Bungbi so a leke ni ti sara ye so Jéhovah aye

NA YÂ ti dunia kue, a yeke wara gbâ ti abungbi ti vorongo Nzapa, abungbi ti poroso, abungbi ti dengo buze nga na ambeni nde. Akusala ti ala nga na aye so ala gi ti sara ayeke nde nde. Abango ndo ti ala nga na aye so ala leke ti sara ayeke nde nde. Me mbeni bungbi ayeke dä so ayeke tâ nde mingi na atanga ni kue. Bible afa polele so a yeke bungbi ti aTémoin ti Jéhovah.

² A nzere na e so mo nga kue mo yeke fadeso na yâ ti bungbi ti Jéhovah. So mo wani mo hinga biani ye so bê ti Nzapa aye awe so, mo yeke sara ye alingbi na ni fadeso (Ps. 143:10; aRom. 12:2). Mo yeke mbeni wakua ti Nzapa so ayeke sara kua na bê ti lo kue legeoko na bungbi ti aita ti sese kue so ndoye ayeke na popo ti ala (2 aCor. 6:4; 1 Pi. 2:17; 5:9). Tongana ti so Bible amû zendo ni, ye so ayeke ga na mo gbâ ti aye ti nzoni nga ayeke sara si mo yeke na ngia mingi (aProv. 10:22; Marc 10:30). Tongana mo yeke sara laso ye so bê ti Jéhovah aye, mo yeke leke terê ti mo ti wara ande mbeni pendere fini so ayeke ngbâ lakue lakue.—1 Tim. 6:18, 19; 1 Jean 2:17.

³ Nzapa so asara e, so ayeke kota mingi, ayeke na mbeni bungbi so ayeke nde mingi na yâ ti dunia kue, so lo yeke na ndö ni. Ye so afa so Jéhovah la ayeke fa lege na bungbi ni so, ndali ti so lo la lo yeke na ndö ti aye kue. E zia bê ti e kue na lo. Lo yeke Juge ti e, Zo ti lungo andia na e nga Gbia ti e (És. 33:22). Ndali ti so lo yeke Nzapa so aye si aye atambela na lege ni, lo leke aye nzoni ti mû maboko na e ti ‘sara kusala legeoko na lo’ na yâ ti aye so lo leke ti sara.—2 aCor. 6:1, 2.

⁴ So alango ti futingo aye ti ngoi so ayeke pusu nduru mingi so, Christ Jésus, Gbia so Nzapa asoro lo, ayeke fa lege na e na e yeke gue na li ni (És. 55:4; Apoc. 6:2; 11:15). Jésus wani atene lani so adisciple ti lo ayeke sara ande akua so ayeke kota ahon ti so lo sara na ngoi so lo fa lani tënë na ndö ti sese (Jean 14:12). A yeke tâ tënë ngbanga ti so adisciple ti Jésus ayeke fa ande tënë na yâ ti mbeni ngoi so ayeke ninga mingi, wungo ti ala ayeke gue ande gï na li ni nga ala yeke sara kua ni na yâ ti mbeni territoire so akono mingi. Ala yeke fa nzoni tënë ti Royaume juska na nda ti sese kue.—Mat. 24:14; 28:19, 20; Kus. 1:8.

⁵ Ye so aga tâ tënë awe. Ye oko, tongana ti so Jésus atene lani polele, kua ti fango nzoni tënë ayeke hunzi ande na ngoi so Jéhovah afa. Aprophétie ti Bible kue, so asara tënë na ndö ni, afa na e polele so kota lâ ti Jéhovah so amû mbeto mingi aga nduru ti si awe.—Joël 2:31; Soph. 1:14-18; 2:2, 3; 1 Pi. 4:7.

⁶ So e hinga ye so bê ti Jéhovah aye na yâ ti kete ngoi so angbâ so, a lingbi e sara ngangu ahon ti kozo ti sara ye so Nzapa ahunda na e. Ye so ahunda ti tene e hinga mbilimbili tongana nyen la bungbi ti Jéhovah ayeke tambela nga e sara kua maboko na maboko na ni na bê ti e kue. Lege so bungbi ni ayeke tambela na ni aluti na ndö ti amama-ndia ti Bible so na yâ ni mo yeke wara acommandement, andia nga na afango ye so ayeke na yâ ti Bible.—Ps. 19:7-9.

⁷ Tongana awakua ti Jéhovah asara ye alingbi na afango lege ti Bible so, ala yeke duti ndo oko nga ala yeke sara kua maboko na maboko na yâ ti siriri nga beoko (Ps. 133:1; És. 60:17; aRom. 14:19). Nyen la akpengba songo ti aita na ndo kue? A yeke ndoye. Ndoye la ayeke pusu e ti sara ye nga e yü ni na terê ti e (Jean 13:34, 35; aCol. 3:14). So Jéhovah asara si e duti beoko amû lege na e ti gue na li ni legeoko na mbage ti bungbi ti lo so ayeke na yayu.

