ADESŨA 23
DWEIN 2 Wo Din Ne Yehowa
Yehowa Dumaa Ne, Sɛɛ Yeɛ Yenwo Hia Wɔ Ɔ?
“AWURADE nwa nyoo, ‘Ɛmɔte m’adanzefoɛ.’”—YES. 43:10.
BƆ ADESŨA NE KƆHÃ YENWO DWIRƐ Ɔ
Yekonwu bɔ yɛkɔyɛ yɛkɔfa yɛkɔte Yehowa dumaa nanwo, na yamaa wala ali kyɛ Satan te ngondomboniɛ ɔ.
1-2. Nzu yeɛ ɔmaa yenwu ye kyɛ Yehowa dumaa nanwo hia Yesu paa ɔ?
YEHOWA dumaa nanwo hia Yesu paa tra nikyeebiala. Ebiala nne berɛ bɔ wamaa mmenia anwu Yehowa dumaa nanwo dwirɛ watra ye ɔ. Adesua bɔ oli ɛhe nyunu nanu ne, yenwuni ye kyɛ ne Yesu kuro paa kyɛ okowu kɔma Yehowa dumaa ne kɔfa kɔte yenwo. (Mak. 14:36; Heb. 10:7-9) Yesa yenwuni kyɛ, sɛ ye Afoɛ Apee Ahennie ne ba ayieleɛ a, ɔkɔkakyi nningyein mukoraati kɔma ye Baba, na wamaa mmenia ahɔso ahyɛ Yehowa aninmyam. (1 Kor. 15:26-28) Bɔ Yesu ayɛ afa Nyameɛ dumaa nanwo ne, ɔmaa yenwu kyɛ okuro ye Baba dwirɛ paa, na b’afia koso te kama.
2 Yesu wale aseɛ he aso kyɛ ɔbaali ye Baba dumaa nanwo adanzeɛ. (Yoh. 5:43; 12:13) Bɛbɔ né beli ye si ne, ɔlale ye Baba dumaa ne ali hyirele bɛ. (Yoh. 17:6, 26) Ohyirehyirele mmenia, na ɔyɛle anwanwadeɛ pee wɔ Yehowa dumaa nu. (Yoh. 10:25) Yesu bɔle Yehowa mbaeɛ po kyɛ ɔnate ‘ye bɔbɔ ye dumaa nati,’ ɔbɔ ye asuafoɛ nemɔ nwo waen. (Yoh. 17:11) Sɛ ne Yehowa dumaa nanwo hia Yesu sɔ a, yede aso ebie kɔhora kɔhã ye paa kyɛ oli Yesu si, mmerɛ bɔ ɔnze Yehowa dumaa ne anaa?
3. Nzu yeɛ yekosusu yenwo wɔ adesua he anu ɔ?
3 Yɛbɔ yɛte Kristofoɛ ne de, yɛ́yere yɛnwo kyɛ yekosuesua Yesu. Ɛhene ati Yehowa dumaa nanwo hia yɛ paa. (1 Pet. 2:21) Adesua he anu ne, yekonwu bɔ yeti yeɛ bɛbɔ bɛkã ‘Ahennie ne nwo nzɛmba’ ne, Yehowa afa ye dumaa ato bɛ so ɔ. (Mat. 24:14) Afei yekosa yɛkɔnea kyɛbɔ yenu biala kohyire kyɛ Yehowa dumaa nanwo hia ye ɔ.
‘MMENIA BƆ YE DUMAA LA BƐ SO Ɔ’
4. (a) Mmerɛ bɔ né Yesu baahɔ anwuro ne, nzu yeɛ ɔhahyirele ye asuafoɛ nemɔ ɔ? (b) Edwirɛ beni yeɛ yekonya yenwo mmuayɛɛ ɔ?
