POINT 14

Sara si akota tënë ni asigi polele

aHébreu 8:1

NA NDURU TËNË: Mû maboko na azo so ayeke mä mo ti dengi mê na ngoi so mo yeke sara diskur, fa polele tongana nyen la akota tënë ni oko oko kue ague oko na ye so mo zia na gbele mo ti si dä nga na mama-tene ti mo.

LEGE TI SARANGO NI:

Zia mbeni ye na gbele mo. Bâ wala nda ti diskur ti mo ni ayeke ti mû sango na azo, ti ga na ala ti yeda na mbeni ye wala ti wa ala ti sara mbeni ye nga sara ni alingbi na aye ni so. Bâ si akota tënë ni kue a-aidé mo ti si na ye so mo zia na gbele mo.

Hunda terê ti mo: ‘Atënë wa la azo so ayeke mä mbi alingbi ti hunda terê ti ala na ni na ndö ti tënë so mbi yeke fa so?’ Tongana ala wara kiringo tënë ni awe ati so wa la ala yeke kiri ti hunda? Na pekoni, leke yâ ti atënë ti mo alingbi na ni tongaso si azo so ayeke mä mo alingbi ti dengi mê na mo, ti mä yâ ti atënë ni nga ti yeda na ni.
Gboto lê na ndö ti mama-tene ti diskur ti mo. Kiri na ndö ti mama-tene ni na yâ ti diskur ti mo ni kue na lege so mo kiri na ndö ti akota tënë ni fani mingi wala mo mû ambeni mara tënë ni ti fa na ndani.
Sara si akota tënë ti mo aduti polele nga akpengba ape. Soro gï akota tënë so ague oko na mama-tene ti mo ni nga so mo lingbi biani ti zi ndani na yâ ti ngoi so a mû na mo. Bâ wungo ti akota tënë so mo ye ti fa, fa akota tënë ni polele, kozo si mo hon na mbeni kota tënë ni nde luti kete, nga zia si a mä terê nzoni.

Mo lingbi ti fa akota tënë ti mo na yâ ti atënë ti mo ti tongo nda ni ti aidé azo so ayeke mä mo ti dengi mê na mo, wala kiri na ndö ni na yâ ti atënë ti mo ti nda ni ti aidé ala ti dabe ti ala na ni.