Dengo bê ndali ti azo so ayeke na yâ ti pasi

TONGANA akoli na awali be-ta-zo ti giriri ayeke bâ pasi, ala sambela Nzapa na bê ti ala kue ti wara fango lege. Ye oko, ala sala nga ambeni ye ti yapu yâ ti pasi ni na tapande, na salango kusala na lege ti ndara ti kpe azo ti salango ngangu ni. Zia e bâ mbeni tapande oko. Ziango bê kue na Jéhovah, abungbi na ngangu so lo mveni lo sala, amû lege na David ti luti na gbele aye ti ngangu so asi na lo. Ka ti e a yeke tongana nyen laso?

Tongana mo yeke na yâ pasi, peut-être mo yeke mû li ni ti leke kpale ti mo. Na tapande, tongana mo yeke na kua ti nginza pëpe, mo yeke sala ngangu pëpe ti wara mbeni mbilimbili kua so ayeke mû ande lege na mo ti bata na tele nga na ti fami ti mo? (1 Timothée 5:8). Wala tongana mo yeke hu pono teti mbeni kobela, mo yeke gi pëpe ti bâ mbeni docteur so alingbi? A yeke nzoni ti bâ so Jésus, so awara ngangu ti Nzapa ti sava mara ti akobela nde nde kue, ayeda so ‘ala so ayeke na kobela aye ti bâ docteur.’ (Matthieu 9:12). Ye oko, a lingbi peut-être ti lungula akpale ti mo ni lakue pëpe; mo lingbi peut-être ti ngbâ ti luti na gbele ni juska na mbeni ngoi.

Ngbanga ti nyen ti zia pëpe tënë ni na Jéhovah Nzapa na yâ sambela? Na tapande, na ngoi so e yeke gi kua, ziango bê ti e kue na Nzapa nga sambela ayeke mû ande maboko na e ti luti ngangu na gbele tara ti yeda na mbeni kua so ague nde na akpengba-ndia ti Bible. Fade, e yeke kpe nga ti “zia lege ti mabe” na salango bê wala ndoye ti nginza (1 Timothée 6:10). Biani, na ngoi so e yeke mû akpengba desizion so andu kua ti nginza wala fami wala seni ti e, e lingbi ti mû peko ti wango ti David so: “Mo zia kungba ti mo na ndo L’Eternel, na fade Lo bata mo. Fade Lo zia ye ayengi azo ti mbilimbili lâ oko pëpe.”​—Psaume 55:23.

Sambela so e sala ni na bê ti e kue ayeke mû ande maboko na e si li ti e aga kirikiri pëpe, a yeke sala si pono ni ahon ndo ti e pëpe. Bazengele Paul, mbeni tâ Chrétien, asû na mbeti: “Na yâ ye kue i fa na Nzapa ye so i ye, na lege ti sambela na ti hunda mingi na tënë ti merci.” Na lege wa sambela so a sala na bê kue alingbi ti dë bê ti e? “Fade siriri ti Nzapa so ahon bibe kue abata bê ti i na abata bibe ti i na yâ Christ Jésus.” (aPhilippien 4:6, 7). Siriri ti Nzapa “ahon bibe kue”. Tongaso, a lingbi ti sala si bê ti e ayengi pëpe tongana vundu agbu bê ti e mingi. Fade a yeke ‘bata bê nga na bibe ti e’, si a mû maboko na e ti kpe ti sala ye na ngangu nga na ndara pëpe, ye so alingbi gi ti ga na pasi na ndo ni.

Sambela alingbi même ti gbian ngangu lege so ye ni ayeke si na nda ni. Na ngoi so a bi bazengele Paul na da ti kanga na Rome, na tâ be-ti-molenge, lo hunda na amba ti lo Chrétien ti sambela ndali ti lo. Ngbanga ti nyen Paul ahunda lani ye so? Lo sû mbeti na ala: “Mbi wa i mingi ahon ti sala tongaso, si a lingbi kiri mbi na i fade ahon.” (aHébreu 13:19). Ti tene ni nde, Paul ahinga lani so sambela so amba ti lo wamabe ayeke sala fani mingi, so Jéhovah ayeke mä, alingbi ti sala ngangu na ndo ngoi ti zingo lo.​—Philémon 22.

Sambela alingbi ande ti gbian ye so ayeke si na nda ti pasi ti e? Lo lingbi ande ti gbian ni. Ye oko, a lingbi e hinga so Jéhovah Nzapa ayeke kiri tënë lakue pëpe na asambela ti e na yâ lege so e ye. Paul asambela fani mingi na ndo ‘kî so ayeke na tele ti lo’, peut-être mbeni kpale ti mitele. Ye oko, ahon ti lungula pasi ni, Nzapa atene na Paul: “Grâce ti Mbi alingbi na mo, teti na ndo so ngangu ayeke pëpe, ngangu ti Mbi alingbi kue.”​—2 aCorinthien 12:7-9.

Tongaso, a lingbi ti si so pasi ti e ni ayeke hunzi peut-être fade fade pëpe. Ye oko, fade e yeke wara lege ti fa na gigi bê so e zia kue na Babâ ti e ti yayu (Jacques 1:2-4). A lingbi e hinga so même tongana Jéhovah Nzapa azi pasi ni pëpe, lo lingbi “leke lege ti sigigi nga, si [e] lingbi gbu ngangu.” (1 aCorinthien 10:13). A lingbi e hinga so a hiri Jéhovah “Nzapa ti lungula vundu kue, Lo so alungula vundu ti e na yâ pono ti e kue”. (2 aCorinthien 1:3, 4). Nzapa alingbi ti mû na e ye so a hunda na e ti wara ti luti na gbele pasi ni, nga e yeke na beku ti wara fini ti lakue lakue.

Tënë ti Nzapa, Bible, amû zendo so “fade [Jéhovah a]mbô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe”. (Apocalypse 21:3, 4). A yeke ngangu mingi ti yeda na mbeni sese so pasi ayeke dä pëpe? A lingbi peut-être ti duti ngangu tongana mo yeke wara lakue gi aye ti ngangu na yâ fini ti mo. Ye oko, ti duti na mbito pëpe na ti wara aye ti ngangu pëpe a yeke ye so Nzapa amû zendo ni, na ye so lo leke ti sala ayeke ga ande nzoni biani.​—Esaïe 55:10, 11.

[Afoto na lembeti 9]

Bê so anze aga na bê so adë