Dabe mo na Jéhovah nga na molenge ti lo

BÂ SO mbeni zo amû mbeni pendere ye na mo. Mo yeke sala ande ye tongana nyen?— Mo yeke tene ande gi merci na li ti mo agirisa na ndo zo ni biaku? Wala mo yeke dabe ti mo na lo nga na ye so lo sala ndali ti mo?—

Jéhovah Nzapa amû mbeni pendere ye na e. Lo tokua Molenge ti lo na sese ti kui ndali ti e. Mo hinga ngbanga ti nyen a lingbi Jésus akui ndali ti e?— A yeke mbeni kota tënë so a lingbi e hinga nzoni.

Tongana ti so e manda na chapitre 23 awe, Adam asala siokpari tongana lo ke mbilimbili ndia ti Nzapa. Na ndali ti so lo yeke babâ ti e kue, e wara siokpari na lege ti lo. Tongaso, e yeke na bezoin ti nyen?— E lingbi ti tene so e yeke na bezoin ti mbeni fini babâ, lo so aduti lani mbilimbili-kue na ndo ti sese. Ti mo, zo wa la alingbi ti duti babâ so?— Jésus.

Jéhovah atokua Jésus na ndo ti sese ti ga tongana babâ ti e ahon ti tene a duti Adam. Bible atene: ‘Adam, kozo zo ni, aga âme so ayeke na fini. Ndangba Adam ayeke yingo so amû fini.’ Kozo Adam ayeke lani zo wa?— Tâ gi lo so Nzapa aleke lo na pupu-sese. Use Adam ni ayeke zo wa?— Jésus. Bible afa ni tongana lo tene: ‘Kozo zo ni [Adam] ayeke ti sese, lo yeke pupu-sese; use Zo ni [Jésus] ayeke ti yayu.’​—1 aCorinthien 15:45, 47; Genèse 2:7.

Teti so Nzapa amû fini ti Jésus na yayu kâ lo zia ni na yâ ti Marie, Jésus awara siokpari ti Adam oko pëpe. A yeke nda ni la si Jésus ayeke lani mbilimbili-kue (Luc 1:30-35). A yeke nga nda ni la si mbeni ange atene lani na azo ti batango nyama tongana a dü Jésus: “A dü Sauveur na i laso.” (Luc 2:11). Me ti ga Sauveur ti e, a lingbi kete molenge Jésus asala nyen kozoni?— A lingbi lo kono lo ga koli, tongana Adam. Na pekoni awe si lo lingbi ti ga ‘use Adam ni’.

Jésus, Sauveur ti e, ayeke ga nga “Babâ [ti e] Ti Lakue Lakue”. Mbeni iri ti lo na yâ ti Bible la (Esaïe 9:5, 6). Tongana Adam asala siokpari, lo ga mbilimbili-kue pëpe. Ni la a hon ti tene lo si lo ga babâ ti e, Jésus la alingbi ti ga babâ ti e, ngbanga ti so lo yeke ti lo mbilimbili-kue. Tongaso si e lingbi ti soro ti wara ‘use Adam ni’ tongana babâ ti e. Me Jésus lo mveni ayeke Molenge ti Jéhovah Nzapa.

Na hingango Jésus yeke yeke, e lingbi ti yeda ti tene lo ga Sauveur ti e. Mo dabe ti mo na ye so a lingbi a zi e dä?— A lingbi a zi e na yâ siokpari nga na kui so e wara na lege ti Adam. Tongana Jésus aga kota awe, lo mû fini ti lo so ayeke mbilimbili-kue na sandaga ndali ti e. A hiri sandaga so kota ngele. Jéhovah amû kota ngele so ti tene a pardone siokpari ti e.​—Matthieu 20:28; aRomain 5:8; 6:23.

Biani, e ye ti girisa pëpe ye so Nzapa na Molenge ti lo asala ndali ti e, ni la ape?— Jésus afa lani na adisciple ti lo mbeni pendere lege so alingbi ti mû maboko na e ti dabe ti e na ye so lo sala. Zia e bâ ni.

Tara ti bâ tele ti mo na yâ ti mbeni da-nduzu na Jérusalem. Ndo avuko awe. Jésus na adisciple ti lo ayeke te kobe. Na ndo ti table ni a wara ambeni nyama ti kete taba so a yôro ni yorongo, mapa nga na vin. Kobe so ala yeke te ayeke nde mingi. Mo hinga ngbanga ti nyen?—

Kobe ni ayeke ti dabe ala na ye so Jéhovah asala ândö angu ngbangbo mingi awe tongana azo ti lo, amolenge ti Israël, ayeke angbâa na Egypte. Na ngoi ni kâ, Jéhovah atene na ala: ‘I fâ kete taba oko teti sewa oko, na i zia mênë ti lo na yanga ti ada ti i.’ Na pekoni lo tene: ‘I lï na yâ da ti i, na i te kete taba ni.’