4 Mmerɛ bɔ ne Yesu baahɔ anwuro ne, ɔhahyirele ye asuafoɛ nemɔ kyɛ: “Sɛ Sunzum Krongron ne ba ɛmɔ so a, ɛmɔkonya tumi ná ɛmɔayɛ m’adanzefoɛ wɔ Yerusalem, ne Yudea amukoraa ne Samaria maa waadwu aseɛ so nekaa biala.” (Aso. 1:8) Yeti nna Yisrael maen nanu ngome yeɛ né asuafoɛ nemɔ kɔhã nzɛmba ne ɔ, na mmom ne bɛkɔhã ye wɔ maen mukoraa so, na wamaa mmenia anya yenwo atee baayɛ Yesu asuafoɛ. (Mat. 28:19, 20) Yesu hane kyɛ: ‘Ɛmɔ kɔyɛ m’adanzefoɛ.’ Aso ɛhe kyire kyɛ bɛbɔ ne bɛkɔɔyɛ Yesu asuafoɛ ne, ye ngome yeɛ ne bekoli yenwo adanzeɛ ɔ, anaa ne odikyɛ benwu Yehowa dumaa ne koso? Edwirɛ bɔ ɔwɔ Asomafoɛ yeti 15 ne, ɔmaa yenya ɛhe anwo mmuayɛɛ.
5. Asomafoɛ ne mbanyi bɔ né bɛwɔ Yerusalem ne, sɛɛ yeɛ behyirele kyɛ odikyɛ ebiala nwu Yehowa dumaa ne ɔ? (Nea foto ne koso.)
5 Wɔ afoɛ 49 Y.B (Yɛ Aberɛ So) ne, asomafoɛ ne mbanyi bɔ bɛwɔ Yerusalem ne yɛle nhyiamu bie. Ne bɛbaasusu bɔ odikyɛ maeanmaensofoɛ nemɔ yɛ na wamaa bale bɛ batonu kyɛ Kristofoɛ nanwo. Bɛ nhyiamu ne ba ayieleɛ ne, Yakobo bɔ ɔte Yesu aliema ne hane kyɛ: ‘Petro ahã kyɛbɔ osi yɛle bɔ Nyameɛ ɔɔneaneane Amaenmaensofoɛ nu yele mmenia bie fili bɛ nu kyɛ ɔfa ye dumaa to bɛ so ɔ.’ Nwa dumaa yeɛ ne Yakobo kã yenwo dwirɛ ne? Ɔhwene adwene siele edwirɛ bie bɔ diyifoɛ Amose hane naso. Ɔhane kyɛ: ‘Amaa ɔnate so mmenia bɔ baha ne, yeɛ Amaenmaensofoɛ bɔ me dumaa la bɛso ne, bapena Yehowa si atee. Yehowa noa dwirɛ ɛne.’ (Aso. 15:14-18) Yeti bɛbɔ ne baayɛ Yesu asuafoɛ ne, nna Yehowa nwo nikyee ngome yeɛ ne bekosua ɔ, na mmom ne ‘ɔkɔfa ye dumaa ne kɔto bɛ so.’ Ɛhene kyire kyɛ sɔ dumaa ne, yeɛ ne mmenia kɔfa konwu bɛ ɔ.
Asomafoɛ nemɔ aberɛ so ne, akwangyerɛ kue ne yɛle nhyiamu bie, na sɔ mmrienzua bɔ bedi nahorɛ ne nwuni kyɛ odikyɛ Kristofoɛ yɛ mmenia bɔ Nyameɛ dumaa ne la bɛ so ɔ (Nea ngyekyɛmuɛ 5)
6-7. (a) Nzuati yeɛ Yesu wale aseɛ he aso ɔ? (b) Nikyee foforɛ bɔ yenwo hia paa beni ati yeɛ Yesu wale aseɛ he aso ɔ?
6 Yesu dumaa ne, yebo kyire “Yehowa Yeɛ Odé Ngoa Ɔ.” Amba sɔ dumaa ne fata ye, ofikyɛ bɛbɔ benya yenu gyidie ne mukoraati, ye yeɛ Yehowa nate ye so kole bɛ ngoa ɔ. Yesu wale aseɛ he aso kyɛ ɔbaafa ye ngoa to berɛ de mmenia. (Mat. 20:28) Ɛhene amaa mmenia anya anyelasoɛ kyɛ bekonya daa ngoa.—Yoh. 3:16.
