Chapitre 42

Jésus azingo na aFarizien

JÉSUS atene tongana lo tomba ayingo sioni na ngangu ti Satan, ka Satan akangbi ya ti lo awe. Na pekoni lo tene: “A lingbi i tene, keke ayeke nzoni na lengo ni ayeke nzoni nga, wala i tene keke ayeke sioni na lengo ni ayeke sioni; teti zo ahinga keke na lege ti lengo ni.”

A yeke na lege ni pepee ti tene so Jésus ale nzoni lengo tongana lo tomba ayingo sioni ngbanga ti so lo sala na Satan. Tongana le keke ayeke nzoni, keke ni ayeke sioni pepee. Nde na so, asioni lengo ti aFarizien so adiko sio tene na ndo Jésus na so ake lo senge senge, afa na gigi so ala mveni ayeke sioni. “I amolenge ti longo, Jésus atene, na lege nyen i lingbi ti sala tene ti nzoni? teti i yeke sioni! Teti yanga ti zo asala tene ti ye so ayeke na be ti lo.”

Teti so tene ti yanga ti e afa na gigi ye so ayeke na be ti e, a lingbi ti fa ngbanga na ndo e na lege ti tene ti e. Jésus atene: “Mbi tene na i: Tene oko oko kue so azo atene senge senge, fade ala kiri tene teti tene so na La ti Fango Ngbanga; teti fade adiko mo mbilimbili na lege ti tene ti mo, na fade ngbanga ati na li ti mo na lege ti tene ti mo.”

Kamême so Jésus asala ye ti kpene mingi, awafango ndia na aFarizien ahunda tene so na lo: “Wafango ye, e ye ti baa mbeni fa so mo yeke sala.” Même tongana azo so ti kodoro ti Jérusalem abaa ala mveni pepee aye ti kpene so Jésus asala ni, ambeni zo abaa ala na le ti ala, na ala lingbi ti bele ni pepee. Tongaso Jésus atene na amokonzi ti aJuif: “Wagame ti siokpari na ti pitan agi fa, me fade amu na ala fa oko pepee, gi fa ti Jonas.”

Jésus afa nda ti tene so lo ye ti tene: “Teti lege-oko tongana Jonas ayeke na ya ti kota susu la ota na bi ota, fade Molenge ti zo ayeke na be ti sese la ota na bi ota nga.” Jonas asigigi na ya ti susu na pekoni so susu ni amene lo, a yeke lege-oko tongana lo sigigi na du-kua. Tongaso Jésus ayeke fa na ala so fade lo wara kua, na fade ayaa lo na du-kua na la ota ni. Ye oko, fade amokonzi ti aJuif ake “fa ti Jonas” même tongana azingo Jésus na du-kua.

Tongaso Jésus atene so fade ayaa na du-kua azo ti kodoro ti Ninive so asanzé be ti ala na la ni so Jonas afa tene, na fade azo so afa ngbanga na ndo aJuif so ake Jésus. Lo zia nga kamba na popo ti ala na gbia wali ti Schéba, lo so alondo na yongoro ndo ti ma tene ti ndara ti Salomon na be ti lo ado mingi teti ye so lo baa na lo ma. Jésus atene: “Na baa! Mbeni oko ayeke na ndo so, so ayeke kota ahon Salomon.”

Na pekoni, lo sala tene ti toli ti mbeni koli so ayingo sioni asigigi na ya ti lo. Me, koli so agi lege pepee ti zia aye ti nzoni na place so aduti fadeso senge, tongaso ayingo sioni mbasambala aga na ala li na ya koli so. Jésus atene: “Fade ye asi na wagame ti sioni so lege-oko tongaso.” Asukula mara ti Israël na aleke lo mbeni, ye so e lingbi ti haka ni na hongo ti mbeni yingo sioni teti kete ngoi. Me tongana mara ti Israël ake aprophète ti Nzapa, na ake même Christ lo mveni, a fa na gigi so dutingo ti lo ayeke sioni mingi ahon ti kozoni.

Tongana Jésus ade ti sala tene so, mama ti lo na aita ti lo ti koli aga na ala luti na gigi na tele ti azo mingi. Na mbeni zo atene na lo: “Baa! Mama ti mo na aita ti mo ti koli aluti na gigi, ala ye ti sala tene na mo.”

Jésus ahunda: “Zo nyen ayeke mama ti mbi? Azo nyen ayeke aita ti mbi?” Lo yaa maboko ti lo na adisciple ti lo, lo tene: “Baa! Mama ti mbi na aita ti mbi! Teti zo so asala ye so Baba ti mbi so ayeke na yayu aye, zo so ayeke ita ti mbi ti koli, na ita ti mbi ti wali, na mama ti mbi.” Na lege ti tene so, Jésus afa na gigi so ataa songo so abungbi lo na famille ti lo ayeke ngangu, songo so abungbi lo na adisciple ti lo ayeke ngangu mingi ahon. Matthieu 12:33-50; Marc 3:31-35; Luc 8:19-21.

▪ Na lege wa aFarizien asala pepee si “keke” nga na “lengo” ni aga nzoni?

▪ “Fa ti Jonas” ayeke nyen? Na lege wa ake ni na pekoni?

▪ Na lege ti nyen mara ti Israël na la ni ka ayeke lege-oko na mbeni zo so ayingo sioni asigigi na ya lo?

▪ Jésus afa na gigi kota ngere ti songo so abungbi lo na adisciple ti lo tongana nyen?