Amolenge ti Israël asala tongaso. Na oko bï ni so, ange ti Jéhovah ahon na yâ kodoro ti Egypte. Na yâ mingi ti ada ni, ange ni afâ akozo molenge ni. Me tongana ange ni abâ mênë ti kete taba ni na ndo ayanga ti da, lo hon na ndo ni. Molenge oko akui na yâ ti ada so pëpe. Ye so ange ti Jéhovah asala azia kota mbito na bê ti Pharaon, gbia ti Egypte. Tongaso lo tene na amolenge ti Israël: ‘I londo i gue. I sigigi na Egypte!’ Na mango tënë so, ala zia akungba ti ala na ndo ti azambala na alele ti ala, na ala sigigi.

Jéhovah aye si azo ti lo agirisa pëpe tongana nyen lo zi ala lani. Ni la, lo tene na ala: ‘Fani oko na yâ ti ngu oko, a lingbi i te kobe tongana ti so i te na bï so.’ Ala hiri kobe so Pâque. Na bï ni so, ange ti Nzapa “ahon na ndo” ti ada so mênë ayeke na ndo ni.​—Exode 12:1-13, 24-27, 31.

Na ngoi so Jésus na abazengele ti lo ayeke te Pâque so, ala yeke gbu li ti ala na ndo ye so. Na pekoni, Jésus asala mbeni ye so ayeke kota mingi. Me kozoni na so, lo sala si bazengele Judas, so ayeke be-ta-zo pëpe, ahon. Na pekoni, Jésus amû mbeni mapa so angbâ, lo sambela na ndo ni, lo kungbi yâ ni na lo kangbi ni na adisciple ti lo. Lo tene: ‘I mû i te.’ Na pekoni lo tene na ala: ‘Mapa so ayeke fä ti tele ti mbi so mbi yeke mû ande tongana mbi kui ndali ti i.’

Jésus amû nga kopo so bengba vin ayeke na yâ ni. Lo sambela na ndo ni na lo mû merci. Na pekoni lo mû na ala lo tene: ‘I kue i mû i nyon.’ Na lo tene na ala: ‘Vin so ayeke fä ti mênë ti mbi. Mbi ga ndulu ti tuku mênë ti mbi ti zi i na yâ ti siokpari ti i. I sala ye so lakue ti dabe i na mbi.’​—Matthieu 26:26-28; 1 aCorinthien 11:23-26.

Mo mä so Jésus atene na adisciple so a lingbi ala sala ni lakue ti dabe ala na lo?— Ala yeke te kobe ti Pâque mbeni pëpe. Nde na so, fani oko na yâ ti ngu oko, ala yeke te kobe so ti dabe ala na Jésus nga na kuâ ti lo. A hiri matanga so Kobe ti Seigneur. Laso, e yeke hiri ni mingi Mémorial. Ngbanga ti nyen?— Ngbanga ti so a dabe e na ye so Jésus na Babâ ti lo, Jéhovah Nzapa, asala lani ndali ti e.

Mapa ayeke dabe e na tele ti Jésus. Lo yeda lani ti mû tele ti lo si e lingbi ti wara fini ti lakue lakue. Ka ti bengba vin ni?— A yeke dabe e na nene ngele ti mênë ti Jésus. A yeke tâ kota mingi ahon mênë ti kete taba so a fâ lo lani na Egypte. Mo hinga ngbanga ti nyen?— Bible atene so mênë ti Jésus alingbi ti sala si e wara pardon ti siokpari ti e. Na tongana a zi asiokpari ti e kue awe, e yeke tï kobela mbeni pëpe, wala e yeke ga mbakoro na e kui mbeni pëpe. A yeke nzoni e gbu li ti e na ndo ni tongana e gue na Mémorial.

Azo kue la ayeke te mapa na ayeke nyon vin na Mémorial ni?— Jésus atene lani na ala so ate mapa na anyon vin ni lo tene: ‘I yeke duti ande na yâ royaume ti mbi na ndo ti atrône na yayu na tele ti mbi.’ (Luc 22:19, 20, 30). So ti tene, ala yeke gue ande na yayu ti ga agbia legeoko na Jésus. Tongaso, gi ala so ayeke na beku ti komande legeoko na Jésus na yayu si ayeke te mapa na ayeke nyon vin ni.

Même ala so ayeke te mapa wala ayeke nyon vin ni pëpe, a yeke nzoni ala gue na Mémorial ni. Ngbanga ti nyen?— Ngbanga ti so Jésus amû fini ti lo ndali ti e nga. Na guengo na Mémorial, e yeke fa so e girisa ye so pëpe. E dabe ti e na pendere ye so Nzapa amû na e.