7 Nakoso, nzuati yeɛ ne odikyɛ bedé mmenia ngoa ɔ? Bɔ ɔhɔleso wɔ Eden turo nanu dɔ nati ɛne. Kyɛbɔ yenwuni ye wɔ adesua kõ nanu ne, y’awofoɛ bɔ belimoa Adam ne Hawa yɛle Yehowa so asoserɛ. Ɛhene maa yenwo atee bɔ ne bele ye kyɛ bɛkɔtena ase daa ne bɔle bɛ. (Gye. 3:6, 24) Nakoso, ne edwirɛ foforɛ bie wɔ berɛ bɔ yenwo hia koraa tra Adam ne Hawa bosofoɛ bɔ ne bekole bɛ ngoa ne ɔ. Ɛhene yeɛ ole Yehowa dumaa bɔ ne Satan agua yenwo fiɛ ne. (Gye. 3:4, 5) Yeti ne odikyɛ Yehowa dumaa nanwo te kora ne Adam ne Hawa bosofoɛ ahora anya daa ngoa. Yesu yeɛ ne ɔkɔhora kɔboka maa Yehowa dumaa nanwo kɔte ɔ, ofikyɛ ye yeɛ ne ogyi Yehowa gyanu bɔ ye dumaa la ye so ɔ.
Aso ebie kɔhora kɔhã ye paa kyɛ oli Yesu si, mmerɛ bɔ ɔnze Yehowa dumaa ne anaa?
8. Nzu yeɛ odikyɛ Kristofoɛ mukoraati dé tonu ɔ?
8 Bɛbɔ ne bɛkɔɔyɛ Kristofoɛ ne mukoraati, kyɛ bɛte Yudafoɛ anaa maenmaensofoɛ ne, odikyɛ bedé bɛto nu kyɛ Yehowa bɔ ɔte Yesu Baba ne, yeɛ wayɛ daa ngoa nwo nhyehyɛɛ wama bɛ ɔ. (Yoh. 17:3) Afei koso, tekyɛ Yesu ne, bɛkoso ne Yehowa dumaa ne kɔla bɛso. Né odikyɛ besa benwu bɔ yeti yeɛ yenwo hia paa kyɛ Yehowa dumaa nanwo te ɔ, ofikyɛ ɛhene yeɛ bɛ ngoa gyi so ɔ. (Aso. 2:21, 22) Yesɔ nati mmenia bɔ bedi nahorɛ bɔ bɛpena kyɛ bedi Yesu si ne mukoraati, odikyɛ besua Yehowa ne Yesu nwo nikye. Ɛhene ati mmerɛ bɔ ne Yesu fa ye mbaeɛ bɔ Yohane yeti 17 ne kã yenwo dwirɛ ne ba ayieleɛ ne, ɔhane kyɛ: “Mala wɔ dumaa ali mahyire bɛ, na ngɔla ye ali ngohyire; amaa ɔnate so ehurolɛ bɔ ekuro me dwirɛ ne watena bɛ nu, ná me koso matena bɛ nu.”—Yoh. 17:26.
“ƐMƆTE M’ADANZEFOƐ”
9. Yɛkɔyɛ sɛɛ né yahyire kyɛ Yehowa dumaa nanwo hia yɛ?
9 Kyɛbɔ yasusu yenwo ne, odikyɛ bɛbɔ beli Yesu si ne mukoraati maa Yehowa dumaa bɔ yenwo kɔte nanwo hia bɛ paa. (Mat. 6:9, 10) Afei koso, odikyɛ benya obuo pirikua paa bɛma Yehowa dumaa ne bɛtra dumaa foforɛ biala, na odikyɛ bɛmaa bɛnye gye yenwo kyɛ bɛkɔyɛ sɔ. Yede, yɛkɔyɛ sɛɛ ne yaboka maa Yehowa dumaa nanwo ate, na wamaa wala ali kyɛ bɔ Satan ahã ato ye so ne, ye mukoraati tte nahorɛ?
10. Edwirɛ beni yeɛ ɔwɔ Yesaya yeti 42 kodwu 44 ne ɔ? (Yesaya 43:9; 44:7-9) (Nea foto ne koso.)
10 Yesaya yeti 42 kodwu 44 ne, ɔmaa yenwu bɔ odikyɛ yɛyɛ yɛfa yɛte Yehowa dumaa nanwo ɔ. Wɔ sɔ tworɔnzɛm nanu ne, Yehowa hahyirele bɛbɔ bɛsõ bosoen ne kyɛ bɛma ye nyinasoɛ bɔ okyire kyɛ sɔ nyameɛ nemɔ le tumi amba ɔ. Afei koso, kyɛbɔ sɛ ebie fa edwirɛ kɔ kɔɔto a, behia adanzefoɛ ne, Yehowa hane kyɛ bɛfa b’adanzefoɛ bɛbra. Nakoso ebiala amma!—Kenga Yesaya 43:9; 44:7-9.