MBAGE TI BUNGBI TI JÉHOVAH SO AYEKE NA YAYU

⁸ Ésaïe, Ézéchiel nga na Daniel, so ayeke aprophète, abâ lani vision na ndö ti mbage ti bungbi ti Jéhovah so ayeke na yayu (És., chap. 6; Ézéch., chap. 1; Dan. 7:9, 10). Na yâ ti mbeni vision, bazengele Jean nga kue abâ bungbi so ayeke na yayu so, na lo fa na e tënë kete na ndö ni na yâ ti mbeti ti Apocalypse. Lo bâ lani Jéhovah na ndö ti mbeni trône ti gloire na a-ange ayeke na terê ti lo. A-ange ni ayeke tene: “Jéhovah Nzapa ayeke nzoni-kue, nzoni-kue, nzoni-kue; Lo so ngangu ti lo ahon angangu kue, lo yeke dä ândö, lo yeke dä fadeso nga lo yeke ga.” (Apoc. 4:8). Jean abâ nga “mbeni molenge ti taba so . . . aluti na milieu ti trône ni”, Molenge ti taba ti Nzapa, Jésus Christ.—Apoc. 5:6, 13, 14; Jean 1:29.

⁹ So na yâ ti vision Jean abâ Jéhovah na ndö ti mbeni trône aye ti fa so Jéhovah la ayeke Li ti bungbi ni so. Na 1 Chronique 29:11, 12 asara tënë ti Jéhovah nga na kota ndo ti lo, a tene: “Jéhovah, mo yeke kota mingi, mo yeke ngangu mingi, kota ti mo apika bê mingi, mo yeke na gloire nga kota ti mo ayeke na ndö ti aye kue, ndali ti so aye kue so ayeke na yayu nga na sese ayeke ti mo. Jéhovah, royaume ayeke ti mo. Mo la mo yeke kota na ndö ti aye kue. Mosoro nga na gloire alondo na mo, na mo la mo komande na ndö ti aye kue. Mo yeke ngangu mingi, mo lingbi ti sara si azo aga kota nga mo mû ngangu na azo kue.”

¹⁰ Teti so Jésus Christ ayeke sara kua maboko na maboko na Jéhovah, lo yeke na kota ndo na yayu, nga Jéhovah amû na lo kota komandema. Biani, Nzapa azia “aye kue na gbe ti gere ti lo na lo sara si lo duti li ti aye kue ti congrégation”. (aÉph. 1:22). Bazengele Paul asara tënë na ndö ti Jésus, lo tene: “Nzapa ayâa lo na nduzu na mbeni kota ndo so ahon ti kozo ni, na nzoni bê Nzapa amû na lo iri so ayeke na ndö ti tanga ti airi kue, si na iri ti Jésus genou oko oko kue akuku; genou ti ala so ayeke na yayu, ti ala so ayeke na ndö ti sese nga na ti ala so ayeke na gbe ti sese, na yanga oko oko kue atene polele so Jésus Christ ayeke Seigneur ndali ti gloire ti Nzapa Babâ ni.” (aPhil. 2:9-11). Tongaso, e peut ti zia bê ti e kue na ndö ti komandema ti Jésus Christ so ayeke mbilimbili.

¹¹ Na yâ ti mbeni vision, prophète Daniel abâ Lo so ayeke dä ngbene ye giriri so aduti na ndö ti trône ti Lo, nga a-ange so wungo ti ala ayeke “saki oko fani saki oko [so] ayeke sara kua na lo, nga a-ange saki bale-oko fani saki bale-oko ayeke luti na gbele lo.” (Dan. 7:10). Bible atene so bungbi ti a-ange so ayeke ‘ayingo so ayeke sara kua so ayeke nzoni-kue. A tokua ala ti sara kua na azo so ayeke wara ande salut.’ (aHéb 1:14). A leke yâ ti bungbi ti a-ange so, si na yâ ni a yeke wara ‘atrône, amokonzi, agouvernement nga na akomandema.’—aCol. 1:16.

