Chapitre 71
A-Farizien ake ti ma na be
TONGANA ahiri ala na gbele aFarizien, be ti baba na mama ti waziba so kozoni ahiri ye na lege ayeke na mbito. Ala hinga awe so azo kue so ama na be na Jésus agbanzi lege na ala ti li na ya synagogue. Biani, a yeke ye ti vundu mingi teti mbeni sewa ti kangbi tele ti ala na tanga ti azo ti kodoro, na mingi ahon tongana sewa so ayeke azo ti mawa. Ni laa si baba na mama so asala ye na donzi.
A-Farizien ahunda ala: “Zo so ayeke molenge ti i? lo so i tene i du lo waziba. Na lege nyen lo baa ndo fadeso?”
Baba na mama ti lo akiri tene: “E hinga zo so ayeke molenge ti e, na e du lo waziba, me e hinga pepee ye so asala si lo baa ndo fadeso, na e hinga zo so alungula le ti lo pepee.” Biani molenge ti ala afa na ala ye kue so asi, me ala ye ti diko tene mingi pepee, ala tene: “I hunda lo. Lo ga koli awe. Fade lo mveni afa na i tene ni.”
Tongaso, aFarizien akiri ahiri koli so. Fadeso ala gi ti woko be ti lo, ala tene na lo so ala wara mbeni sioni tene mingi na ndo Jésus. Ala tene na lo: “Mu gloire na Nzapa. E hinga zo so ayeke wasiokpari.”
Koli so ayeke waziba giriri ake tene ti ala pepee, me lo tene: “Tongana lo yeke wasiokpari, mbi hinga pepee.” Me lo tene nga: “Mbi hinga ye oko so, giriri mbi yeke na ziba, me fadeso mbi baa ndo.”
A-Farizien agi ti wara mbeni faute na ya tene ti témoin ti koli so, tongaso ala kiri ahunda lo: “Lo sala nyen na mo? Na lege nyen lo lungula le ti mo?”
“Mbi fa tene na i fade fadeso”, koli ni adema tele ti lo, “na i ye ti ma pepee, teti nyen i ye ti ma tene so mbeni?” Na ngonzo na be ti lo, lo tene: “I ye ti ga adisciple ti lo nga?”
Tene so amu ngonzo na aFarizien. Ala tene: “Mo yeke disciple ti lo, me e yeke adisciple ti Moïse. E hinga Nzapa asala tene na Moïse giriri, me zo so, e hinga ndo so lo londo da pepee.”
Teti so be ti lo ado, zo ti hiringo ye so ayeke na taa-be-molenge akiri tene so na ala: “Ye so ayeke ye ti sala si be ti zo ado! Zo so alungula le ti mbi awe, na i hinga ndo so lo londo da pepee.” Fade e tene nyen na ndani? Zo ti hiringo ye afa na e kpengba ndia so: “E hinga Nzapa ama tene ti wasiokpari pepee, me tongana zo asambela Nzapa na lo sala ye so Nzapa aye, Nzapa ama lo. Zo ama la oko pepee so mbeni zo alungula le ti zo so a du lo waziba.” Tongaso, azo kue alingbi ti gbu nda ti tene so: “Tongana zo so alondo na Nzapa pepee, lo lingbi sala ye oko pepee.”
Mara ti taa ndara tongaso akanga yanga ti aFarizien. Ala ye ti kamata taa tene pepee, tongaso ala zonga lo: “A du mo na ya siokpari, na mo ye ti fa nda ti tene na e?” Tongaso ala bi lo na gigi, ala kanga lege na lo ti li na ya synagogue.
Tongana lo ma ye so ala sala na koli so, Jésus ague ti baa lo, lo tene na lo: “Mo ma na be na Molenge ti zo?”
Zo ti hiringo ye so ayeke waziba giriri ahunda na lo: “Lo yeke zo nyen, Seigneur, si mbi lingbi ma na be na lo?”
Jésus akiri tene: “A yeke lo so ayeke sala tene na mo.”
Hio, koli ni akuku na gbele Jésus na lo tene: “Seigneur, mbi ma na be na lo.”
Na pekoni, Jésus afa nda ti tene ni na lo: “Mbi ga na sese so ti fa ngbanga, si ala so abaa ndo pepee alingbi baa ndo, na ala so abaa ndo alingbi ga waziba.”
A-Farizien so ama tene ti Jésus atene: “E yeke na ziba nga?” Tongana ala yeda so ala yeke biani awaziba na lege ti yingo, fade amu pardon na ala teti so ala ke Jésus. Ni laa Jésus atene na ala: “Tongana i yeke na ziba, ka i yeke na siokpari pepee.” Me na be ti ala kue ala ngba ti tene so ala yeke na ziba pepee na ala ye ti wara lumière ti yingo pepee. Tongaso Jésus atene: “Fadeso i tene, ‘E baa ndo’. Tongaso siokpari ti i angba.” Jean 9:19-41.
▪ Ngbanga ti nyen mbito asala baba na mama ti zo ti hiringo ye so ayeke waziba kozoni tongana ahiri ala na gbele aFarizien? na tongana nyen si ala kiri tene na ndara?
▪ Tongana nyen si aFarizien agi ti zia mbito na be ti zo so ayeke waziba giriri?
▪ Tene ti ndara wa ti koli so amu ngonzo na be ti aFarizien?
▪ Ngbanga ti nyen aFarizien alingbi ti wara pardon pepee tongana ala ke Jésus?