Yɛnate yɛ nneyɛɛ so yɛda ye ali kyɛ, Yehowa ngome yeɛ ɔte nahorɛ Nyameɛ ne ɔ (Nea ngyekyɛmuɛ 10-11)
11. Kyɛbɔ Yesaya 43:10-13a kã ne, nzu yeɛ Yehowa kã fa ye mmenia nwo ɔ?
11 Kenga Yesaya 43:10-13a. Yehowa kã kyire ye mmenia kyɛ: ‘Ɛmɔte m’adanzefoɛ, Me ole Nyameɛ.’ Bɛbɔ bɛsõ ye ne, obisale bɛ dwirɛ bie bɔ ɔpena kyɛ bɛma ye mmuayɛɛ ɔ: Yeɛ ole kyɛ: ‘Aso Nyameɛ bie wɔ berɛ boka me so hɔ ɔ?’ (Yes. 44:8) Yanya yenwo atee pirikua paa kyɛ yɛkɔye sɔ dwirɛ ne noa. Yɛnate yɛnoa dwudwolɛ ne yɛ nneyɛɛ so yɛmaa mmenia nwu ye kyɛ, Yehowa ngome yeɛ ɔte nahorɛ Nyameɛ, bɔ ye dumaa bo dumaa biala so ɔ. Ɛhene ati ɔmva yenwo ne bɔ Satan kɔfa kɔwa yɛ so biala ne, yedi nahorɛ yɛma Yehowa yɛfa yekyire kyɛ yekuro ye dwirɛ paa. Sɔ bɔ yɛyɛ ne, ɔboka maa yɛte Yehowa dumaa nanwo.
12. Sɛɛ yeɛ ngɔmhyɛ bɔ ɔwɔ Yesaya 40:3, 5 ne wale nu ɔ?
12 Sɛ yɛyɛ bɔ Yehowa kuro yɛfa yɛte ye dumaa nanwo a, ne yesuesua Yesu Kristo. Yesaya hyɛle ngɔm kyɛ ne ebie ‘kɔbɔ AWURADE atee kɔto berɛ.’ (Yes. 40:3) Sɛɛ yeɛ ɛhe wale nu ɔ? Asubɔlɛniɛ Yohane oosiesiele atee nu mane Yesu bɔ ɔwale wɔ Yehowa dumaa nu, na odwudwo mane Yehowa ne. (Mat. 3:3; Mak. 1:2-4; Luka 3:3-6) Sɔ ngɔmhyɛ komapɛ nala sa hane kyɛ: “AWURADE animnyam ne kɔla ali.” (Yes. 40:5) Sɛɛ yeɛ ɛhe koso wale nu ɔ? Yesu wale aseɛ he aso ne, ɔyɛle ye nningyein kyɛ Yehowa pɛpɛɛpɛ. Yeti ne waayɛ kyɛ Yehowa bɔbɔ yeɛ wawa aseɛ he aso ne.—Yoh. 12:45.
13. Sɛɛ yeɛ yɛkɔhora yekosuesua Yesu ɔ?
13 Tekyɛ Yesu ne, yɛkoso yɛte Yehowa Adanzefoɛ. Yehowa dumaa ne la yɛ so, na yɛkã nningyein bɔ wayɛ nanwo dwirɛ yekyire mmenia. Sɛ yɛkɔhora yekoli Yehowa nwo adanzeɛ yé a, odikyɛ yɛmaa mmenia nwu bɔ Yesu ayɛ afa ate Yehowa dumaa nanwo ne. (Aso. 1:8) Yesu yeɛ wali Yehowa nwo adanzeɛ paa watra ebiala ɔ, na yésuesua ye. (Nye. 1:5) Nakoso yenu biala kɔyɛ sɛɛ ne wahyire kyɛ Yehowa dumaa nanwo hia ye?
