Yingo-ti-hinga ti Mo: Bata ni Nzoni

BIBE ti sala voyage na yâ ti mbeni lapara so a yôro na yâ ti ordinateur ni asango so ayeke na lege ni pepe amu mbito mingi. Nde na so, bi bê kete so mbeni zo andu na hondengo ni aye so afa lege na lapara wala agbian na mbana asango so ayeke na yâ ni! A lingbi na tapande so, na lege ti fä, a yeke biani ye so mbeni zo ayeke gi ti sala na yingo-ti-hinga ti mo. Lo bi bê ti lo kue ti buba aye so afa lege na salango ye ti mo. Ye so lo zia na gbele lo ayeke ti tingbi mo lê na lê na Nzapa!​—Job 2:2-5; Jean 8:44.

Sioni wabubango ye so ayeke zo wa? Na yâ Bible, a hiri lo “ngbo ti giriri, lo so a di iri ti lo Diable na Satan, lo so ayeke handa sese kue so zo ayeke dä.” (Apocalypse 12:9, NW) A ba lo na kusala na yaka ti Eden giriri tongana, na tene ti mayele, lo ga na Ève ti vi peko ti lo na ye so lo hinga ayeke mbilimbili na ti londo ti ke yanga ti Nzapa. (Genèse 3:1-6, 16-19) Ngbele ye na ngoi so, Satan amu li ni na maïngo ti ambeni bungbi kue ti handa ti pusu azo ti ke Nzapa. Bungbi so tene ayeke na li ti lo mingi ahon ayeke lege ti vorongo ti wataka.​—2 aCorinthien 11:14, 15.

Lege ti Vorongo ti Wataka Abuba Yingo-ti-hinga ti Zo

Na yâ Bible, na mbeti ti Apocalypse, a fa lege ti vorongo ti wataka tongana mbeni wali-pitan na lege ti fä so a di iri ti lo Babylone ti Kota. Afango ye ti lo abuba abibe ti nzoni salango ye ti azo mingi na a pusu ala ti ke na ti sala même ye ti sioni mingi na tele ti azo so atene ti mabe ti ala ayeke nde. Biani, Apocalypse atene so Nzapa aba lege ti vorongo ti wataka tongana kozo ye so ayeke na gunda ti tukungo mênë “ti ala kue so a fâ ala na ndo sese,” so na popo ni a wara nga awavorongo Nzapa mveni.​—Apocalypse 17:1-6, NW; 18:3, 24.

Jésus agboto mê ti adisciple ti lo na ndo ye so lege ti vorongo ti wataka ayeke sala ti buba na aye so afa lege na nzoni salango ye ti ambeni zo tongana lo tene: “Ngbonga ni ayeke ga so fade mbeni zo afâ i na lo tene na bê ti lo so lo sala na Nzapa kusala ti nzoni-kue.” Biani bibe ti azo ti salango ngangu so ayeke kirikiri! Jésus atene: “Ala hinga Babâ nga mbi pepe.” (Jean 16:2, 3, NW) Ngoi mingi pepe na pekoni so Jésus asala atene so, ambeni mokonzi ti lege ti vorongo amu yanga ti tene a fâ lo, na ala sala si yingo-ti-hinga ti ala ayeda na sioni so ala sala. (Jean 11:47-50) Nde na so, Jésus atene so a yeke hinga atâ disciple ti lo na ndoye so ala yeke na ni na popo ti ala. Me ndoye ti ala akono même mingi ahon, teti a ndu nga awato ti ala.​—Matthieu 5:44-48; Jean 13:35.

Mbeni ye nde so lege ti vorongo ti wataka asala ti buba na yingo-ti-hinga ti azo mingi ayeke ti yeda na alege ti salango ye so ayeke dä, wala ayeke dä pepe, so awu na mbeni ngoi. Na fango tene ni kozo, bazengele Paul atene: “Lâ ni ayeke ga so fade ala ye ti mä nzo fango ye pepe, me, a lingbi na nzala ti bê ti ala, fade ala wara awafango ye mingi teti ala mveni si a fa ye so anzere na mê ti ala.”​—2 Timothée 4:3, NW.

