8 Zia nzoni tapande

TËNË SO AYE TI TENE NYEN?

Ababâ na amama so azia nzoni tapande ayeke ala so asara ye alingbi na aye so ala fa. Na tapande, eskê a yeke na lege ni ti tene na molenge ti mo so a lingbi lo tene tâ tënë, me tongana mo ye ti causé na mbeni zo na téléphone ape mo yeke tene na lo mo tene: “Tene na lo so mbi yeke dä ape.”

“Azo mingi ayeke tene ka atene: ‘Sara ye so mbi tene, me sara ye so mbi sara ape.’ Me na amolenge a yeke marché ape. Ala yeke tongana mousse so agboto ye kue so e yeke tene nga e yeke sara, na tongana ye so e fa ayeke nde na ye so e sara, ala yeke tene ni na e.”—David.

MAMA-NDIA TI BIBLE: “Mo so mo yeke fa tënë, mo tene: ‘Nzi ye pëpe’, mo yeke nzi ye?”—aRomain 2:21.

NGBANGA TI NYEN A YEKE KOTA YE?

Tapande ti ababâ na amama ayeke sara ye mingi na ndö ti amolenge ahon ti ambeni zo nde, même ti akamarade ti ala. Ye so aye ti fa so ababâ na amama la ayeke akozo zo so adoit ti fa nzoni lege na amolenge ti ala, na ala sara ni gï tongana ala sara ye alingbi na ye so ala fa.

“E peut ti tene mbeni tënë fani mingi na molenge ti e, na e bâ so lo yeke mä e ape. Me tongana mbeni lâ e sara ye alingbi na tënë so e tene so ape, lo yeke tene na e. Amolenge ayeke bâ aye kue so e yeke sara, même na angoi so e pensé ti e so ala bâ ni ape.”—Nicole.

MAMA-NDIA TI BIBLE: “Ndara so alondo na nduzu ayeke . . . handa lê ti zo pëpe.”—Jacques 3:17.

YE SO MO PEUT TI SARA

Bâ asarango ye ti mo nzoni. Mara ti afilm wa la mo yeke bâ ka? Mo yeke sara ye na mbage ti koli wala wali ti mo nga na amolenge ti mo tongana nyen? Mara ti akamarade wa la mo yeke na ni? Eskê mo yeke pensé mingi na amba ti mo? Na nduru tënë, eskê mo ye ti tene amolenge ti mo asara ye tongana mo?

“Tongana mbeni nzoni sarango ye ayeke dä so mbi na koli ti mbi e yeke na ni ape, e peut ande ti hunda na amolenge ti e ti duti na ni ape.”—Christine.

Hunda pardon ndali ti afaute ti mo. Amolenge ti mo kue ahinga so a yeke lakue la mo yeke sara ye gï na lege ni ape. Me tongana mo tene “pardon” na koli wala wali ti mo nga na amolenge ti mo ndali ti so mo sara mbeni faute, mo yeke fa na ala ti hinga afaute ti ala nga ti sara terê ti ala kete.

“Tongana e sara faute, a yeke nzoni amolenge ti e abâ so e yeda na faute ni nga e hunda pardon. Tongana e sara tongaso ape, ala nga kue ayeke yeda na afaute ti ala ape.”—Robin.