Nzapa ayeke zo wa?

1, 2. Mingi ni azo ayeke hunda terê ti ala na ndö ti aye wa?

AMOLENGE ayeke hunda tënë mingi. Mo lingbi ti fa nda ti mbeni ye na ala, me mingi ni ala yeke hunda mo: ‘Ka ngbanga ti nyen la ye ni ayeke tongaso?’ Nga, na ngoi so mo gi ti kiri tënë na ala, ala lingbi ti kiri ti hunda mo: ‘Me ngbanga ti nyen?’

² Atâa e yeke maseka wala mbakoro, e kue e yeke na ahundango ndo. Peut-être e yeke hunda terê ti e na ndö ti ye so e ye ti te wala bongo so e ye ti yü wala ye so e ye ti vo. Wala peut-être e yeke hunda terê ti e na akpengba tënë na ndö ti fini wala gigi ti kekereke. Me tongana e wara anzoni kiringo tënë na ahundango tënë so pëpe, e lingbi ti zia lege ti gi akiringo tënë ni.

3. Ngbanga ti nyen la azo mingi apensé so ala lingbi pëpe ti wara akiringo tënë na akpengba hundango ndo ti ala?

³ Bible akiri tënë na akpengba hundango ndo ti e? Ambeni zo alingbi ti pensé so Bible akiri tënë na ni, me ala bâ so a yeke ngangu ti mä yâ ti atënë ti Bible. Ala lingbi ti pensé so gï awafango ye wala aprêtre la ahinga akiringo tënë ni. Ti ambeni, kamene asara ala ti tene ala tene so ala hinga akiringo tënë ni pëpe. Mo tene ti mo nyen?

4, 5. Akpengba tënë wa la mo yeke hunda terê ti mo na ni? Ngbanga ti nyen a lingbi mo ngbâ ti gi akiringo tënë ni?

⁴ Peut-être mo ye ti wara akiringo tënë na ahundango tënë tongana: Ngbanga ti nyen la mbi yeke na fini? Nyen la ayeke si na mbi tongana mbi kui? Nzapa ayeke tongana nyen? Jésus, Wafango ye so azo ahinga lo mingi, atene: “Ala ngbâ ti hunda ye, na a yeke mû ni na ala. Ala ngbâ ti gi ye, na ala yeke wara ni. Ala ngbâ ti pika yanga-da, na a yeke zi ni na ala.” (Matthieu 7:7). Ngbâ ti gi akiringo tënë ni juska mo wara ati so mo lingbi ti zia bê ti mo dä.

⁵ Biani, tongana mo “ngbâ ti gi” akiringo tënë ni, mo yeke wara ni na yâ ti Bible (aProverbe 2:1-5). Akiringo tënë ni ayeke ngangu pëpe ti mä yâ ni. Ye so mo yeke manda ayeke sara si mo duti na ngia mingi laso nga ayeke mû na mo mbeni pendere beku ti kekereke. Zia e sara tënë na ndö ti mbeni hundango tënë so asara si li ti azo mingi aga kirikiri.

NZAPA AYEKE PENSÉ NA E LA? WALA LO YEKE SIONI MINGI?

6. Ngbanga ti nyen la ambeni zo abâ so Nzapa ayeke pensé na ala na yâ ti pasi ti ala ape?

⁶ Azo mingi abâ atene Nzapa ayeke pensé na e pëpe. Ala tene so tongana fade Nzapa ayeke pensé tâ na e, ka dunia ayeke duti fade tongaso ape. Bira, kengo zo nga na vundu ayeke na ndo kue. Azo ayeke tï kobela, ala yeke bâ pasi nga ala yeke kui. Ambeni zo ahunda terê ti ala: ‘Tongana Nzapa ayeke pensé na e, ngbanga ti nyen la lo kanga lege na apasi so kue ape?’

7. (a) Tongana nyen la akota zo ti nzapa afa na azo so Nzapa ayeke sioni mingi? (b) Nyen la afa so a lingbi a bi tënë pëpe na li ti Nzapa ndali ti asioni ye so asi?

⁷ Na ambeni ngoi, akota zo ti nzapa asara si azo abâ so Nzapa ayeke sioni mingi. Tongana mbeni ye ti ngangu asi, ala yeke tene so ye so Nzapa aye la. Ala yeke tene so lo la lo ye ti tene ye ni asi. Na tenengo tongaso, ala yeke bi tënë na li ti Nzapa. Me Bible afa so Nzapa ayeke na peko ti ye ti sioni lâ oko pëpe. Jacques 1:13 atene na e so Nzapa ayeke tara zo oko na aye ti sioni pëpe. Versê ni atene: “Tongana mbeni zo ayeke na yâ ti tara, zia lo tene pëpe: ‘Nzapa la si azia mbi na yâ ti tara so.’ Ndali ti so aye ti sioni alingbi ti zia Nzapa na tara pëpe na lo wani lo yeke tara bê ti mbeni zo na aye tongaso pëpe.” Ye so aye ti tene so atâa so Nzapa akanga lege pëpe na asioni ye, lo sara lâ oko pëpe si aye so asi. (Diko Job 34:10, 12.) Zia e bâ mbeni tapande.