Na ngoi ti e, amokonzi ti lege ti vorongo afa ye so anzere na mê ti azo na tenengo so Nzapa alingbi ti yeda na bungbingo ti koli na wali na gigi ti mariage. Ambeni akanga lê na ndo ti bungbingo ti koli na koli wala ti wali na wali. Biani, ambeni mokonzi ti lege ti vorongo ayeke ala mveni akoli so ayeke bungbi na amba ti ala koli. Mbeni article na yâ ti mbeti-sango The Times ti Grande-Bretagne atene so “a soro amokonzi ti lege ti vorongo 13 so a hinga ala tongana akoli so ayeke bungbi na amba ti ala koli” ti duti na ndo Kota Bungbi ti Amokonzi ti Église ti Angleterre. Tongana amokonzi ti lege ti vorongo azia lege ti anzoni salango ye so ayeke na yâ Bible na a-église ti ala asala tene na ndo ni mingi pepe, fade azo ti paroisse ti ala amu peko ti asalango ye wa? A yeke ye ti dongo bê pepe so azo kutu mingi ahinga pepe ye so a yeke nzoni ti sala.

Ba tongana nyen a yeke nzoni ahon ti tene asalango ye so ayeke tongana wâ so afa lege nga atâ tene ti yingo so ayeke na yâ Bible afa lege na e! (Psaume 43:3; Jean 17:17) Na tapande, Bible afa so azo ti pitan nga na azo so asala lango-sioni ayeke ga pepe “ahéritier ti royaume ti Nzapa.” (1 aCorinthien 6:9, 10) A tene na e so akoli na awali so azia “lege ti koli na wali, na ala sala na mbeni lege nde” ayeke “sala ye ti kamela” na lê ti Nzapa. (aRomain 1:26, 27, 32) Atâ kpengba-ndia so teti nzoni tambela alondo pepe na azo so ayeke mbilimbili-kue pepe; me ala yeke akpengba-ndia so a sû na gbe ti yingo ti Nzapa, na lo miro ala lâ oko pepe. (aGalate 1:8; 2 Timothée 3:16) Me Satan ayeke na ambeni lege nga ti buba na yingo-ti-hinga ti zo.

Soro yâ ti Asalango Ngia ti Mo Nzoni

A yeke ye oko ti gbu zo na ngangu ti sala mbeni ye ti sioni, me a yeke mbeni ye nde ti sala si lo ye ti sala mara ti ye tongaso. A yeke ye so Satan, “mokonzi ti sese so,” agi ti sala. Lo ye ti yôro biaku biaku asioni bibe ti lo na yâ abibe na bê ti awabuba wala azo so asala hange pepe, mbilimbili ala so awoko mingi, so ayeke apendere. Ti sala ni lo mu aye tongana ambeti so ayeke nzoni pepe, alimon, mozoko, angia ti ordinateur, na aye so andu porno na ndo ti Internet.​—Jean 14:30; aEphésien 2:2.

Mbeni tondo na yâ mbeti-sango Pediatrics, atene: “Ngu oko oko, apendere [na États-Unis ti Amerika] ayeke ba asalango ye ti ngangu 10 000, na mingi ni a yeke akuasingale so a leke teti amolenge si afa aye ti ngangu mingi ahon.” Tondo ni afa nga so, “ngu oko oko, apendere ayeke ba aye, atene ti mayele na atene ti ngia 15 000 so andu bungbingo koli na wali.” A tene so même na ngoi so azo mingi amu ti ba na televizion, “a wara na yâ ti alimon aye ahon 8 so andu bungbingo ti koli na wali na yâ ngbonga oko oko, wungo ni ahon fani osio wungo ti aye so a ba na ngu 1976.” A yeke senge pepe so tondo ni aba nga so “sioni yanga ayeke gue nga na li ni mingi ahon.” Ye oko, Bible nga na gbâ ti aye so awasenda-ye amanda agboto mê so bango aye tongaso lakue ayeke gbian salango ye ti azo si a kiri a ga sioni ahon. Tongaso, tongana mo ye biani ti nzere na lê ti Nzapa na ti wara nzoni teti mo mveni, sala ye alingbi na aProverbe 4:23 (NW), so atene: “Bata bê ti mo nzoni, teti a yeke ndo so alege ti fini alondo dä.”​—Esaïe 48:17.

