Kapa ti maï akode ti salango tënë na ti fango ye
ATÂA mo yeke maseka wala kangba, koli wala wali, ekole so alingbi ti mû maboko na mo ti sala tënë nga ti fa Tënë ti Nzapa nzoni ahon ti kozo.
Surveillant ti Ekole ti Kusala ti aChrétien ayeke mû ande adevoir na azo so ayeke na ekole ni. Na ndo ti alembeti ota so ayeke ga na peko, mo yeke wara ande mbeti ti mo ti awango. Numéro so aga kozo na awango nde nde alingbi na aye ti manda so ayeke na ndo alembeti so ayeke ga na peko. Na yâ aye ti manda so, a yeke fa na mo ande ye so andu salango kusala pendere mingi na akode ti salango tënë nga na ti fango ye. A yeke fa nga ngbanga ti nyen a yeke kota ye. Mo yeke wara nga ande wango so ayeke mû maboko na mo ti bâ tongana nyen ti sala ye so a hunda na mo.
Anzoroko so ayeke na ndo mbeti ti awango ni afa awango wa abâ adevoir so andu (1) dikongo ye na gbele azo, (2) mbeni démonstration ti azo use wala ahon so wala (3) mbeni diskur na gbele kongregation. Surveillant ti ekole ayeke mû ande mbeni mbilimbili wango so a lingbi mo sala na kusala. A yeke nzoni ti sala kusala na wango ni oko na oko. Mo yeke wara ande ye ti nzoni na salango kusala na aye ti tarango na tele so a hunda na zo ti sala na hunzingo ti ye ti manda so a mû. Tongana mo fa so mo sala ye nzoni alingbi na wango so ayeke na yâ ye ti manda ni, surveillant ni ayeke mû na mo ande mbeni wango nde.
Tongana mo yeke sala devoir ti mo tongana mbeni démonstration, a lingbi mo wara mbeni cadre ti devoir. Molongo ti acadre ti devoir ayeke na lembeti 82, me a hunda na mo pëpe ti ngbâ gi ge. Surveillant alingbi ti hunda na mo ti gi ti sala kusala na mbeni cadre si mo kiri mo wara kode mingi, wala lo lingbi ti zia mo ti soro ni.
Dikongo buku so nga salango kusala na aye ti tarango na tele, atâa tongana mo yeke leke pëpe devoir ti ekole, alingbi ti sala ye mingi na yâ guengo na li ni ti mo. Peut-être mo lingbi ti bâ ye ti manda nde nde na yenga oko oko tongaso.
Atâa a sala ngu oke awe si mo yeke na ekole wala mo yeke fa tënë, mo lingbi lakue ti maï akode ti mo. Zia mo wara ye ti nzoni kue na lege ti Ekole ti Kusala ti aChrétien.