Lettre ti Bebungbi

Ita ti e wafango nzoni tënë:

So pendere pasa si e yeke na ni ti bungbi oko ti voro oko tâ Nzapa, Jéhovah! E yeke “sara kua oko” na lo na yâ ti kua so ayeke nzoni-kue so lo mû na e, so ayeke sö fini ti azo, kua ti fango nzoni tënë ti Royaume ti lo so akomanse kua awe (1 aCor. 3:9; Mat. 28:19, 20). Ti sara kua so na yâ ti dunia kue na yâ ti siriri nga beoko, a lingbi a leke yâ ti bungbi ti e nzoni si.​—1 aCor. 14:40.

Buku so ayeke mû maboko na mo ti hinga tongana nyen la congrégation ti aChrétien ayeke tambela laso. A yeke fa na mo akua so Jéhovah amû lege na mo ti sara ndali ti so mo yeke Témoin ti lo. Tongana mo bâ akua ni na nene ni nga mo sara ni na lege ni, mo yeke “kpengba na yâ ti mabe”.​—Kus. 16:4, 5; aGal. 6:5.

Ni la, e wa mo ti manda buku so nzoni. Gi ti bâ tongana nyen la mo lingbi ti sara ye alingbi na atënë ti yâ ni na yâ ti gigi ti mo. Na tapande, tongana mo ga wafango tënë so ade ti wara batême ape fini fini, aye wa la a lingbi mo sara ti wara batême si mo ga Témoin ti Jéhovah? Wala tongana mo wara batême awe, nyen la mo lingbi ti sara ti maï na lege ti yingo nga ti sara kua mingi ndali ti Jéhovah? (1 Tim. 4:15). Nyen la mo lingbi ti sara ti maï siriri na yâ ti congrégation? (2 aCor. 13:11). Mo yeke wara akiringo tënë na ahunda so na yâ ti buku so.

Tongana mo yeke ita-koli so awara batême awe, mo yeke sara tongana nyen ti ga wakua ti mungo maboko nga na pekoni ti ga ancien? So afini zo angbâ ti ga gbani gbani na yâ ti bungbi ti Jéhovah, a yeke tâ na kota bezoin ti aita-koli so akpengba na lege ti yingo ti tene ala mû li ni. Buku so ayeke mû ande maboko na mo ti hinga ye so mo lingbi ti sara ti ‘gi’ ti sara akua ni so.​—1 Tim. 3:1.

Sambela ti e ayeke ti tene buku so amû maboko na mo ti hinga place ti mo na yâ ti aye so Jéhovah aleke nga ti bâ ni na nene ni. E ye awafango tënë oko oko kue mingi nga e ngbâ lakue ti sambela ti tene mo nga kue mo duti ande na popo ti azo so ayeke voro Jéhovah, Babâ ti e ti yayu, lakue lakue.​—Ps. 37:10, 11; És. 65:21-25.