ATEE FOFORƐ BƆ YƐFA SO YEKYIRE KYƐ YEHOWA DUMAA NANWO HIA YƐ Ɔ
14. Kyɛbɔ Edwein 105:3 kã ne, yɛte nga sɛ wɔ Yehowa dumaa nanwo?
14 Yɛfa Yehowa dumaa ne yɛhoahoa yɛnwo. (Kenga Edwein 105:3.) Sɛ yɛfa Yehowa dumaa ne yɛhoahoa yɛnwo a, yenye gye paa. (Yer. 9:23, 24; 1 Kor. 1:31; 2 Kor. 10:17) Sɛ bɛkã kyɛ, ‘yɛfa Yehowa dumaa ne yɛhoahoa yɛnwo a,’ bɔ okyire yeɛ ole kyɛ yɛnye gye yenwo kyɛ Yehowa te yɛ Nyameɛ ɔ. Yeti yekuro paa kyɛ yɛkɔhyɛ Yehowa dumaa ne animnyam, na yate yenwo. Ɛhene ati, ɔnzɛkyɛ yɛfɛle kyɛ yɛkɔmaa bɛbɔ yɛne bɛ yɛ adwuma, bɛbɔ yɛne bɛ kɔ sukuu, bɛbɔ yɛne bɛte mandanu, ɔne ebiala konwu kyɛ yɛte Yehowa Adanzefoɛ ɔ! Abɔnzam de, onguro kyɛ yɛkɔbɔ Yehowa dumaa naso po. (Yer. 11:21; Nye. 12:17) Satan ne bɛbɔ bɛta ye si ne nyane a, ahaa mmenia wora afi Yehowa dumaa ne. (Yer. 23:26, 27) Nakoso yɛde, ‘yedi ahurusi wɔ Yehowa dumaa nanu daa,’ ofikyɛ ye dumaa nanwo hia yɛ.—Edw. 5:11; 89:16.
15. Sɛ bɛkã kyɛ yɛbɔ Yehowa dumaa ne a, okyire sɛɛ?
15 Yɛkɔso yɛbɔ Yehowa dumaa ne. (Yoel 2:32; Rom. 10:13, 14) Sɛ bɛkã kyɛ yɛbɔ Yehowa dumaa ne a, nna bɔ okyire alaa yeɛ ole kyɛ yekonwu Nyameɛ dumaa ne, ná yafa yafrɛ ye ɔ. Na mmom, osa kyire kyɛ yekonwu Nyameɛ kyɛ ebie bɔ ɔwɔ berɛ, yɛkɔfa yɛnwo yɛkɔto ye so maa ɔkɔboka yɛ, na yafa ye akwangyerɛ yabɔ yɛ bra. (Edw. 20:7; 99:6; 116:4; 145:18) Afei koso, odikyɛ yɛmaa mmenia nwu ye dumaa ne, ɔne ye subaen ahoroɛ ne. Na odikyɛ yɛhyɛ bɛ ngunaen maa bɛsakyera b’adwene bɛyɛ bɔ Yehowa kuro ɔ, na wamaa wale bɛ wato nu.—Yes. 12:4; Aso. 2:21, 38.
16. Yɛkɔyɛ sɛɛ ne yahyire kyɛ Satan te ngondomboniɛ?
16 Yehowa dumaa nati, sɛ odikyɛ yenwu amaneɛ po a, ɔnha yɛ. (Yak. 5:10, 11) Sɛ yɛkɔso yedi nahorɛ yɛma Yehowa mmerɛ po bɔ yenwu amaneɛ ne a, yɛmaa Satan bayɛ ngondomboniɛ. Yob aberɛ so ne, Satan hane edwirɛ bie fale bɛbɔ bɛsõ Yehowa nanwo. Ɔhane kyɛ: “Bɔ sona le ye amukoraa, okuro kyɛ ɔkɔmaa ɔkɔhwere ye, ná wanya ngoa.” (Yob 2:4) Satan nwa sɛ mmenia nwo tɔ bɛ a yeɛ bɛkɔsõ Yehowa ɔ. Nakoso, sɛ bɛkɔ anwokyere nu a, bɛngɔsõ ye kõ. Yob hyirele kyɛ sɔ dwirɛ bɔ Satan ahã ne, ɔtte nahorɛ. Yɛkoso, ɔmva yenwo ne bɔ Satan kɔfa kɔwa yɛ so biala ne, ɔnzɛkyɛ yɛkakyi yesi yɛma Yehowa llé. Yele gyidie paa kyɛ, ɔnate ye dumaa nati, ɔkɔhɔso kɔnea yɛ so.—Yoh. 17:11.
