Mbeni sioni ange asara kpengba-li na Nzapa

Acréature ti yingo kue so Jéhovah acréé ala lani ayeke nzoni-kue. Na pekoni mbeni ange oko aga sioni. A yeke Satan Zabolo. Satan aye si azo ti sese avoro lo me Jéhovah ape. Bâ ye so asi la:

Na yaka ti Éden, akeke ayeke mingi so alë apendere lê ti keke. Jéhovah afa na Adam nga na wali ti lo, Ève, so ala peut ti te alê ti keke so bê ti ala aye, me ti mbeni keke ni oko lo tene ala te ni ape, tongana ala te ni, ala yeke kui.—Genèse 2:9, 16, 17.

Mbeni lâ, so Ève ayeke gï lo oko, mbeni ngbo aga asara tënë na lo. Ti tâ tënë ni, a yeke vrai ngbo la asara tënë so ape. A yeke Satan Zabolo la ayeke handa lo so. Satan atene na Ève so tongana lo te lê ti keke so a gbanzi na lo so, lo yeke ga zo ti ndara tongana Nzapa. Lo tene nga na Ève so lo yeke kui ape. Atënë use so kue ayeke gï mvene. Me, Ève amä yanga ti Satan na lo te lê ti keke ni. Na pekoni, lo mû na Adam, na Adam nga ate ni.—Genèse 3:1-6.

Mbaï so ayeke vrai ye. Na lege ni e bâ so Satan ayeke zo ti kpengba-li nga zo ti mvene. Lo tene na Ève so tongana lo ke yanga ti Nzapa lo yeke kui ape. A yeke mvene la. Ève akui vrai, na Adam nga akui. Satan akui ti lo lani ape; me a yeke ye so ayeke si ande na lo ndali ti so lo sara siokpari. Me, ti ku na ngoi ni so, lo ngbâ na fini na lo ngbâ ti handa azo. Lo ngbâ lakue zo ti mvene, na lo tara ti pusu azo ti ke andia ti Nzapa.—Jean 8:44.

Ambeni ange asara kpengba-li

Ambeni ange nga aga sioni. A-ange ni abâ apendere wali na ndö ti sese, na ala ye ti lango na ala. Tongaso, ala ga na ndö ti sese na ala mû terê ti zo. Na pekoni ala mû ala ti ga awali ti ala. Ye so ague nde mingi na ye so Jéhovah aleke.—Genèse 6:1, 2; Jude 6.

Ye so ala sara so aga na kpale mingi na azo kue. Awali ti a-ange so adü amolenge, me amolenge ni ayeke tongana tanga ti amolenge ape. Ala kono na ala yo mingi na nduzu, ala ga asioni zo so aye gï ye ti ngangu. Na ndani, sarango ngangu na zo amû ndö ti sese kue, na Jéhovah adécidé ti futi azo ti sioni na lege ti mbeni kota ngu. Azo so asö kuâ lani, ayeke gï Noé, zo ti mbilimbili, na sewa ti lo.—Genèse 6:4, 11; 7:23.

Ye oko, asioni ange ni so akiri na ndo ti yingo; ala kui ti ala ape. Me a fâ ngbanga na li ti ala. A yeda na ala encore ape ti kiri na popo ti a-ange so ayeke mbilimbili, so angbâ ti ala na yâ ti sewa ti Nzapa. Na mbage, Jéhovah amû lege na ala encore ape ti changé terê ti ala na ti zo. Ni la, ala yeke kui ande na ngoi ti kota ngbanga so ayeke ga.—2 Pierre 2:4; Jude 6.

Atomba Satan na yayu

Na tongo nda ti ngu 1900, mbeni bira asungba na yayu. Bible asara tënë ni na yâ ti mbeti ti Apocalypse, a tene: “Na pekoni, bira alondo na yayu: Michel [Jésus so azingo na kuâ awe] na a-ange [anzoni ange] ti lo atiri bira na sioni nyama so akpa ngbo so [Satan], na sioni nyama ni na a-ange [asioni ange] ti lo nga atiri na ala, me sioni nyama ni na a-ange ti lo asö benda pëpe, nga ndo angbâ mbeni pëpe ndali ti ala na yayu. Tongaso, a bi kota sioni nyama so akpa ngbo so, ngbo ti giriri, lo so a iri lo Zabolo na Satan, lo so lo yeke handa azo na ndö ti sese kue; a bi lo na sese, na a bi nga a-ange ti lo ni legeoko na lo.”

Nyen la asi na pekoni? Mbaï ni atene: “Ndani la, ala duti na ngia, ayayu na ala so ayeke kâ!” Anzoni ange aduti na ngia ndali ti so Satan na adémon ti lo, wala asioni yingo, angbâ na yayu encore ape. Ka nyen la asi na azo so ayeke na ndö ti sese? Bible atene: “Mawa na sese nga na ngu-ingo, ngbanga ti so Zabolo adescend na mbage ti ala, lo yeke na kota ngonzo, ndali ti so lo hinga so lo yeke na ngoi mingi pëpe.”—Apocalypse 12:7-9, 12.

Biani, Satan na asioni zo ti lo so ayeke handa azo ti sese nga ala yeke sara pasi na ala. A iri asioni ange so, adémon. Ala yeke awato ti Nzapa. Ala kue ayeke sioni.