhala akudzudzumika na akugopa, mbwenye tayu mbumba ya Yahova. Ife tisadziwa kuti Yahova ndi Mulungu wathu. Ife tinapitiriza kun’nyindira thangwi tisadziwa kuti ‘cipulumuso cathu ciri cifupi.’ (Luka 21:28) Maseze tipomokerwe na nsoka wa mautongi, ife tinapitiriza kukhala dzololo mbatinyindira Yahova. Iye anaphatisira aanju toera kutitsidzikiza, pontho anatipasa pitsogolero pyakuti pinadzapulumusa umaso wathu. Tinatambira tani pitsogolero pyenepi? Ife nee tisadziwa. Mbwenye pisaoneka kuti tinadzatambira pitsogolero pyenepi kubulukira m’mipingo. Mipingo ineyi inadzakhala ninga ‘makwartu’ mwakuti tinadzakhala akutsidzikizika. Mphapo tinakhunganyika tani thangwi ya pinthu pyenepi pinafuna kucitika ntsogolo? Tisafunika kukhala akuphatana na abale na alongo athu, kubvera pitsogolero pinatipasa gulu ya Yahova na kunyindira na ntima onsene kuti Yahova ali kutsogolera gulu yace.—Aheb. 10:24, 25; 13:17.

17. Munasaka tani cibalangazo ca Yahova?

¹⁷ Maseze umaso ukhali wakunentsa kakamwe kuna Ayuda ku Bhabhilonya, Yahova aabalangaza. Iye anacitambo pibodzi pyene kuna ife. Natenepa, mwakukhonda tsalakana pinthu pinafuna kucitika ntsogolo, pitirizani kusaka cibalangazo kuna Yahova. Nyindirani ntsisi zikulu za Yahova, pitirizani kuwangisa cidikhiro canu, pontho kumbukani kuti nee musafunika kugopa cinthu, thangwi Yahova ndi Mulungu wanu.