Amozoko mingi so amu ndo kue abuba nga yingo-ti-hinga ti zo. Mbeni tondo na yâ mbeti-sango ti Australie The Sunday Mail amu gbotongo mê so, a tene mbeni wapikango mozoko so azo ti ambeni kodoro ti do aye abia ti lo mingi asala “kue ti so bê ti azo.” Mbeti-sango ni atene so “abia ti lo ayä na nduzu tene ti mbangi, ti bungbingo ti koli na wali na popo ti sewa oko na ti gbungo wali na ngangu” na so “na yâ bia ti lo, lo sala tene ti fango wali ti lo na bingo tele ti lo na yâ ti mbeni kota ngu.” Ambeni tene ti bia ni ayeke sioni mingi ahon si a lingbi pepe ti fa pekoni ge. Atä so kue, mozoko ti lo asala si lo wara mbeni kota matabisi. Mo ye ti lu na yâ bibe na bê ti mo mara ti asioni tene ti futi lege ti zo tongana ti so a fa na nduzu ge, atä so a leke ni pendere na mozoko? E yeke na beku so fade mo yeke ke, teti ala so asala ye tongaso abuba yingo-ti-hinga ti ala nga, na nda ni, ala leke na yâ ala mbeni “bê ti sioni,” so asala si ala ga awato ti Nzapa.​—aHébreu 3:12, NW; Matthieu 12:33-35.

Tongaso, sala ye na ndara na yâ sorongo asalango ngia ti mo. Bible awa e mingi: “Ye so ayeke biani, ye so ayeke ye ti voro, ye so ayeke mbilimbili, ye so ayeke na sioni kete pepe, ye so ayeke nzoni, tene so ayeke tene ti nzoni, tongana nzoye na tene ti singila ayeke dä, i bi bê ti i na ye so.”​—aPhilippien 4:8.

Akamarade Asala Ye na ndo Yingo-ti-hinga ti Mo

Na ngoi so ala de kete molenge, Neil na Franz ayeke na ngia ti lë nzoni songo na aChrétien so asala ye na bê kue.a Me, Neil atene, tongana ngoi ayeke hon, “mbi to nda ti bungbi na asioni kamarade.” Vundu asala lo fadeso teti na nda ni lo fâ zo na a bi lo na da ti kanga. Mbaï ti Franz ayeke legeoko tongaso. Lo dema: “Mbi tene na bê ti mbi so mbi lingbi ti duti na popo ti apendere ti sese na ala sala ngangu na ndo ti mbi pepe. Me tongana ti so aGalate 6:7 atene, ‘Zo alingbi he Nzapa pepe. Teti ye kue so zo alu, fade lo ko gi ye so nga.’ Na lege ti sioni ye so asi na mbi, mbi ba so mbi handa tele ti mbi ngangu na Jéhovah atene tâ tene. A dë ngbanga ti kanga ti lakue lakue na li ti mbi teti sioni so mbi sala.”

Mingi ni, azo tongana Neil na Franz alondo ti fâ zo fade fade pepe; kozoni, tele ti ala ayeke dö gi na bingo bê na ndo ni. Mingi ni zo atï na yâ ni yeke yeke, na fani mingi kozo kapa ni ayeke asioni kamarade. (1 aCorinthien 15:33) Nyongo mbangi wala samba ahon ndo ni alingbi ti ga na peko. Biani, a yeke tâ na lege ni si a fa peko ti yingo-ti-hinga tongana “mbeni mbage ti salango ye ti zo so samba alingbi ti buba ni.” Ti londo na ndo so, a hunda gi mbeni kete ye ti ke ndia wala ti sala pitan.