8, 9. Mû mbeni tapande ti fa ngbanga ti nyen a yeke na lege ni pëpe ti bi tënë ti akpale ti e na li ti Nzapa.

⁸ Zia e bâ mbeni tapande: Mbeni maseka-koli ayeke lango na gbe ti babâ na mama ti lo. Babâ ti lo aye lo mingi na lo fa na lo tongana nyen ti mû anzoni desizion. Na mbeni ngoi, maseka ni asara kpengbango-li na terê ti babâ ti lo na lo quitté da ni. Lo sara asioni ye nga lo wara kpale. Mo yeke bi tënë na li ti babâ ni ngbanga ti so lo kanga lege pëpe na molenge ni ti hon? Oko pëpe (Luc 15:11-13). Legeoko tongana ti babâ so, Nzapa akanga lege pëpe na azo na ngoi so ala soro ti sara kpengbango-li nga ti sara sioni ye. Tongaso, tongana mbeni sioni ye asi, a lingbi e dabe ti e so Nzapa la asara pëpe si asi. A yeke na lege ni pëpe ti bi tënë na li ti Nzapa.

⁹ Mbeni nzoni raison ayeke dä so ndali ni Nzapa akanga lege pëpe na asioni ye ti si. Na chapitre 11, mo yeke manda ande ye so Bible atene na ndö ni. Me a lingbi mo hinga biani so Nzapa aye e nga so a lingbi e bi tënë ti akpale ti e na li ti lo lâ oko pëpe. Biani, lo yeke gï oko Zo so alingbi ti leke akpale ti e.​—Ésaïe 33:2.

10. Ngbanga ti nyen la e yeke na kite pëpe so Nzapa ayeke zi ande asioni ye kue so azo asara?

¹⁰ Nzapa ayeke nzoni-kue (Ésaïe 6:3). Aye kue so lo sara ayeke nzoni-kue, sioni ayeke dä pëpe nga ayeke nzoni. Tongaso, e lingbi ti zia bê ti e na lo. Azo ayeke tongaso pëpe. Na ambeni ngoi ala yeke sara asioni ye. Nga même mbeni nzoni zo so ayeke komande so asara ye na lege ni mingi ayeke na ngangu pëpe ti zi asioni ye kue so asioni zo asara. Zo oko ayeke na mara ngangu so Nzapa ayeke na ni pëpe. Nzapa ayeke na ngangu ti zi sioni ye kue so asioni zo asara nga lo ye ti sara ni. Lo yeke zi ande asioni ye kue teti lakue lakue.​—Diko Psaume 37:9-11.

PASI TI AZO ASARA NZAPA TONGANA NYEN?

11. Pasi so mo yeke bâ asara Nzapa tongana nyen?

¹¹ Aye so ayeke passé na yâ ti dunia nga na aye so asi na mo asara Nzapa tongana nyen? Bible afa so Nzapa “aye fango ngbanga ti mbilimbili”. (Psaume 37:28). Tongaso, lo yeke pensé mingi na aye ti nzoni nga na aye ti sioni so ayeke si. Lo ye pëpe ti tene azo abâ pasi. Bible atene so “bê ti lo ayeke na vundu” na ngoi so lo bâ lani asioni ye mingi na ndö ti sese giriri (Genèse 6:5, 6). Nzapa achangé pëpe (Malachie 3:6). Bible atene so Nzapa ayeke pensé biani na mo.​—Diko 1 Pierre 5:7.

12, 13. (a) Ngbanga ti nyen la e ndoye azo nga e yeke pensé na ala? Pasi so ayeke na yâ ti dunia asara e tongana nyen? (b) Ngbanga ti nyen la e hinga biani so Nzapa ayeke zi ande apasi nga na aye ti kirikiri kue?

¹² Bible atene nga so Nzapa aleke e na image ti lo. So aye ti tene so lo leke e na mara ti anzoni sarango ye so lo yeke na ni. Tongaso, tongana a sara mo nzoni pëpe ti bâ azo so asara ye oko pëpe abâ pasi senge senge, a doit ti sara Nzapa nzoni oko pëpe tongana lo bâ ni. E hinga ni tongana nyen?

