Atënë So Azo Ahunda

Tënë ti aHébreu 12:4 so atene “I de i ke juska na mênë pëpe” aye ti tene nyen?

Tënë “ke juska na mênë” andu tënë ti gue juska na kuâ, mbilimbili ti tene zo ague juska ti sa mênë ti lo mveni.

Bazengele Paul ahinga so ngbanga ti mabe ti ala, ambeni Chrétien so ayeke aHébreu ‘agbu ngangu na yâ kota tiri ti pono mingi.’ (aHébreu 10:32, 33) Tongana lo yeke sala tënë ti ye so, a bâ so Paul asala kusala na lege ti fä na atënë so andu mbeni tiri na yâ mandako ti awanguru na Grèce, so alingbi ti ndu mandako ti loro ti gere, ti tiri ti pongo, ti pikango gobo, na ti bingo sembe na javelot. Ni la, na aHébreu 12:1 (NW), lo wa afon lo Chrétien: “A lingbi e zia nga kungba kue na siokpari so akanga lege na e hio, nga, na bê so azia pëpe, e kpe loro so a zia na gbele e.”

Aversê ota na pekoni, na aHébreu 12:4, Paul asala kusala peut-être kozoni kue na tapande ti mbeni mandako ti kpengo loro, na lo hunzi tënë ti lo na salango kusala na tapande ti mbeni mandako ti kpongo gobo. (A sala kusala na atapande use so na 1 aCorinthien 9:26.) A yeke kanga lani amaboko ti azo ti pikango gobo na akamba so a sala na poro ti anyama. A lingbi même ti zia na tele ti akamba ni “plomb, wen, wala a-pointe ti wen so ayeke sala akota kä na tele ti awapikango gobo ni.” Asalango ye na ngangu tongaso ayeke sala si mênë ayuru ngangu, na même alingbi ti ga na kuâ.

Atâa ye ni ayeke tongana nyen, aChrétien so ayeke aHébreu ayeke lani na atapande ti awakua be-ta-zo ti Nzapa so ahu pono lani na gbele salango ngangu na pasi so a sala na ndo ala, même juska na kuâ, wala “juska na mênë.” Bâ atënë so angoro ni, so na yâ ni Paul agboto lê na ndo ye so asi na abe-ta-zo ti giriri:

“A bolo ala na tênë, a tara ala, a fâ ala na scie, a fâ ala na épée. Ala yü poro ti angasangbaga, poro ti angasa, na ala tambela na ndo nde nde; nzinga asala ala, azo asala ye ti vundu na ala, na a sala sioni na ala.” Na pekoni, Paul agboto lê na ndo Lo so asala si mabe ti e alingbi kue, Jésus: “Lo hu pono ti keke ti pasi, na bango kamela ni tongana ye senge, na lo duti na koti ti trône ti Nzapa.”​—aHébreu 11:37; 12:2, NW.

Biani, azo mingi lani ‘ake juska na mênë,’ so ti tene, juska na kuâ. Tiri ti ala ayeke lani ye mingi ahon gi tiri so ala yeke sala na yâ bibe ti ala ti ke siokpari ti mabe so atia. Ala duti lani be-ta-zo na gbele salango ngangu ti sioni so a sala na ndo ala, na batango be-biani ti ala juska na kuâ.

Afini zo so ayeke lani na yâ kongregation ti Jérusalem, peut-être ala ga Chrétien na peko ti so sioni salango ngangu so asi kozoni adë awe, atingbi lâ oko pëpe na mara ti atara ti ngangu tongaso. (Kusala 7:54-60; 12:1, 2; aHébreu 13:7) Ye oko, même atara so ayeke ngangu mingi pëpe ayeke sala si ambeni na popo ti ala anze ti ngbâ ti tiri; ‘ngangu ti ala awe, na bê ti ala anze.’ (aHébreu 12:3) A lingbi ala maï ti ga biazo. Fade ye so ayeke kpengba ngangu ti ala ti luti na gbele aye kue so alingbi ti si, même tongana ye so andu salango ngangu na ndo ala juska na kuâ.​—aHébreu 6:1; 12:7-11.

A-Chrétien mingi ti ngoi ti laso ‘ake juska na mênë,’ a fâ ala ngbanga ti so ala ke ti bele lege ti vorongo ti ala ti Chrétien. Ahon ti zia si atënë ti Paul na aHébreu 12:4 aduti lingu ti dutingo na kota mbito, e lingbi ti bâ ni tongana mbeni ye so afa juska na ndo wa e leke na bê ti e ti gue ti ngbâ be-ta-zo na Nzapa. Na pekoni, gi na yâ oko mbeti ti lo na aHébreu, Paul asû: “Zia e kiri singila; na lege so, e lingbi sala kusala so alingbi na lê ti Nzapa, na lege ti kpengo mbito ti Lo na dongo bê.”​—aHébreu 12:28.