Nda ni so a lingbi e tene mvene pëpe

BÂ SO mbeni molenge-wali atene na mama ti lo: “En, mbi yeke kiri hio na kodoro na peko ti ekole.” Me lo ngbâ lo sala ngia na akamarade ti lo, si na pekoni lo tene na mama ti lo: “Maître ti mbi agbanzi mbi na peko ti ekole.” A yeke duti ande nzoni ti tene mara ti tënë tongaso?—

Wala peut-être mbeni molenge-koli atene na babâ ti lo: “Mbi pika fade ballon na yâ ti da pëpe.” Ka tongana lo pika ni fade na yâ ti da, a yeke duti ande nzoni ti tene so lo pika ni pëpe?—

Kota Wafango ye afa na e nzoni ye so a lingbi e sala. Lo tene: ‘Zia si tënë ti mo En angbâ gi En, na Ên-ën angbâ gi Ên-ën; teti tënë kue so mo tene na ndo ni ayeke ti wato-sioni.’ (Matthieu 5:37). Jésus aye ti tene nyen?— Lo ye ti tene so a lingbi e sala gi ye so e tene e yeke sala.

Mbeni mbaï na yâ Bible ayeke dä so afa nene ni ti tene tâ tënë. A yeke mbaï ti azo use so atene ala yeke adisciple ti Jésus. Zia e bâ ye so asi.

Nze use ade ti hunzi pëpe na peko ti so Jésus akui, gbâ ti azo alondo na ando nde nde ala ga na Jérusalem ndali ti mbeni kota matanga ti aJuif so a hiri ni Pentecôte. Bazengele Pierre amû mbeni pendere diskur. Na yâ ni lo sala tënë ti Jésus, lo so Jéhovah azingo lo na popo ti akuâ. Ti mingi ti azo so aga na Jérusalem, mango ti ala tënë na ndo Jésus la. Ni la, ala ye ti hinga ye mingi na ndo ni. Ala sala nyen?

Ala ngbâ na Jérusalem aninga mingi. Me kete na pekoni, pata ti ambeni ahunzi, na a lingbi a mû pata na ala ti vo na kobe ti te. Adisciple ti Jésus so ayeke na Jérusalem aye ti mû maboko na ala. Tongaso, mingi ti ala akä aye ti ala, na ala ga na pata so ala wara na peko ti kango aye ni so na abazengele ti Jésus. Na pekoni, abazengele amû pata ni na ala so ye ayeke na ala pëpe.

Ananias na wali ti lo, Saphira, ayeke ambeni ita ti kongregation ti Jérusalem. Ala kä mbeni yaka ti ala. Zo oko ahunda ala ti kä ni pëpe. A londo na bê ti ala mveni. Me a yeke pëpe ngbanga ti so ala ye tënë ti afini disciple ti Jésus si ala kä yaka ti ala ni. Me, Ananias na Saphira aye ti fa na azo so ala yeke tâ nzoni mingi, andâ ye ni ayeke tongaso pëpe. Tongaso, ala mä tele ti tene so pata ni kue la si ala mû ndali ti azo. Me ti tâ tënë ni, a yeke gi mbeni mbage ti pata ni la si ala mû ni. Mo bâ ti mo ye so tongana nyen?—

Ananias aga abâ abazengele ni. Lo mû pata ni na ala. Me Nzapa ahinga nzoni so a yeke pata ni kue la si ala mû ni so pëpe. Tongaso, Nzapa afa na Pierre so Ananias ayeke tene mvene.

Pierre atene: ‘Ananias, teti nyen mo zia si Satan apusu mo ti sala ye so? Yaka ni ayeke ti mo. A hunda mo ti kä ni pëpe. Na même tongana mo kä ni, a yeke na mo ti bâ ye so mo lingbi ti sala na pata ni. Me ngbanga ti nyen mo yeke tene so pata ni kue la mo mû so, andâ a yeke gi mbeni mbage ni? Bâ, mo yeke tene mvene gi na e pëpe, me na Nzapa nga.’