¹³ Bible afa na e so “Nzapa ayeke ndoye.” (1 Jean 4:8). Ndoye la apusu Nzapa ti sara ye kue. Tongaso, e yeke ndoye azo ndali ti so Nzapa andoye azo. Gbu li ti mo kete. Tongana mo yeke fade na ngangu, mo yeke zi apasi nga na aye ti kirikiri kue na yâ ti dunia ape? Biani mo yeke sara ni ndali ti so mo ye azo. Ka ti Nzapa ayeke tongana nyen? Lo yeke na ngangu, nga ndali ti so lo ye e, lo yeke zi ande apasi nga na aye ti kirikiri kue. Hinga so azendo kue so Nzapa amû, so ayeke na tonga nda ti mbeti so, ayeke ga ande tâ tënë. Me ti zia bê ti mo kue na azendo so, mo bezoin ti hinga ye mingi na ndö ti Nzapa.

NZAPA AYE TI TENE MO HINGA LO

14. Iri ti Nzapa ayeke nyen? E hinga tongana nyen so a lingbi e di iri ni?

¹⁴ Tongana mo ye ti ga kamarade ti mbeni zo, nyen la mo yeke fa na lo kozo? Iri ti mo. Nzapa ayeke na iri? Mingi ti abungbi ti nzapa atene iri ti lo ayeke Nzapa wala Seigneur, me so ayeke airi la pëpe. A yeke gï atitre tongana “gbia” wala “président.” Nzapa atene na e so iri ti lo ayeke Jéhovah. Psaume 83:18 atene: “Zia si azo ahinga so, mo so iri ti mo ayeke Jéhovah, Mo oko la mo yeke Lo so ayeke na nduzu na ndö ti aye kue, na ndö ti sese kue.” Azo so asû Bible asara kua na iri ti Nzapa saki mingi na yâ ti Bible. Nzapa aye ti tene mo hinga iri ti lo na mo di ni. Lo fa na mo iri ti lo tongaso si mo lingbi ti ga kamarade ti lo.

15. Nda ti iri Jéhovah ayeke nyen?

¹⁵ Nda ti iri ti Nzapa, Jéhovah, ayeke kota mingi. A ye ti fa so Nzapa alingbi ti sara ye kue so lo mû zendo ni nga lo yeke sara ye kue so lo leke na bê ti lo ti sara. Ye oko ti kanga lege na lo ayeke dä pëpe. Gï Jéhovah la alingbi ti duti na iri ni so.a

16, 17. (a) “Mo so ngangu ti mo ahon angangu kue” aye ti tene nyen? (b) “Gbia ti lakue lakue” aye ti tene nyen? (c) “Lo so asara aye kue” aye ti tene nyen?

¹⁶ Tongana ti so e diko fade, Psaume 83:18 atene na ndö ti Jéhovah, atene: “Mo oko la mo yeke Lo so ayeke na nduzu na ndö ti aye kue.” Nga, Apocalypse 15:3 atene: “Jéhovah Nzapa, Mo so ngangu ti mo ahon angangu kue, akusala ti mo ayeke kota mingi nga ayeke ye ti dongo bê. Gbia ti lakue lakue, alege ti mo ayeke mbilimbili nga ayeke atâ lege biani.” Tënë “Mo so ngangu ti mo ahon angangu kue” aye ti tene nyen? A ye ti tene so Jéhovah ayeke na ngangu mingi ahon azo kue na yâ ti dunia. Nga nda ti tënë “Gbia ti lakue lakue” aye ti tene so lo yeke lakue gï dä. Psaume 90:2 afa so lo yeke dä ngbene ye lakue lakue nga lakue lakue. Ye so ahon tâ gbungo li ti zo!

¹⁷ Jéhovah oko la ayeke Lo so asara aye kue. Apocalypse 4:11 atene: “Jéhovah, mo so mo yeke Nzapa ti e, mo lingbi biani ti wara gloire, nengo nga na ngangu ngbanga ti so mo la mo sara aye kue, nga a yeke ndali ti ye so bê ti mo aye si aye ni ayeke dä na a sara ala.” Jéhovah asara aye kue ti londo na a-ange na yayu ti si na atongoro na lê ti nduzu na alê ti akeke nga na anyama.

MO LINGBI TI GA KAMARADE TI NZAPA?

18. Ngbanga ti nyen la ambeni zo alingbi ti pensé so ala lingbi ti ga kamarade ti Nzapa lâ oko ape? Bible atene ti lo nyen na ndö ni?

