Mungo adesizion: Mbeni ye so zo alingbi ti kpe ni pëpe
NAPOLÉON BONAPARTE, togbia ti France (1804-1814) atene mbeni lâ: “Mbeni ye so ayeke ngangu mingi, na ayeke ye ti kota ngele mingi ahon ti hinga ti mû adesizion ayeke pëpe.” Mo lingbi peut-être ti yeda na atënë so, teti so fani mingi, azo atene so ala bâ na nene ni fango lege na fini ti ala mveni. Ye oko, na oko ngoi ni ala manda so ngoi na ngoi, ti mû adesizion ayeke kete ye pëpe.
Atâa a yeke ngangu wala pëpe, zo oko alingbi ti kpe mungo adesizion pëpe. Lâ na lâ e yeke tingbi na mungo adesizion. Na peko ti so e zingo na lango na ndapelele, a lingbi e mû desizion na ndo bongo so e yeke yü, ye so e yeke te na ndapelele nga tongana nyen ti sala gbâ ti ambeni ye na yâ lango ni. Mingi ti adesizion so ayeke na nene ni mingi pëpe. A yeke ngangu na e ti kiri na ndo ni. A yeke ngangu ti tene lango akpe na lê ti e ndali ti mara ti adesizion tongaso.
Ye oko, a yeke ngangu ti mû ambeni desizion. A lingbi amaseka mingi ti ngoi ti laso amû desizion na ndo aye wa ala zia na gbele ala ti sala ande. Mara ti ekole wa a lingbi ala sala, na a lingbi ala sala ni teti angu oke? Mbeni lâ, mingi ti ala yeke mû ande desizion ti sala mariage wala ti ngbâ kumbamba. Ti ala so aye ti sala mariage, a lingbi ala hunda tele ti ala: ‘Ngu ti mbi alingbi, na mbi ga biazo awe ti sala mariage? Mara ti zo wa mbi ye, wala ti kota ahon so, mara ti zo wa a lingbi mbi wara?’ Adesizion mingi pëpe asala ngangu na ndo e ahon sorongo mbeni koli wala wali.
Na yâ ti atënë so ane mingi, a yeke kota ye ti mû adesizion ti ndara, teti so dutingo ti e na ngia aluti ngangu mingi na ndo ni. Ambeni zo alingbi peut-être ti bâ so ala lingbi kue awe ti mû mara ti adesizion tongaso na ala yeke ke mungo maboko so a mû na ala. A yeke na lege ti ndara la? Zia e bâ ni.
[Lingu ti foto na lembeti 3]
Napoléon: Na yâ buku The Pictorial History of the World