¹² Tongana e mû ngoi ti gbu li na ndö ti aye nde nde so a yeke wara na yâ ti mbage ti bungbi ti Jéhovah ti yayu so, e lingbi ti comprendre sarango ye ti terê ti Ésaïe na gbele vision so lo bâ lani, so na yâ ni lo bâ “Jéhovah . . . aduti na ndö ti trône so ayo na nduzu” na “aséraphin aluti na nduzu na ndö ti lo.” Lo tene: “Aï! Mbi kui awe! ndali ti so atënë ti yanga ti mbi ayeke nzoni-kue pëpe; nga mbi sara kodro na popo ti azo so tënë ti yanga ti ala ayeke nzoni-kue pëpe. Mbi bâ Gbia, Jéhovah ti aturugu, lo wani!” Biani, tongana Ésaïe abâ konongo ti bungbi ti Jéhovah, bê ti lo adö na lo sara terê ti lo kete. Ye so lo bâ asara ngangu mingi na ndö ti lo, ni la tongana lo mä mbeni go na yayu so ahunda na lo ti sara kota kua, so ayeke ti fa tënë ti angbanga so Jéhovah ayeke fâ ande, Ésaïe akiri tënë: “Mbi la! Tokua mbi!”—És. 6:1-5, 8.

¹³ Tongana e hinga bungbi ti Jéhovah tâ nzoni nga e bâ na nene ni ye so bungbi ni ayeke sara, a yeke pusu e ti sara ye tongana ti Ésaïe so. Na ngoi so bungbi ni ayeke gue na li ni, e yeke sara ngangu kue ti tambela legeoko na ni. E yeke sara kue ti fa na gigi so e zia bê ti e kue na bungbi ti Jéhovah laso.

BUNGBI TI JÉHOVAH AYEKE GUE NA LI NI

¹⁴ Na yâ ti chapitre 1 ti prophétie ti Ézéchiel, a fa Jéhovah so ayeke kpe na mbeni ngbongboro char na yayu. Char ni so aza zango ayeke fä ti mbage ti bungbi ti Jéhovah so ayeke na yayu. Lo yeke kpe na char ni, so ti tene lo yeke fa lege na ni na nzoni bê nga lo yeke sara kua na ni ti sara ye so lo leke na bê ti lo.—Ps. 103:20.

¹⁵ Na yâ ti roue oko oko ti char so, a yôro mbeni roue dä so alingbi terê na ni na so ahon na yâ ni si ayanga ti aroue ni kue asigi mbage na mbage. So aroue ni ayeke tongaso alingbi “ti hon na acoin osio”. (Ézéch. 1:17). Aroue ni alingbi ti changé hio ti mû mbeni lege nde. Ye oko, char so ayeke kpe gï lo wani ape. Jéhovah ayeke zia lege pëpe na bungbi ti lo ti mû lege ti bê ti lo. Ézéchiel 1:20 atene: “Ala yeke gue na ndö so yingo ni ayeke pusu ala ti gue dä.” Tongaso, Jéhovah wani la ayeke sara si bungbi ti lo ayeke gue na ndö so yingo ti lo aye ti tene bungbi ni ague dä. A lingbi e hunda terê ti e: “Eskê mbi yeke tambela legeoko na bungbi ni?”

¹⁶ Ti tambela legeoko na bungbi ti Jéhovah ayeke gï pëpe ti ga na abungbi nga ti fa tënë. Kozoni kue a yeke guengo na li ni nga na maïngo ti e na lege ti yingo. E “hinga biani aye so ayeke akota ye mingi ahon atanga ni”, nga e ngbâ lakue ti wara nzoni na lege ti programme ti kobe ti yingo (aPhil. 1:10; 4:8, 9; Jean 17:3). A lingbi e girisa nga ape so ti tene ye atambela nzoni na yâ ti mbeni bungbi, a lingbi a fa lege na ni nzoni nga azo so ayeke na yâ ni asara kua maboko na maboko. Tongaso, a lingbi e sara kua nzoni mingi na aye ti yingo nga na ti mitele so Jéhovah ayeke mû na e ti tene e sara na kua ti lo. Tongana e ngbâ ti tambela legeoko na char ti Jéhovah so ayeke na yayu, e yeke sara ye ague oko na tënë so e yeke fa na azo.

¹⁷ Na lege ti maboko so bungbi ti Jéhovah ayeke mû na e, e yeke gue na li ni na sarango ye so bê ti Nzapa aye. Girisa ape so a yeke Jéhovah la ayeke kpe na char ti yayu so. Ni la, ti ngbâ ti tambela legeoko na char ti Jéhovah afa so e ne lo na e zia bê ti e kue na Lo, so lo yeke Kota tênë ti e (Ps. 18:31). Bible amû zendo so: “Jéhovah ayeke mû ngangu na azo ti lo. Tufa ti Jéhovah ayeke sara si azo ti lo aduti na siriri.” (Ps. 29:11). Teti so e yeke laso na yâ ti bungbi ti Jéhovah, lo yeke mû na e ngangu nga e yeke bâ nzoni na lege ti siriri so lo zia na yâ ti bungbi ti lo. Biani, kite ayeke dä ape so e yeke ngbâ ti wara aye ti nzoni mingi tongana e sara ye so bê ti Jéhovah aye laso nga lakue lakue.