Tongaso, tï pepe na yâ kozo kapa ni! Nde na so, bungbi na azo ti ndara so andoye biani Nzapa. Fade ala yeke mu maboko na mo ti kpengba yingo-ti-hinga ti mo si a fa lege nzoni na mo, na salango si mo kpe aye ti vundu mingi. (aProverbe 13:20) Atä so ala de na da ti kanga, Neil na Franz ayeke ba fadeso yingo-ti-hinga ti ala tongana matabisi so alondo na Nzapa so a lingbi a fa lege na ni nzoni na, biani, a yekia ni. Nga, ala yeke sala kusala ngangu ti lë mbeni kpengba songo na Jéhovah, Nzapa ti ala. Sala ye na ndara, na manda ye na lege ti sioni so ala sala.​—aProverbe 22:3.

Bata Yingo-ti-hinga ti Mo

E fa so e ye ti bata yingo-ti-hinga ti e tongana e kpengba ndoye ti e teti Nzapa nga mabe ti e na yâ lo, na e bungbi ni kue na mbeni nzoni mbito teti lo. (aProverbe 8:13; 1 Jean 5:3) Bible atene so tongana aye tongaso asala ngangu pepe na ndo ti mbeni yingo-ti-hinga, fani mingi lo yeke duti pepe na mbeni nzoni lege ti salango ye so aluti ngangu. Na tapande, Psaume 14:1 asala tene ti azo so atene na bê ti ala: “Nzapa ayeke pepe.” Tongana nyen mabe so ayeke dä pepe andu tambela ti ala? Versê ni angbâ ti tene: “Ala yeke sioni, ala sala kusala ti sioni ahon.”

Azo so ayeke pepe na tâ mabe na Nzapa ayeke nga pepe na kpengba beku teti mbeni kekereke ti nzoni ahon. Tongaso, ala yeke ndulu ti duti na fini teti aye so asi fadeso, na gingo ti kaï anzala ti tele ti ala. Mato ti ala ayeke: “Zia e te na [e] nyon, teti kekereke e yeke kui.” (1 aCorinthien 15:32) Nde na so, azo so lê ti ala aluti na ndo ti matabisi ti fini ti lakue lakue azia pepe si anzala ti sese so, so ayeke glisa hio, agboto ala yongoro. Legeoko tongana mbeni ordinateur so afa lege mbilimbili na lapara, yingo-ti-hinga ti ala so a fa lege na ni asala si ala ngbâ lakue ti mä yanga ti Nzapa na be-biani.​—aPhilippien 3:8.

Ti tene yingo-ti-hinga ti mo abata ngangu ti lo nga salango ye ti lo mbilimbili, a lingbi mo fa ye lakue na lo na lege ti Tene ti Nzapa. Bible atene na e so a lingbi ti wara mara ti fango lege tongaso tongana, na lege ti tapande, lo tene: “Tongana i gue na koti, wala na gati, fade mê ti i amä yanga na peko ti i, so atene, So ayeke lege ni, i tambela dä.” (Esaïe 30:21) Tongaso bata ngoi teti dikongo Bible lâ na lâ. Fade ye so ayeke kpengba mo na ayeke mu maboko na mo tongana mo yeke sala ngangu ti sala ye so ayeke mbilimbili wala tongana ambinda ti gingo bê aye ti sala ngangu na ndo ti mo. Hinga na bê ti mo biani so, tongana mo zia bê ti mo kue na lo, Jéhovah ayeke fa lege na mo na lege ti bibe na ti yingo. Biani, manda tapande ti wasungo psaume so atene: “Mbi ba L’Eternel na gbele mbi lakue; teti Lo yeke na koti ti mbi, ye alingbi yengi mbi pepe.”​—Psaume 16:8; 55:23 (55:22, NW).

[Kete Tene na Gbe Ni]

[Afoto na lembeti 5]

Lege ti vorongo ti wataka, so Bible afa pekoni tongana “Babylone ti Kota,” ayeke na gunda ti bubango yingo-ti-hinga ti azo mingi

[Lingu ti foto]

Prêtre ahiri deba nzoni na ndo aturugu: U.S. Foto ti turugu

[Afoto na lembeti 6]

Bango ye ti ngangu nga na pitan ayeke buba yingo-ti-hinga ti mo

[Foto na lembeti 7]

Warango lakue fango lege ti Tene ti Nzapa ayeke bata yingo-ti-hinga ti mo nzoni