Sarango sese juska na ngoi ti Kota Moa

Yayu na sese aga tongana nyen? Lâ, nze, atongoro nga na aye mingi mingi na ndo ti sese abâ gigi tongana nyen? Bible afa tâ kiringo tënë ni tongana lo tene a yeke Nzapa si asara aye so kue. Tongaso, mbeti ti e ni ayeke komanse na mbaï ti yâ ti Bible na ndo sarango aye.

A fa na e so akozo ye so Nzapa asara ayeke azo ti yingo so ayeke tongana lo Nzapa ni, na yâ ti ambeni ye. Ala yeke a-ange. Me ti sese, a sara ni ndali ti azo tongana e. Ni la, Nzapa asara koli na wali na lo zia ala na yâ ti mbeni pendere ndo. Iri ti ala ayeke Adam na Eve. Me ala ke yanga ti Nzapa, na ala wara lege mbeni pëpe ti ngbâ na fini.

Ti londo na ngoi so a sara Adam ti si na Kota Moa, a sara kue ngu 1 656. Na ngoi ni so, asioni zo ayeke lani dä mingi. Ambeni lani ayeke na yayu, a yeke azo ti yingo so lê abâ pëpe, Satan na a-ange ti lo ti sioni. Ambeni nga ayeke na sese ge, a yeke Caïn na ambeni sioni zo, so na popo ni a yeke wara nga ambeni koli so ngangu ti ala ahon ti asenge zo. Me ambeni nzoni zo ayeke nga lani dä na ndo ti sese, a yeke azo tongana Abel, Hénoc na Noé. Na Mbage 1 ti mbeti so, e yeke diko ande ye na ndo azo so kue nga na aye so asi na ngoi ti ala.