A Futi Mbeni Sese Kue!

Bâ sese na tele ti mo, na agbata ti lo, ngobo ti salango ye ti lo, aye so senda-ye ti lo awara lege ti sala, nga na azo ti lo ngbundangbu mingi. A yeke ngangu pëpe ti tene bê ti mo adö ndali ti dutingo ti lo so akpa mbeni ye so aninga, ni la pëpe? Mo tene ti mo so mbeni lâ sese so alingbi ti glisa kue? A lingbi ti duti ngangu ti bi bê na ni. Ye oko, mo hinga so na lege ti mbeni ye so a lingbi ti zia bê dä, mbeni sese abâ gigi giriri kozoni na ti so, na a futi lo kue?

E YEKE sala tënë pëpe ti mbeni sese ti akete mara ti giriri so ahinga ye mingi pëpe. Sese so aglisa amaï lani mingi, na a lingbi ti wara na yâ ni agbata, akusala so a sala na kode nga hingango ye na ndo senda-ye. Ye oko, tondo ti Bible atene na e so fade fade, na lango 17 ti use nze ni, angu 352 kozoni si a dü kotara Abraham, mbeni moa ato nda ti tï na a mene mbeni sese mobimba.a

Tondo so ayeke tâ tënë? Mara ti ye tongaso asi biani? Mbeni sese ti giriri ayeke lani dä biani kozoni na sese ti laso, so amaï na so na pekoni a futi ni? Tongana a yeke tongaso, ngbanga ti nyen lo glisa? Kpale ni ayeke lani so wa? Na mbeni ye ayeke dä so e lingbi ti manda na lege ti futingo ti lo?

A Futi Biani Mbeni Sese ti Giriri?

Tongana a si biani, a lingbi ti glisa biaku lâ oko pëpe mara ti kota kpale tongaso. Ni la, na yâ amara mingi, ambeni ye angbâ so adabe na futingo so. Bâ, na tapande, mbilimbili ngoi so Mbeti ti Nzapa afa ni. Use nze ni na yâ kalendrier ti giriri andu ye so e hiri ni fadeso popo ti octobre ti si na popo ti novembre. Tongaso, lango 17 ni aye ti gue oko na kozo lango ti novembre. Tongaso, a lingbi ti duti pëpe gi mbeni ye so asi gi tongaso, so na yâ ti akodoro mingi, a yeke sala amatanga teti akinda na oko ngoi so ti ngu.

Ambeni fä nde ti Moa ni angbâ na yâ apande ti azo. Amara kue ti azo so aninga mingi ayeke na mbeni pande so atene so akotara ti ala asö fini na yâ mbeni moa so amû sese kue. Abaminga ti Afrika, a-Celte ti Poto, a-Inca ti Amerika ti Mbongo, ala kue ayeke na apande so akpa tele, legeoko na azo ti Alaska, ambeni mbage ti Amerika ti Banga, Australie, Chine, Inde, Lithuanie, Mexique, Micronésie, nga na Nouvelle-Zélande, ti fa gi ambeni oko oko.

Biani, tongana angoi ahon a leke yâ ti apande ni, me ala kue ayeke na ambeni nzene nzene tënë so afa so ala londo na lege ti mbaï oko: Ngonzo asala Nzapa ndali ti sioye ti azo. Lo ga na mbeni kota moa. A futi azo kue. Ye oko, a bata azo ti mbilimbili so ayeke mingi pëpe. Ala leke mbeni mangboko so na lege ni azo na anyama asö fini ti ala. Tongana ngoi ahon, a to andeke na gigi ti gi mbeni ndo so ahule. Na nda ni, mangboko ni aluti na ndo mbeni hoto. Tongana ala zu na sese, azo so asö kuâ amû mbeni sadaka.

Ye so aye ti fa nyen? Aye alingbi ti kpa tele gi senge tongaso pëpe. Apande nde nde so ayeda na ngbele tënë ti témoin ti Bible so atene azo kue alondo na lege ti azo so asö fini na yâ mbeni moa so afuti mbeni sese ti azo. Tongaso, e yeke na bezoin pëpe ti luti na ndo apande wala atënë ti tere ti hinga ye so asi. E yeke na mbaï so a bata ni nzoni na yâ mbage ti Mbeti ti Nzapa so a sala na yanga ti Hébreu.—Genèse, achapitre 6-8.

Bible ayeke na mbeni tondo ti mbaï so a sû na gbe ti yingo so ato nda ni na ngoi so fini abâ gigi. Ye oko, aye afa so a ne mingi ahon gi mbeni tënë ti mbaï. Tënë ti prophétie ti lo so alï ngu lâ oko pëpe nga na kota ndara ti lo afa na gigi so lo yeke biani ye so lo tene lo yeke: Lege so Nzapa ayeke sala tënë na azo. Nde na apande, a wara na yâ atondo ti mbaï ti Bible a-iri na alango nga na anzene nzene ye na ndo iri ti akotara ti azo nga ando ni so ye ni asi dä. A fa na e mara ti fini so ayeke giriri kozoni si Moa aga, na a fa ngbanga ti nyen mbeni sese mobimba aglisa fade fade.

Kpale ni ayeke lani so wa na yâ bungbi ti azo so ayeke kozoni na moa? Article ti peko ayeke bâ hundango tënë so. A yeke mbeni kota hundango tënë teti ala so ayeke hunda tele ti ala na ndo ye so ayeke si na gigi ti kekereke ti sese ti e ti laso.

[Kete Tene na Gbe Ni]

[Carte na lembeti 4]

(Ti ba tene ni mbilimbili, ba buku ni)

Apande na ndo Moa So A Wara na Ndo Kue

Kodoro Aye So Akpa Tele 1 2 3 4 5 6 7 8 9 10

Gréce 7 ◆ ◆ ◆ ◆ ◆ ◆ ◆

Rome 6 ◆ ◆ ◆ ◆ ◆ ◆

Lithuanie 6 ◆ ◆ ◆ ◆ ◆ ◆

Assyrie 9 ◆ ◆ ◆ ◆ ◆ ◆ ◆ ◆ ◆

Tanzanie 7 ◆ ◆ ◆ ◆ ◆ ◆ ◆

Inde - Hindou 6 ◆ ◆ ◆ ◆ ◆ ◆

Nouvelle-Zélande - Maori 5 ◆ ◆ ◆ ◆ ◆

Micronésie 7 ◆ ◆ ◆ ◆ ◆ ◆ ◆

Washington U.S.A. - Yakima 7 ◆ ◆ ◆ ◆ ◆ ◆ ◆

Mississippi U.S.A. - Choctaw 7 ◆ ◆ ◆ ◆ ◆ ◆ ◆

Mexique - Michoácan 5 ◆ ◆ ◆ ◆ ◆

Amerika ti Mbongo - Quechua 4 ◆ ◆ ◆ ◆

Bolivie - Chiriguano 5 ◆ ◆ ◆ ◆ ◆

Guyane - Arawak 6 ◆ ◆ ◆ ◆ ◆ ◆

1: Ngonzo asala Nzapa ndali ti sioye

2: Futingo na lege ti moa

3: Nzapa si amû yanga

4: Nzapa amû gbotongo mê

5: Azo mingi pëpe asö kuâ

6: A sö ala na yâ mbeni mangboko

7: A sö anyama

8: A to ndeke wala mbeni nyama nde na gigi

9: Na nda ni a luti na ndo mbeni hoto

10: A mû sadaka