17. Kyɛbɔ 1 Petro 2:12 kã ne, atee foforɛ beni yeɛ yɛkɔhora yɛkɔfa so yɛkɔhyɛ Yehowa dumaa ne animnyam ɔ?
17 Yɛhyɛ Yehowa dumaa ne animnyam. (Any. 30:9; Yer. 7:8-11) Ɔnate kyɛ yɛte Yehowa Adanzefoɛ nati, kyɛbɔ yɛbɔ yɛbra ne kɔhora kɔhyɛ Yehowa dumaa ne animnyam, anaa okogua yenwo fiɛ. (Kenga 1 Petro 2:12.) Yesɔ nati, ɔmva yenwo kyɛ bɔne wɔ yɛnwo ne, yɛpena kyɛ yɛyɛ bɔ yɛkɔhora biala kyɛ yɛkɔfa yɛnoa dwudwolɛ, ɔne yɛ nneyɛɛ so yɛkɔhyɛ Yehowa animnyam.
18. Atee foforɛ beni aso yeɛ yɛkɔhora yekohyire kyɛ Yehowa dumaa nanwo hia yɛ paa ɔ? (Kenga yebo berɛ dwirɛ ne.)
18 Yehowa dumaa nanwo hia yɛ tra animnyam bɔ yɛ bɔbɔ yekonya ɔ. (Edw. 138:2) Nzuati yeɛ odikyɛ yɛmaa ɛhe anwo hia yɛ ɔ? Ɔnate kyɛ yɛpena kyɛ yɛyɛ bɔ Yehowa kuro nati, ebiaa mmenia nye ngɔgye yɛnwo, na bekogua yɛ nyunu ase po.a Ne Yesu kuro paa kyɛ mmenia kobu ye kyɛ ɔte wudiniɛ, na bahũ ye maa wafa wahyɛ Yehowa dumaa ne animnyam. Yeti ‘omiane ye nye fale animguaseɛ nu’ kora yeɛ owu ɔ. Nakoso wamva ye adwene wangɔ bɔ ne mmenia kɔhã kɔfa yenwo naso. (Heb. 12:2-4) Bɔ ne ohia ye paa yeɛ ole kyɛ ɔkɔyɛ bɔ Nyameɛ kuro ɔ.—Mat. 26:39.
19. Ɛte nga sɛ wɔ Yehowa dumaa bɔ ɔla wɔ so nanwo, na nzuati ɔ?
19 Ɔyɛ yɛ fɛ paa kyɛ Yehowa dumaa ne la yɛ so, na bɛfrɛ yɛ Yehowa Adanzefoɛ ɔ. Ɛhene ati sɛ mmenia gua yɛ nyunu ase po a, yɛmma ɔha yɛ. Yehowa dumaa nanwo hia yɛ tra animnyam bɔ yɛ bɔbɔ yekonya ye ɔ. Yesɔ nati, ɔmva yenwo ne bɔ Satan kɔfa kɔwa yɛ so biala ne, ɛmɔma yɛyere yɛnwo kyɛ yɛkɔhyɛ Yehowa dumaa ne animnyam. Sɛ yɛyɛ sɔ a, ne yekyire kyɛ Yehowa dumaa nanwo hia yɛ paa tekyɛ Yesu Kristo.
DWEIN 10 Kamfo Yɛn Nyankopɔn Yehowa!
a Ɔwɔ nu kyɛ Yob lili nahorɛ wɔ ɔhaw bɔ ɔtole ye nanu. Nakoso, odwuli nekaabie ne, edwirɛ bɔ ye damvo nza nemɔ hane ne, ɔhale ye paa. Ahyɛaseɛ bɔ ye mmaa nemɔ wuli, na ye agyapadie mukoraati koso fili ye sa ne, “Yob anyɔ bɔne, yeɛ wammɔ Nyameɛ somoɛ.” (Yob 1:22; 2:10) Nakoso, mmerɛ bɔ bɛhane kyɛ ye bɔne nwo asotwe yeɛ wanya ye ne, odwudwole “fumfum.” Né animnyam bɔ ye bɔbɔ okonya ye nanwo hia ye tra kyɛ ɔkɔte Yehowa dumaa nanwo ɔ.—Yob 6:3; 13:4, 5; 32:2; 34:5.