E Yeke Kui Ngbanga ti Nyen?
“Na ndo ti akete hoto kue ye ayeke kpö fadeso, na yâ ali ti akeke kue a yeke ngangu ti mä kete pupu so aïa; andeke alango na yâ akeke: i ku; fade i yeke hu tele tongana ala.”—JOHANN WOLFGANG VON GOETHE, POÈTE TI ZAMANI.
1, 2. (a) A leke azo na nzala wa? (b) Mara ti fini wa kozo koli na kozo wali ayeke na ni la ni?
NZAPA aleke azo na nzala ti duti na fini lakue lakue. Biani, Bible atene lo zia “ye ti lakue lakue na bê ti azo.” (Zo-ti-fa-tene 3:11) Me Nzapa amu pepe na azo gi nzala ti duti na fini lakue lakue. Lo mu nga na ala lege ti sala tongaso.
2 A leke la ni akozo babâ na mama ti e, Adam na Ève, mbilimbili-kue, na mbeni sioni ti bibe wala ti mitele oko pepe. (Deutéronome 32:4) Tara ti ba: akota songo tele na kobela ayeke pepe, asioni mbito wala agingo bê ayeke pepe! Na ndo ni, Nzapa azia ala na yâ mbeni pendere kodoro ti paradis. Nzapa aleke la ni ti tene zo aduti na fini ti lakue lakue nga so, na pekoni, sese ayeke si na amolenge ti lo so ayeke mbilimbili-kue. (Genèse 1:31; 2:15) Tongaso, e yeke kui ngbanga ti nyen?
Kengo Yanga Aga na Kuâ
3. Fini ti lakue lakue teti Adam na Ève aluti na ndo ti nyen?
3 Nzapa amu yanga na Adam: “Mo lingbi te le-keke kue ti yaka tongana bê ti mo aye; me lë ti keke ti hinga nzoni na ti hinga sioni, mo te pepe; teti na lâ ni so mo te lë ni so, fade mo kui biani.” (Genèse 2:16, 17) Tongaso fini ti lakue lakue teti Adam na Ève ahunda mbeni ye; a hunda ala ti mä yanga ti Nzapa.
4. Tongana Adam na Ève asala siokpari, ngbanga ti nyen ala glisa beku ti fini ti lakue lakue na yâ Paradis?
4 Me ye ti vundu ni ayeke so, Adam na Ève ake ndia ti Nzapa. (Genèse 3:1-6) Na salango tongaso, ala ga awasiokpari, teti “siokpari ayeke kengo-ndia.” (1 Jean 3:4) Ye ti pekoni ayeke so Adam na Ève aduti mbeni pepe na beku ti fini ti lakue lakue. Ngbanga ti nyen? Teti “futa ti siokpari ayeke kui.” (aRomain 6:23) Ni la, tongana lo dë ngbanga na ndo Adam na Ève, Nzapa atene: “Fade mo kiri na pupu-sese, teti mo yeke pupu-sese.” Na pekoni, atomba akozo babâ na mama ti e na yâ kodoro ti ala ti Paradis. Na lâ ni so ala sala siokpari, Adam na Ève ato nda ti guengo ni yeke yeke me biani na kui.—Genèse 3:19, 23, 24.
“Kui Asi na Azo Kue”
5. Tongana nyen kuâ asi na azo kue?
5 Fadeso siokpari alï ngangu na yâ tele ti Adam na Ève. Ni la, ala lingbi pepe ti dü amolenge so ayeke mbilimbili-kue, legeoko tongana ti so moule so ayeke mbilimbili-kue pepe alingbi pepe ti sigigi na mbeni ye so ayeke mbilimbili-kue. (Job 14:4) Biani, dungo ti zo oko oko kue afa na gigi so akozo babâ na mama ti e aglisa seni so ayeke mbilimbili-kue na fini ti lakue lakue teti ala mveni nga teti hale ti ala. Paul, bazengele Chrétien asû na mbeti: “Na lege ti koli oko siokpari aga na sese na kui aga na lege ti siokpari, na tongaso kui asi na azo kue teti ala kue asala siokpari.”—aRomain 5:12, NW; haka ni na Psaume 51:7 (51:5, NW).
6. E yeke kui ngbanga ti nyen?
6 Laso, awasenda ye ahinga mbilimbili pepe ngbanga ti nyen azo ayeke ga mbakoro na ayeke kui. Ye oko, Bible afa so e kui ndali ti so adü e na yâ ti siokpari, e wara ye so tongana ye ti héritier na mbage ti akozo babâ na mama ti e. Me tongana e kui ye wa asi na e?