Tënë ni ayeke ngangu. Ananias ayeke tene mvene! Lo sala ye so ayeke nde na tënë ti yanga ti lo. Me lo ye ti fa so a yeke tâ ye ni la. Bible afa na e ye so asi na pekoni. A tene: ‘Na mango atënë ti Pierre ni, Ananias atï na sese lo kui.’ Nzapa apika Ananias na kuâ. Na pekoni, a sigigi na kuâ ti lo a gue a lu ni.

Ngbonga ota tongaso na pekoni, Saphira asi. Lo hinga ye so asi na koli ti lo pëpe. Tongaso Pierre ahunda lo: ‘Pata so mo mû na e so, a yeke ti so mo na koli ti mo akä na yaka ni la?’

Saphira akiri tënë: ‘En, pata ti yaka ni kue la.’ So mvene la! Ala bata mbage ti pata ni ndali ti ala mveni. Tongaso, Nzapa apika nga Saphira na kuâ.—Kusala 5:1-11.

A lingbi e manda nyen na lege ti ye so asi na Ananias nga na Saphira?— A fa na e so Nzapa ake azo ti mvene. Lo ye lakue si e tene tâ tënë. Ye oko, azo mingi atene so a yeke na lege ni ti tene mvene. Ti mo, tënë ti azo so ayeke na lege ni?— Mo hinga so akobela, avundu, nga na kuâ na ndo ti sese kue aga na lege ti mbeni tënë ti mvene oko?—

Girisa pëpe, Zabolo atene lani mvene na kozo wali, Eve. Lo tene na Eve so tongana lo ke yanga ti Nzapa na lo te lê ti keke so Nzapa agbanzi lo ti te ni, lo yeke kui pëpe. Eve amä na bê na tënë ti Zabolo na lo te lê ti keke ni. Lo sala nga si Adam kue ate lê ti keke ni. Ala ga awasiokpari, na amolenge ti ala kue so ala yeke dü, ala yeke dü ala ande na yâ ti siokpari. Ndali ti so ala yeke awasiokpari, amolenge ti Adam kue ayeke bâ pasi na akui. Aye so kue aga na lege ti nyen?— A ga na lege ti mbeni mvene.

A yeke ye ti dongo bê pëpe so Jésus atene so Zabolo ayeke ‘zo ti tenengo mvene na babâ ti mvene’! Lo yeke kozo zo ti tenengo mvene. Tongana mbeni zo atene mvene, lo yeke sala tâ gi ye so Zabolo asala kozoni. Ni la, tongana e bâ so e ye ti tene mvene, zia si e gbu li ti e na ndo ye so.​—Jean 8:44.

Na ngoi wa mo bâ so mo ye ti tene mvene?— A yeke na ngoi so mo ye ti sala mbeni ye ti sioni, ni la ape?— Ye alingbi ti si so mo fâ mbeni ye na mbana pëpe. Tongana a hunda mo na ndo ni, a yeke nzoni ti tene so ita ti mo tongaso la si afâ ni? Wala a yeke nzoni ti tene so mo hinga pëpe tongana nyen la a si?—

Ka tongana a hunda mo ti manda mbeti ti mo, na mo manda gi mbage ni, a yeke nzoni ti tene so mo manda ni kue, atâa so mo manda ni kue pëpe?— Girisa ye so asi na Ananias nga na Saphira pëpe. Ala tene lani tâ tënë kue pëpe. Na Nzapa afa so a yeke sioni mingi na pikango ala na kuâ.

Tongaso, atâa ye so e lingbi ti sala, a yeke duti ande lakue nzoni pëpe ti tene mvene na ndo ni, na a yeke nzoni pëpe ti tene gi ndambo ti tâ tënë. Bible atene: ‘Tene tâ tënë.’ Lo tene nga: ‘I tene mvene na popo ti i pëpe.’ Jéhovah ayeke tene lakue tâ tënë, na lo ku ti tene e nga kue e tene tâ tënë.​—aEphésien 4:25; aColossien 3:9.