Atënë so azo ahunda
Tongana nyen a lingbi aChrétien abâ atênë ti ngele ngangu so alingbi na nze ti dungo zo?
Na yâ ambeni kodoro, a tingbi atênë ti ngele ngangu na nze ti dungo zo. Ti tene mbeni Chrétien ayü bage so mbeni tênë ti ngele ngangu tongaso ayeke na ndo ni, a yeke ye so abâ lo mveni (aGalate 6:5). A lingbi a bâ ambeni kota ye na yâ mungo desizion so.
Mbeni kota bakari (Encyclopaedia Britannica) atene so tênë ti ngele ngangu so alingbi na nze ti dungo zo “ague oko na lâ ti dungo zo, so mingi ni azo abâ so yungo ni ayeke ga na zo nzo pasa.” Buku so akiri atene: “Azo ti fango nda ti atongoro atene so angangu so ahon ti azo ayeke na yâ ti ambeni tênë ti ngele ngangu.”
Mbilimbili na ngoi ti giriri azo mingi amä na bê so mara ti atênë tongaso ayeke ga na nzo pasa na zo so ayü ni. Tâ Chrétien ayeke mä na bê na ye tongaso? Oko pëpe, teti lo hinga so Jéhovah afâ ngbanga na ndo ti azo so ake lo, na so azia bê kue na “Gad [wala, Nzapa ti nzo pasa]”.—Esaïe 65:11.
A sala ngu saki oko tongaso awe, azo ti gingo bendo asoro mbeni tênë ti ngele ngangu teti nze oko oko ti ngu. Ala wa azo ti yü tênë ti ngele ngangu so alingbi na nze so a dü ala dä, na ala tene so a yeke bata azo so ayü ni si sioni asala ala pëpe. Me na lege ti Mbeti ti Nzapa, a yeke ye ti sioni teti aChrétien ti mû peko ti wango ti awagingo bendo, ngbanga ti so Bible afâ ngbanga na ndo ti ala.—Deutéronome 18:9-12.
Tênë ti ngele ngangu teti nze ti dungo zo alingbi ti duti na ndo mbeni bage. Ye oko, a yeke duti na lege ni pëpe ti tene ye so aduti kota ye mingi na lê ti aChrétien. A-Témoin ti Jéhovah ayeke sala amatanga ti dungo zo pëpe. Nda ni ayeke so mara ti amatanga tongaso agboto lê mingi na ndo zo ni, nga a-oko matanga ti dungo zo so Bible asala tënë ni ayeke ti azo ti komande so asala na Nzapa pëpe.—Genèse 40:20; Matthieu 14:6-10.
Ambeni zo abâ ti ala so yungo mbeni bage so mara ti atênë tongaso ayeke na ndo ni ayeke sala nzoni na ndo salango ye ti zo so ayü ni. Me atâ Chrétien ayeda na tënë so pëpe, ala hinga so a yeke yü “zo-ti-fini” na gbe ti ngangu ti yingo vulu ti Nzapa, nga na batango akpengba-ndia ti Mbeti ti Nzapa.—aEphésien 4:22-24.
Mbeni kota ye ni ayeke ye so apusu zo ti sala ye. Na mungo desizion ti yü mbeni bage na mara ti tênë tongaso na ndo ni, mbeni Chrétien alingbi ti hunda tele ti lo, ‘Mbi ye ti yü bage so gi ngbanga ti so tênë ti ngele ngangu ni anzere na mbi, atâa so a lingbi ti duti mbeni tênë so azia teti nze ti dungo mbi? Wala peut-être atënë so gere ni aluti nzoni pëpe, so ambeni zo atene na ndo mara ti atênë ti ngele ngangu tongaso asala ngangu na ndo mbi?’
A lingbi mbeni Chrétien abâ bê ti lo nzoni si lo hinga ye so apusu lo ti sala ye. Mbeti ti Nzapa atene: “Bata bê ti mo ahon mbeni ye ti mo kue so mo bata, teti lege ti fini kue alondo dä.” (aProverbe 4:23). Na yâ mungo desizion na ndo atênë ti ngele ngangu so alingbi na anze ti dungo zo, Chrétien oko oko ayeke sala nzoni ti bâ ye so apusu lo ti sala ye, nga aye so tambela ti lo alingbi ti sala na ndo lo nga na ndo ambeni zo.—aRomain 14:13.