Kodi Musakumbuka?

Kodi mwaleri mwadidi misolo yonsene ya marevista a Ncenjezi a caka cino? Khala mwaleri, tendeni tione khala munakwanisa kutawira mibvundzo inatowera:

Ninji pinatikulumiza toera kupasa mbiri Yahova?

Ife tisapasa mbiri Yahova thangwi tisamulemedza kakamwe, pontho tisanfuna. Ife tisapasambo mbiri Yahova thangwi tisafuna kuti anango andziwe.—Ncenjezi 01.25 tsa. 3.

Ninji pinafuna kutiphedza toera tilekerere ale anatitsukwalisa?

Nee tisafunika kupwaza mabvero athu; mbwenye tingakhonda kukoya kuipirwa muntima pinatiphedza toera kukhala akukhurudzika mbatipitiriza kukhala na umaso wadidi.—Ncenjezi 02.25 tsa. 15-16.

Thangwi yanji Marko ndi citsandzo cadidi kuna aphale?

Marko atawira kutumikira abale na alongo mu mpingo, maseze akhadatsukwaliswa. Iye awangisa uxamwali wace na Paulu, pontho na abale na alongo anango akukola mwauzimu.—Ncenjezi 04.25 tsa. 27.

Yezu akhafuna kulonganji pidaphembera iye kuti: “Ine ndaadziwisa dzina yanu”? (Juwau 17:26)

Anyakupfundza a Yezu akhadziwa kale kuti dzina ya Mulungu ndi Yahova. Mbwenye Yezu aaphedza kudziwa mwadidi Yahova, cifuniro cace na dziko yapantsi na anthu, pinthu pidacita iye, pinthu pinafuna iye kudzacita na makhaliro ace.—Ncenjezi 05.25 tsa. 20-21.

Kucepeseka kunatiphedza toera kudzindikiranji?

Tisadzindikira kuti ife nee tisadziwa pinthu pyonsene. Mwacitsandzo, ife nee tisadziwa kuti ntsiku ya kumala inafika lini, nee tisadziwa pinafuna kudzacita Yahova, nee tisadziwa pinafuna kucitika mangwana, pontho nee tinakwanisa kubvesesa kuti Yahova asatidziwa mpaka papi..—Ncenjezi 06.25 tsa. 15-18.

Ninji pinafuna kutiphedza toera kuphindula na pipfundziso pya m’Bhibhlya?

Panango munakwanisa kubvundzika: ‘Ndi pinthu pipi pidaphatisirwa toera kuphedza anyakubvesera kubvesesa undimomwene unoyu? Kodi waphatisirwa nsangani wakuti ine ndinakwanisa kuuphatisira ndingapfundzisa munthu undimomwene unoyu? Ndi munthu upi wakuti anakomerwa kakamwe na mphangwa zenezi, pontho ndinacedza naye lini thangwi ya pyenepi?’—Ncenjezi 07.25 tsa. 19.

Tinapfundzanji thangwi ya kulekerera kudacita Yahova kuna Dhavidhi?

Maseze Dhavidhi akhadacita madawo makulu, pidatcunyuka iye Yahova amulekerera. (1 Ama. 9:4, 5) Yahova angatilekerera, iye asaduwala madawo athu onsene, pontho cipo anaphatisira madawo adacita ife nduli toera kutitcunyusa.—Ncenjezi 08.25 tsa. 17.

Khala nyakupfundza wa Bhibhlya nee abvesesa khundu ibodzi, munacitanji?

Khala nyakupfundza nee ali kubvesesa khundu ibodzi, pitirizani na pfundziro, mungamala sakani ndzidzi unango toera kupfundza khundu idakhonda iye kubvesesa.—Ncenjezi 09.25 tsa. 24.

Thangwi yanji Bhibhlya isalonga kuti madawo ali na “mphambvu yakunyengeza”? (Aheb. 3:13)

Madawo anakwanisa kuticitisa kucita pinthu pyakuipa. Iwo anakwanisambo kuticitisa kupenula khala Yahova asatifuna.—Ncenjezi 10.25 tsa. 16.

Ndi pinthu pipi pitatu pyakuti pinakwanisa kutiphedza kulonga pinafuna ife kuna Yahova?

(1) Kunyerezera mwadidi makhaliro a Yahova. (2) Kunyerezera mwadidi pinthu pinafuna ife kulonga thangwi ya nyatwa zathu. Mwacitsandzo, panango tisafunika kulekerera anango. (3) Kucita phembero mwakukhonda thamanga.—Ncenjezi 10.25 tsa. 19-20.

Tinacitanji toera kuphedza abale na alongo akukalamba?

Tinakwanisa kuenda kaaona peno kualigariri. Peno kuaperekera kuxipitari. Pontho tinakwanisambo kumwaza mphangwa na iwo munjira zakusiyana-siyana.—Ncenjezi 11.25 tsa. 6-7.

Ndi pinthu pipi pyakuti pinaphedza ale anafuna kumanga banja kupasa mbiri Yahova pa ntsiku yawo ya kumanga banja?

Kubvera mautongi. Kukhala na cinyindiro cakuti phwando yakumanga banja inapangiza nsapo wa nzimu wakucena wa Mulungu. Kubvala munjira yadidi. Kukhonda misambo yakuti nee isabverana na pinalonga Bhibhlya. Kulonga munjira yadidi na anango pakukhunganyika phwando yakumanga banja—Ncenjezi 12.25 tsa. 21-24.