Chapitre 41

Wuluwulu alondo teti Jésus

NGOI KETE na pekoni so ahiri lo ti te kobe na da ti Simon, Jésus alondo ti gue na use tambela ti lo na kodoro ti Galilée ti fa tene. Na la ni so lo gue na ya kodoro so ti kozoni, lo gue lege-oko na akozo disciple ti lo so ayeke Pierre, André, Jacques nga na Jean. Me fadeso lo gue lege-oko na abazengele ti lo bale oko na ndoni use, nga na ambeni wali so na popo ti ala ayeke Marie Madeleine, Suzanne, na Jeanne, lo so koli ti lo asala kua teti gbia Hérode.

Tongana Jésus asala kusala mingi, wuluwulu so aga na lege ti kusala so awu mingi nga. A ga na Jésus mbeni zo so ayeke na ayingo sioni, lo yeke nga waziba na wabuburu. Tongana Jésus alungula kobela ti lo, na lo tomba ayingo sioni so ayeke na lo, si koli ni asala tene na abaa ndo, be ti azo kue ado. Ala tene: “Zo so ayeke Molenge ti David pepee?”

Azo mingi aga na ala ngoro da so Jésus alango na ya ni, si lo na adisciple ti lo awara lege pepee ti te kobe. Na tele ti azo so aye ti hinga wala Jésus ayeke “Molenge ti David” ti zendo ni, e wara nga awafango ndia na aFarizien so alondo na Jérusalem ti ga ti sala tene ti kirikiri na ndo Jésus. Na mbage, tongana azo ti sewa ti Jésus ama wuluwulu so alondo, ala ga ti gbu lo. Ngbanga ti nyen?

Aita ti Jésus ti koli ade ti ma na be pepee so lo yeke Molenge ti Nzapa. Na mbage, na le ti ala Jésus so aga kota na gbele ala na kodoro ti Nazareth alingbi pepee ti sala si mara ti wuluwulu tongaso alondo. Ala tene mbeni ye asala li ti Jésus. “Li ti lo aga kirikiri awe”, ala tene, na ala ye ti gbu lo ti gue na lo.

Me, kite ayeke pepee so Jésus alungula kobela ti zo so ayeke na ayingo sioni. Awafango ndia na aFarizien ahinga so ala lingbi ti bele pepee tene so. Tongaso, ti bi zonga na ndo Jésus ala tene: “Zo so atomba ayingo sioni gi na ngangu ti Béelzébub, mokonzi ti ayingo sioni.”

Jésus ahinga bibe ti ala, tongaso lo hiri awafango ndia na aFarizien ti ga ndulu na lo na lo tene: “Royaume kue so akangbi afuti awe, na kodoro kue wala da kue so akangbi fade a ngba pepee. Tongana Satan atomba Satan, lo kangbi ya ti lo awe; fade royaume ti lo angba tongana nyen?”

Tene so ayeke taa na lege ni! Teti so aFarizien atene so ambeni zo na popo ti ala atomba ayingo sioni, Jésus ahunda ala nga: “Tongana mbi tomba ayingo sioni na ngangu ti Béelzébub, amolenge ti i atomba ayingo sioni na ngangu ti zo nyen?” Jésus aye ti fa so tene so awafango ndia adiko na ndo lo, alingbi nga na ala mveni. Na Jésus azingo na ala, lo tene: “Me tongana mbi tomba ayingo sioni na ngangu ti Nzapa, ka royaume ti Nzapa asi na i awe.”

Ti fa na gigi so ngangu ti lo ti tomba ayingo sioni afa so lo yeke ngangu ahon Satan, Jésus atene: “Wala, na lege nyen mbeni zo alingbi li na da ti zo ti ngangu ti gbu ye ti da ti lo? tongana lo kanga zo ti ngangu so kozoni pepee. Na ndani, fade lo gbu ye ti da ti lo. Zo so ayeke na mbi pepee, a ke mbi; na zo so abungbi ye teti mbi pepee, a kangbi ye kirikiri.” A-Farizien ake Jésus na be ti ala kue, na lege so ala fa na gigi so ala yeke awakua ti Satan. Ala kanga lege na aIsraélite ti mu peko ti Jésus.

Tongaso, Jésus azingo na awato ti lo so alondo na Satan so “fade amu pardon pepee na azo so azonga yingo ni”. Lo fa nda ti tene ni: “Na zo so asala tene sioni na tele ti Molenge ti zo, fade amu pardon na lo; me zo so asala tene ti sioni na tele ti yingo ti nzoni-kue, fade amu pardon na lo pepee na ngoi so wala na ngoi so ayeke ga.” Awafango ndia na aFarizien asala mara ti siokpari so fade amu pardon na ni pepee tongana ala tene na lege ti siobe so kusala ti kpene so asala ni biani na lege ti ngangu ti Nzapa alondo na Satan. Matthieu 12:22-32; Marc 3:19-30; Jean 7:5.

▪ Na lege ti nyen, use guengo ti Jésus na kodoro ti Galilée ayeke nde na kozo guengo ni?

▪ Azo ti da ti Jésus agi lege ti gbu lo ngbanga ti nyen?

▪ Na lege wa aFarizien agi lege ti zonga ye ti kpene so Jésus asala ni? Jésus ake tene ti ala tongana nyen?

▪ A-Farizien asala siokpari wa? Na ngbanga ti nyen?