Voro Jéhovah na sewa

Tongana ti so mo manda na yâ ti brochure so, Bible asi singo na awango so alingbi ti mû maboko na mo nga na sewa ti mo. Jéhovah aye si mo duti na ngia. Lo tene so tongana mo zia vorongo lo na kozo ndo, “fade a yeke zia na [mo] aye so kue na ndo ni.” (Matthieu 6:33). Lo ye biani si mo duti kamarade ti lo. Sara kue ti maï songo ti mo na Nzapa. So ayeke mbeni pasa so ayeke kota ahon atanga ni kue.​—Matthieu 22:37, 38.

1 KPENGBA SONGO TI MO NA JÉHOVAH

YE SO BIBLE ATENE: “Mbi yeke duti ande babâ ti ala, na ala yeke duti ande amolenge ti mbi ti koli na amolenge ti mbi ti wali.” (2 aCorinthien 6:18). Nzapa aye si mo ga kota kamarade ti lo. Sambela ayeke mû lege na mo ti sara ni. Jéhovah awa mo ti “ngbâ ti sambela lakue.” (1 aThessalonicien 5:17). A nzere na lo ti mä mo na fango na lo atënë ti gbe ti bê ti mo nga na agingo bê ti mo (aPhilippien 4:6). Tongana mo na azo ti sewa ti mo asambela Nzapa, ala yeke bâ so mo yeke na ngangu songo na lo.

A yeke nzoni ti sara tënë na Nzapa, me a yeke nzoni nga ti mä lo. Mo lingbi ti sara tongaso na mandango Bible nga na ambeni mbeti ti Nzapa (Psaume 1:1, 2). Gbu li na ndo ti aye so mo manda (Psaume 77:12, 13). Ti mä Nzapa a hunda nga ti gue lakue na abungbi so a yeke voro lo dä.​—Psaume 122:1-4.

Ti sara tënë na azo na ndo ti Jéhovah ayeke nga mbeni lege so ayeke kota mingi ti kpengba songo ti mo na lo. Tongana mo yeke sara ni mingi, mo yeke bâ so mo yeke ga nduru na lo mingi nga.​—Matthieu 28:19, 20.

YE SO MO LINGBI TI SARA:

• Zia mbeni ngoi nde lâ oko oko so na yâ ni mo yeke diko Bible nga mo yeke sambela

• A yeke nzoni mo na sewa ti mo azia vorongo Nzapa na kozo ndo ahon sarango ngia

2 WARA NGIA NA VORONGO NZAPA NA SEWA

YE SO BIBLE ATENE: “Ala ga nduru na Nzapa, na fade lo yeke ga nduru na ala.” (Jacques 4:8). A yeke nzoni mo leke mbeni kapa ti voro Nzapa na sewa, nga mo sara ni lakue (Genèse 18:19). Me a ngbâ gi ge ape. A lingbi Nzapa aduti na yâ ti gigi ti sewa ti mo lâ na lâ. Kpengba songo ti sewa ti mo na Nzapa na sarango tënë na ndo ti lo “tongana mo yeke duti na da ti mo, tongana mo yeke tambela na lege, tongana mo gue ti lango, na tongana mo londo.” (Deutéronome 6:6, 7). Gi ti duti tongana Josué so atene: “Me mbi na azo ti da ti mbi, fade e sara na L’Éternel.”​—Josué 24:15.

YE SO MO LINGBI TI SARA:

• Duti na kapa ti mandango ye lakue so na yâ ni ala yeke gi ti kaï bezoin ti zo oko oko ti sewa ti mo