Tene “Chrétien” Ayeke Glisa Ngangu ti Lo?
TI DUTI mbeni Chrétien aye ti tene nyen? Mo yeke kiri tene tongana nyen? A hunda tene so na ambeni zo so a soro ala gi tongaso na yâ akodoro nde nde, na ba ambeni kiringo tene ti ala:
“Ti mu peko ti Jésus na ti manda tapande ti lo.”
“Ti duti nzoni zo na ti kangbi ye na ambeni zo.”
“Ti yeda na Christ tongana Seigneur na Wasongo zo.”
“Ti gue na Messe, ti sambela ‘Marie mbi bala mo,’ na ti te Communion.”
“Ti mbi, a hunda pepe ti gue na église si zo aduti mbeni Chrétien.”
Même abakari afa nda ti tene so na alege nde nde, a sala si li ti zo aga kirikiri. Biani, mbeni bakari ayeke na anda ti tene bale oko teti “Chrétien,” so alondo na “mango na bê wala dutingo na yâ ti lege ti vorongo ti Jésus Christ” ti si na “mbeni zo so ayeke nzoni wala so alingbi.” A yeke ye ti dongo bê pepe so azo mingi aba so a yeke ngangu ti fa nda ti ye so dutingo mbeni Chrétien aye ti tene.
Mbeni Bibe ti Zingo Lege na Aye
Laso, na popo ti azo so atene ala yeke Chrétien, même na popo ti ala so aduti na ndo mbata oko, a lingbi ti wara gbâ ti abango ndo nde nde na ndo tene ti dutingo ti Nzapa tongana lingu ti Bible, tene ti évolution, bingo tele ti église na yâ poroso, nga kangbingo mabe na ambeni zo nde. Atene ti nzoni salango ye, na tapande na ndo tukungo ngo, bungbingo koli na koli wala wali na wali, nga ti akoli na wali so aduti oko me pepe na yâ songo ti mariage, aga mingi ni mbeni kota lingu ti dengo gaba. Bibe ni ayeke biani ti zi lege na aye.
Na tapande, a de ti ninga pepe, mbeni da-ngbanga ti aProtestant asala vote ti mu mbage ti droit ti église ti “soro mbeni ancien, so ayeke sala lango sioni na mba ti lo koli na a honde tene ni pepe, ti duti na popo ti azo so amu li ni,” tongana ti so mbeni mbeti-sango (Christian Century) atene. Ambeni wandara ti alege ti vorongo ayeke fa même so mabe na Jésus ayeke kota ye pepe ti wara salut. Mbeni tondo ti The New York Times atene, ti awandara so, aJuif, aMusulman, na azo ti ambeni lege ti vorongo nde “alingbi nga peut-être ti lï na yayu [legeoko tongana aChrétien].”
Tara ti ba mbeni zo so amu peko ti tene ti Marx na mungo mbage ti capitalisme wala mbeni zo ti démocratie na maïngo komandengo na ngangu, wala mbeni zo so amu mbage ti batango ndo so angoro e na mungo mbage ti futingo gbako. Mo lingbi ti tene: “Zo so alingbi pepe ti duti biani zo so amu peko ti tene ti Marx wala zo ti démocratie wala zo ti batango ndo so angoro e,” na tene ti mo ayeke na lege ni. Ye oko, tongana mo ba nzoni abango ndo nde nde so azo so laso atene ala yeke Chrétien ayeke na ni, mo yeke ba atene ti mabe so kangbi aduti mingi na popo ti ala, nga so mingi ni ake ye so Zo so asigigi na lege ti vorongo ti aChrétien, Jésus Christ, afa. Abango ndo nde nde so afa nyen na ndo mara ti Lege ti vorongo ti ala ti aChrétien?—1 aCorinthien 1:10.
Kota nzala ti gbian afango ye ti aChrétien ti lingbi na bibe ti ngoi ni ayeke fini ye oko pepe, tongana ti so e yeke ba ande. Bibe ti Nzapa na ti Jésus Christ ayeke tongana nyen na ndo ti agbiango ye so? A-église so amaï afango ye so gunda ni alondo pepe na Christ alingbi ti di iri ti ala tâ na lege ni aChrétien? A yeke ba ahundango tene so na yâ article ti peko.