“Tënë ti Nzapa ayeke biani tâ na ngangu!”

“TËNË ti Nzapa ayeke na fini, na a yeke na ngangu ti sala ye.” (aHébreu 4:12). Ti yeda na ngangu ti Tënë ti Nzapa so zo alingbi ti ke ni pëpe, Kalendrier ti aTémoin ti Jéhovah ti ngu 2003 agboto lê na ndo atâ mbaï ti fini ti azo omene na ndo sese mobimba. Na gbe ti li ti tënë “Ândö nga Laso”, kalendrier ni afa tongana nyen kusala ti fango tënë ti aTémoin ti Jéhovah amû maboko na azo ti kiri ti leke yâ ti salango ye ti ala, ti zia lege ti tambela so abuba fini ti zo, ti kpengba sewa ti ala, nga ti lë mbeni nzoni songo na Nzapa.

A wara ambeni mbeti ti fango bê ti kiri singila teti kalendrier ti ngu 2003 so azo atokua. Bâ ambeni tënë ni ge:

“Kalendrier so ayeke fä teti atâ Chrétien so, legeoko tongana ala, ambeni zo ayeke dä so atiri bira ngangu ti bata mabe. Fadeso ala lingbi ti bâ afoto ni ti dabe ala na agbiango ye so ambeni zo asala awe.”​—Steven, Amerika.

“Mbi ye biani ti sû akete mbeti so ti fa na i tongana nyen kalendrier ti ngu 2003 andu tâ bê ti mbi mingi. Mbeni kalendrier nde so asala ngangu na ndo mbi ahon kalendrier so ayeke pëpe. Ambaï ti fini so ayeke duti ande na popo ti ambeti so mbi yeke zia na yâ bozo ti fango tënë ti mbi ti fa na azo tâ tapande ni mveni ti ngangu so Bible alingbi ti sala na ndo azo.”—Marc, Belgique.

“Kalendrier so agbu bê ti mbi tâ ngangu mingi tongana mbi diko ni na mbi bâ lege so Jéhovah ayeke gbian lani fini ti azo so. Ni la, ye so apusu mbi ti ngbâ lakue ti gbian aye na yâ fini ti mbi mveni. Fadeso, mbi bâ biani so mbi yeke na yâ kpengba songo ti aita na ndo sese mobimba.”​—Mary, Amerika.

“Dutingo ti azo ti ngoi ni kâ na lege ti yingo andu lani bê ti Jésus ngangu mingi. Singila mingi teti so ala mû tapande ti Christ na ziango ambaï ti fini so na yâ kalendrier ti e ti ngu 2003. Mbi de mbi bâ lâ oko pëpe mbeni kalendrier tongaso so andu bê ti mbi na asala si mbi ye ti toto.”​—Cassandra, Amerika.

“Mbi to nda ti nyon manga na ngoi so mbi yeke lani na ngu 11; na pekoni mbi nyon ambangi. Fani mingi, mbi ye ti fâ tele ti mbi. Tongana mbi ga ti hinga Jéhovah, a mû lani maboko na mbi ti zia asioni salango ye so. Kalendrier so ayeke kota ye mingi na lê ti mbi. Atapande ti aita ti mbi ti koli na ti wali ti ndo sese kue amû ngangu na mbi. Fadeso, mbi hinga so mbi yeke gi mbi oko pëpe na yâ bira so, na ndoye teti Jéhovah nga kusala so e yeke sala na lo na bê ti e kue ayeke kota ye so ahon ye kue.”​—Margaret, Pologne.

“Tënë ti Nzapa ayeke biani tâ na ngangu! Na ngoi so mbi wara kalendrier ti ngu 2003 ni, a ngbâ kete ngu ti lê ti mbi asigigi. Atapande nga na afoto ni ayeke tâ ye ti kpengbango mabe biani.”​—Darlene, Amerika.

“Ngbele salango ye ti mingi ti azo so akpa nga ye so mbi yeke sala ândö. Jéhovah amû na mbi ngangu ti zia asioni salango ye so a bâ a tene lege ayeke dä pëpe ti hon ndo ni. Singila mingi teti ambaï ti fini so.”​—William, Amerika.