Chapitre 72

Jésus ato azo 70

E SI NA ngoi ti septembre/octobre ti ngu 32, ngu ota kue na peko ti batême ti Jésus. Lo na adisciple ti lo ague fade na matanga ti Akpangba na Jérusalem, na ala ngba ndulu na kodoro so. Gi nze omene angba na Jésus ti sala kusala ti lo, na mingi lo yeke na sese ti Judée, wala na mbengu ti Jourdain, na sese ti Pérée. A lingbi lo fa tene na sese so nga.

A yeke taa tene so na peko ti Pâque ti ngu 30 ngoi ti e, Jésus afa tene teti nze miombe na sese ti Judée. Me, na Pâque ti ngu 31 ngoi ti e, aJuif agi lege ti fa lo na sese so. Tongaso, na pekoni, teti ngu oko na nze omene, lo fa tene mingi gi na Galilée. Na ngoi so, lo leke mbeni kota bungbi ti azo so afa na ala lege ti fa tene nzoni mingi, ye so lo yeke na ni kozoni pepee. Fadeso, lo londo ti fa tene ngangu mingi na Judée, kusala ti fango tene ti ndani ti lo.

Ti sala si kusala ti fango tene alondo, Jésus ahiri adisciple bale mbasambala na lo to ala use use. Tongaso, akete bungbi ti awafango tene ti Royaume ayeke fadeso bale ota na oku na sese ni. Ala gue na gbele Jésus na akodoro na ndo kue so lo ye ti gue da na abazengele ti lo.

Jésus afa na azo bale mbasambala so ti gue na ya asynagogue pepee, me lo tene na ala ti li na ya da ti azo, lo tene: “Na da kue so i li na ya ni, i tene kozoni, ‘Siriri aduti na da so’. Tongana molenge ti siriri ayeke da, fade siriri ti i aduti na ndo lo.” Ala yeke fa tene wa na azo? Jésus atene: “I tene na ala: ‘Royaume ti Nzapa aga ndulu na i awe.’ ” Na lege ti kusala ti adisciple bale mbasambala so, e diko tene so na Tene ti Matthew Henry (angl.): “Lege-oko na Maître ti ala, na ndo kue so ala gue, ala fa tene da na da.”

Tene so Jésus afa na adisciple bale mbasambala ayeke lege-oko na tene so lo fa na abazengele bale oko na ndoni use ngu oko kozoni, na ngoi so lo to ala ti fa tene na Galilée. Lo fa na ala so azo ayeke sala ngangu na ala, na lo mu maboko na ala ti leke tele ti ala ti fa tene na azo, me nga lo mu na ala ngangu ti lungula kobela kue. Tongaso, tongana lo ga na peko ti ala, fade lo wara azo mingi so ayeke na nzala ti baa Maître ti adisciple so ayeke na ngangu ti sala aye ti kpene tongaso.

Fango tene ti adisciple bale mbasambala na kusala so Jésus asala na peko ti ala aninga teti ngoi mingi pepee. Fade fade akete bungbi bale ota na oku ti azo ti fango tene atonda ti kiri na Jésus. Adisciple ayeke na ngia mingi, ala tene na lo: “Seigneur, même ayingo sioni ama yanga ti e teti iri ti mo.” Be ti Jésus ayeke na kota ngia ti ma nzoni tene ti fango tene ti ala. Lo tene: “Mbi baa Satan alondo na yayu, lo ti tongana nekpa. Baa, mbi mu ngangu na i ti do angbo na apalakongo na gbe ti gere ti i.”

Jésus ahinga so tongana a du Royaume ti Nzapa awe, na la ti ndani, fade a tomba Satan na ayingo sioni ti lo na gigi ti yayu. Me, na la ni so, ti ma so azo senge atomba ayingo sioni so le alingbi baa ala pepee akpengba mabe na zendo so fade kpale so asi ande biani. Ni laa si Jésus asala tene ti bingo Satan na gigi ti yayu tongana mbeni ye so asi awe. Tongaso, a yeke na lege ti fa si adisciple bale mbasambala awara ngangu ti do na gbe ti gere ti ala angbo na apalakongo. Me, Jésus atene nga: “I sala ngia pepee teti ayingo sioni ama yanga ti i, me i sala ngia teti asala iri ti i na mbeti na yayu.”

Jésus ayeke na kota ngia. Na gbele azo lo gunda Baba ti lo so lo sala kua ti ngangu na lege ti azo senge tongaso. Lo gue na adisciple ti lo, lo tene: “Ngia ayeke na le so abaa ye so i baa! Teti mbi tene na i, aprophète na agbia mingi aye ti baa ye so i baa, na ala baa ye so pepee, na ala ye ti ma ye so i ma, na ala ma ye so pepee.” Luc 10:1-24; Matthieu 10:1-42; Apocalypse 12:7-12.

▪ Teti akozo ngu ota ti kusala ti lo Jésus afa tene na ndo wa? Na tanga ti nze omene ti kusala ti lo, lo fa tene na kodoro wa?

▪ Jésus ato adisciple bale mbasambala ti fa tene na ndo wa?

▪ Ngbanga ti nyen Jésus atene so abi Satan na gigi ti yayu awe?

▪ Na lege wa adisciple bale mbasambala ado angbo na apalakongo na gbe ti gere ti ala?