Wara Yingo-ti-hinga so A Fa Lege na Ni
A kpa mbeni lango so a lingbi ti glisa pepe teti azo so amu lapara ni nga teti azo ti kua ni so ayeke na yâ Air New Zealand Vol 901 so ayeke gue na Antarctique. Azo ayeke leke na ngia aye ti ala ti mungo na foto na ala yeke na nzerengo tele mingi na ngoi so lapara DC-10 ayeke huru ndulu na sese so avulu kue ngbanga ti neige, si ala lingbi ba pendere ni mbilimbili.
KAPITA ni akpe na alapara teti angu 15, na lo sala angbonga ahon 11 000 na kpengo na ala. Kozoni si lapara ni ahuru, lo yôro na hange mingi na yâ ordinateur ti lapara ti lo plan ti voyage ni (asango kue so a leke kozoni ti mu lege na lapara ni ti si na ndo so lo ye ti gue dä), me kapita ni ahinga pepe so asango so a mu na lo ayeke na lege ni pepe. Na ngoi so lo huru na yâ ti mbeni mbinda gi amètre 600 ndulu na sese, lapara DC-10 akpo na ngangu Hoto ti Erebus na azo 257 kue so ayeke na yâ ni awara kuâ.
Legeoko tongana ti so alapara aku laso a-ordinateur ti fa lege na ala na le-nduzu, a mu nga na azo yingo-ti-hinga ti fa lege na ala na yâ fini ti ala kue. Nga sioni ndao ti Vol 901 alingbi ti fa na e ambeni ngangu ye ti manda na ndo yingo-ti-hinga ti e. Ti ba na tapande, legeoko tongana ti so salango mbeni voyage na yâ ti siriri aluti na ndo ti nzoni tambelango ti aye so amu lege ti kpe na lapara nga na ambilimbili ye ti fango lege na ni, nzoni duti ti e na lege ti yingo, ti bibe na même ti mitele aluti nga na ndo ti mbeni yingo-ti-hinga so ayeda na ambilimbili ye so afa lege na salango ye ti zo.
Vundu ni ayeke so, na yâ sese ti laso, mara ti afango lege tongaso ayeke glisa hio wala a yeda na ni pepe. Mbeni wafango mbeti atene: “Laso e mä gbâ ti atene na ndo mingi ti amolenge-koli na États-Unis ti Amerika so ahinga pepe tongana nyen ti diko na ti sû mbeti, nga so a yeke kpale na ala ti wara France na ndo ti mbeni carte. A yeke nga tâ tene so ala yeke na kpale ti zia kangbi na popo ti nzoni na sioni. Na ndo ti hingango pepe tongana nyen ti diko na ti sû mbeti nga tongana nyen ti diko wungo ti aye, a lingbi e zia na ndo ti akpale mingi so a wara na yâ mandango mbeti ye so: salango ye kirikiri ti azo.” Lo tene nga so “apendere ti laso aba mbilimbili pepe salango ye so ayeke tâ na lege ni. Hunda mbeni oko na popo ti ala ti fa wala ambeni ndia ti fa aye tongana ‘nzoni na sioni’ ayeke biani dä, na fade fade mo yeke ba so mo luti na gbele mbeni zo so li ti lo akpe, so ahinga pepe ye so a lingbi lo tene, na so mbito na gingo bê asala lo. . . . Na ngoi so lo gue na kota da-mbeti, a hon ti tene lo to nda ti ba ndo nzoni, ye ni akiri aga sioni ahon.”
Mbeni ye so asala si azo aba ndo mbilimbili pepe ayeke tene ti azo mingi so atene alege nde nde ti salango ye andu ye so anzere na zo oko oko wala ndo so lo londo dä. Bi bê kete na ye so alingbi ti si tongana awakpengo na lapara akpe, pepe na mungo peko ti ando so a leke ni nzoni na so angbâ na ndo oko, me na mungo peko ti awâ so alondo aza nga so ngoi na ngoi a wara ala oko pepe! Ka biani mara ti kota ndao tongana ti so asi na Hoto ti Erebus ayeke si mingi. Legeoko nga, teti so lo zia lege ti akpengba-ndia ti salango ye so ayengi lâ oko pepe, sese awara lakue gi aye so amu vundu mingi nga na kui na ngoi so dutingo be-ta-zo pepe na popo ti koli na wali akangbi yâ ti asewa na azo kutu mingi ahu pono ti kobela ti SIDA wala ambeni kobela nde ti koli na wali.
Tene so alege nde nde ti salango ye andu ye so anzere na zo oko oko wala ndo so lo londo dä alingbi ti kpa mbeni ye ti tâ ndara, me ti biani azo so amu pekoni ayeke tongana azo ti Ninive ti giriri so ahinga pepe “koti na gati ti ala.” Ala so asala ye so anzere na ala mveni wala ndo so ala londo dä ayeke tongana azo ti Israël so abele mabe ti ala na so adi iri ti “sioye nzoye, na a di iri ti nzoye sioye.”—Jonas 4:11; Esaïe 5:20.
Tongaso, e lingbi ti gue na mbage ti zo wa ti wara andia nga na akpengba-ndia so ayeke polele na so alingbi ti gbu nda ni nzoni, so e lingbi ti sala kusala na ala ti fa lege na yingo-ti-hinga ti e si a fa lege na e mbilimbili? Azo kutu mingi aba so Bible amu biani aye kue so alingbi. A to nda ni na nzoni tambela ti si na bibe ti sala kua na lege ni, nga a to nda ni na fango lege na molenge ti si na vorongo Nzapa, Bible aglisa mbeni ye ti kota oko pepe. (2 Timothée 3:16) Na yâ asiècle mingi so ahon, lo fa so a lingbi ti zia bê kue na lo. Teti so a yeke Wasalango e, kota wandara, si azia na sese akpengba-ndia ti nzoni salango ye ti Bible, a ndu azo kue. Tongaso, e yeke na nda ti tene oko pepe ti duti na fini na hingango pepe ye so ayeke nzoni na sioni.
Ye oko, na ngoi ti e, aye asala ngangu na ndo hingango ye ti mo mingi ahon ti kozoni. A lingbi ti duti tongaso tongana nyen? Na tongana nyen mo lingbi ti bata yingo-ti-hinga ti mo nzoni? Lege ti nzoni ahon ti to nda ni ayeke ti gi ti hinga lingu ti asalango ngangu so nga amayele ti lo. Fade a yeke sala tene na ndo ni na article ti peko.