¹⁸ Tongana ambeni zo adiko ye na ndö ti asarango ye ti Jéhovah so apika bê mingi, mbeto asara ala nga ala tene: ‘Nzapa ayeke ngangu mingi, lo yeke kota mingi, nga lo yo na e mingi, lo lingbi ti pensé na mbi pëpe.’ Me Nzapa aye ti tene e pensé tongaso? Ên-ën. Jéhovah aye ti ga nduru na e. Bible atene so Nzapa ayeke “yongoro pëpe na e oko oko kue.” (Kusala 17:27). Nzapa aye ti tene mo ga nduru na lo, nga lo mû zendo so “lo yeke ga ande nduru na [mo].”​—Jacques 4:8.

19. (a) Tongana nyen la mo lingbi ti ga kamarade ti Nzapa? (b) Na popo ti asarango ye ti Jéhovah ti so wa la mo ye ni mingi?

¹⁹ Tongana nyen la mo lingbi ti ga kamarade ti Nzapa? Jésus atene: “Ti wara fini ti lakue lakue, a lingbi ala gi ti hinga mo, mo oko tâ Nzapa, nga na lo so mo tokua lo, Jésus Christ.” (Jean 17:3). Ngbâ ti manda Bible, na mo yeke hinga ande Jéhovah nga na Jésus. Tongaso, mo lingbi ti wara ande fini ti lakue lakue. Na tapande e manda fade awe so “Nzapa ayeke ndoye”. (1 Jean 4:16). Me lo yeke nga na ambeni pendere sarango ye mingi. Bible atene na e so Jéhovah ayeke “Nzapa so asara nzoni bê na zo nga so abâ mawa ti zo, lo sara ngonzo hio hio pëpe, lo si singo na tâ ndoye nga na tâ tënë”. (Exode 34:6). Jéhovah ayeke “nzoni nga [lo] yeke nduru ti pardonné zo”. (Psaume 86:5). Nzapa ayeke kanga bê nga lo yeke be-ta-zo (2 Pierre 3:9; Apocalypse 15:4). Tongana mo diko ye na ndö ti lo na yâ ti Bible, mo yeke hinga ye mingi na ndö ti apendere sarango ye ti lo.

20-22. (a) Tongana nyen la e lingbi ti bâ so e yeke nduru na Nzapa atâa so e lingbi ti bâ lo ape? (b) Nyen la a lingbi mo sara tongana ambeni zo aye ti tene mo zia lege ti mandango Bible?

²⁰ Tongana nyen la mo lingbi ti bâ so mo yeke nduru na Nzapa atâa so mo lingbi ti bâ lo ape? (Jean 1:18; 4:24; 1 Timothée 1:17). Tongana mo diko ye na ndö ti Jéhovah na yâ ti Bible, mo yeke ga ti hinga so lo yeke dä biani (Psaume 27:4; aRomain 1:20). Na ngoi so mo yeke manda ye mingi na ndö ti Jéhovah, mo yeke ye lo mingi ahon ti kozo nga mo yeke bâ so mo yeke nduru mingi na lo.

²¹ Mo yeke hinga ande so Jéhovah ayeke Babâ ti e (Matthieu 6:9). Lo mû na e fini, nga lo ye si e duti na fini so ayeke pendere mingi. A yeke ye so mbeni babâ so ayeke na ndoye aye ndali ti amolenge ti lo la (Psaume 36:9). Biani, Bible afa so mo lingbi ti ga kamarade ti Jéhovah (Jacques 2:23). Bâ kete si. Jéhovah, Lo so asara aye kue so ayeke na yâ ti dunia, aye ti tene mo ga kamarade ti lo.

²² Peut-être ambeni zo aye ti tene mo zia lege ti mandango Bible. Peut-être ala sara mbeto ti tene mo changé bungbi ti nzapa ti mo. Me zia lege na zo oko pëpe ti kanga lege na mo ti ga kamarade ti Jéhovah. Lo yeke nzoni Kamarade so mo lingbi ti wara mara ni pëpe.

23, 24. (a) Ngbanga ti nyen la a lingbi mo ngbâ ti hunda atënë? (b) Nyen la e yeke bâ na yâ ti chapitre ti peko?

²³ Na ngoi so mo yeke manda Bible, ambeni ye ayeke dä so mo yeke mä ande yâ ni pëpe. Sara kamene pëpe ti hunda atënë wala ti hunda mungo maboko. Jésus atene lani so a lingbi e sara terê ti e kete tongana akete molenge (Matthieu 18:2-4). Amolenge ayeke hunda ka tënë mingi. Nzapa aye ti tene mo wara akiringo tënë na ahundango tënë ti mo. Tongaso, manda Bible nzoni ti hinga biani so aye so mo yeke manda ayeke tâ tënë.​—Diko Kusala 17:11.

²⁴ Nzoni lege ti manda ye na ndö ti Jéhovah ayeke ti manda Bible. Na yâ ti chapitre ti peko, e yeke hinga ngbanga ti nyen la Bible ayeke nde na tanga ti ambeti kue.