Tongana ye ti ngangu asi

Atâa so mo yeke sara kue ti duti na mbeni mariage nga na mbeni sewa so ayeke na ngia, ambeni ye so mo ku tere ti mo na ni ape alingbi ti si na a sara si a yeke duti ngangu na mo ti bata lakue ngia ti mo (Zo-ti-fa-tene 9:11). Na ndoye, Nzapa ayeke mû maboko na e tongana e tingbi na akpale. Tongana mo bata awango ti Bible, mo na sewa ti mo ayeke wara lege ande ti gbu lê ni, même na gbele aye so ayeke ngangu mingi.

1 ZIA BÊ TI MO KUE NA JÉHOVAH

YE SO BIBLE ATENE: “Ala bi agingo bê ti ala kue na ndo ti lo, ngbanga ti so lo yeke bi bê ti lo na ndo ti ala.” (1 Pierre 5:7). Hinga so Nzapa la ayeke na gunda ti atara ti mo ape (Jacques 1:13). Na ngoi so mo yeke ga nduru na lo, lo yeke sara kue ti mû maboko na mo (Ésaïe 41:10). “Fa tënë ti bê ti [mo] na gigi na gbele Lo.”​—Psaume 62:9.

Tongana mo yeke diko Bible nga mo yeke manda ni lâ na lâ, mo yeke wara dengo bê. Na nda ni, mo yeke hinga tongana nyen la Jéhovah “adë bê ti e na yâ ti ye ti vundu kue so e wara”. (2 aCorinthien 1:3, 4; aRomain 15:4). Lo tene so lo yeke mû na mo “siriri ti [lo] so ahon ndo ti bibe kue.”​—aPhilippien 4:6, 7, 13.

YE SO MO LINGBI TI SARA:

• Sambela ti tene Jéhovah amû maboko na mo ti duti kpô si mo gbu li ti mo nzoni

• Bâ aye nde nde kue so ayeke na gbele mo ti soro, na soro ti so ayeke nzoni mingi

2 BÂ LEGE TI MO WANI NGA NA TI SEWA TI MO

YE SO BIBLE ATENE: “Bê ti zo so ahinga nda ti ye awu na hingango ye, na mê ti zo ti ndara agi lege ti hinga ye.” (aProverbe 18:15). Gi ti bâ nzoni aye kue so andu tënë ni. Gi ti hinga bezoin ti azo ti sewa ti mo oko oko kue. Sara tënë na ala nga mä ala.​—aProverbe 20:5.

Ka tongana mbeni zo so mo ye lo mingi akui? Sara mbeto ape ti fa na gigi ye so ayeke na bê ti mo. Girisa ape so lani “Jésus atoto na ngu ti lê.” (Jean 11:35; Zo-ti-fa-tene 3:4). A yeke kota ye nga ti tene mo wu tere ti mo nzoni nga mo lango nzoni (Zo-ti-fa-tene 4:6). Ye so ayeke sara si a yeke ngangu na mo ape ti gbu lê ni.

YE SO MO LINGBI TI SARA:

• Kozo si mbeni ye ti ngangu asi, sara kue ti tene mo na azo ti sewa ti mo ayeke sara ka lisoro na popo ti ala. Tongana akpale asi, ala yeke gi bê ti ala ape ti sara tënë na mo

• Sara lisoro na azo so awara mara ti kpale ni so awe

3 GI TI TENE A MÛ MABOKO NA MO

YE SO BIBLE ATENE: “Tâ ndeko andoye lakue; na lâ ti ye ti vundu, lo yeke tongana tâ ita.” (aProverbe 17:17). Akamarade ti mo aye ti mû maboko na mo, me peut-être ala hinga ape ye so ala lingbi ti sara. Ni la, gbanzi tere ti mo ape ti tene na ala ye so mo yeke biani na bezoin ni (aProverbe 12:25). Na mbage, hunda ti tene azo so ahinga Bible nzoni amû maboko na mo. Wango ti Bible so ala yeke mû na mo ayeke edê mo.​—Jacques 5:14.

Mo yeke wara mungo maboko so mo yeke na bezoin ni tongana mo bungbi lakue na azo so amä na bê biani na Nzapa nga na aye so lo tene lo yeke sara ande. Mo yeke wara nga dengo bê tongana mo mû maboko na azo so ayeke na bezoin ti tene a dë bê ti ala. Fa nga na ala ngbanga ti nyen mo mä na bê na Jéhovah nga na atënë ti lo. Bi tere ti mo na yâ ti kua ti mungo maboko na azo so ayeke na bezoin ni, duti gi mo oko ape yongoro na azo so aye mo nga ayeke pensé na mo.​—aProverbe 18:1; 1 aCorinthien 15:58.

YE SO MO LINGBI TI SARA:

• Zi bê ti mo na mbeni kota kamarade ti mo nga zia lo mû maboko na mo

• Fa polele aye so mo yeke na bezoin ni mbilimbili